પૃથ્વી પર પાછા ફર્યા પછી શુભાંશુ શુક્લાને કેટલો પગાર મળશે? ISRO એ ₹548 કરોડનો ખર્ચો કર્યો
Did ISRO pay Shubhanshu Shukla: મિશન ગગનયાન માટેની મહત્વપૂર્ણ યાત્રા, અનુભવ મેળવવાનો મુખ્ય હેતુ.
Shubhanshu Shukla pay Axiom‑4: ભારતીય અવકાશયાત્રી શુભાંશુ શુક્લા (Shubhanshu Shukla) અને તેમની ટીમે આંતરરાષ્ટ્રીય અવકાશ મથક (International Space Station - ISS) પર 18 દિવસ વિતાવ્યા બાદ સફળતાપૂર્વક પૃથ્વી પર પાછા ફર્યા છે. ભારતીય અવકાશ સંશોધન સંગઠન (ISRO) દ્વારા પુષ્ટિ કરવામાં આવી છે કે શુભાંશુ શુક્લાના સ્વાસ્થ્ય માટે હાલ કોઈ તાત્કાલિક ચિંતા નથી. એક્સિયોમ-4 (Axiom-4) મિશન હેઠળની તેમની આ યાત્રા ભારતનાં મહત્વાકાંક્ષી મિશન ગગનયાન (Gaganyaan) માટે અત્યંત મહત્વપૂર્ણ માનવામાં આવે છે. આ મિશન માટે ભારતે આશરે ₹548 કરોડ જેટલો ખર્ચ કર્યો હતો, ત્યારે સ્વાભાવિક રીતે જ ઘણા લોકોના મનમાં પ્રશ્ન ઉદ્ભવ્યો હશે કે શુભાંશુ શુક્લાને આ ISS મિશન માટે કેટલો પગાર મળ્યો?
મિશનનો ખર્ચ અને શુભાંશુનું સંશોધન કાર્ય
₹548 કરોડનો આ ખર્ચ ISRO દ્વારા શુભાંશુની સઘન તાલીમ, અવકાશ મુસાફરી, ખાસ સ્પેસ સૂટ (Space Suit), સંશોધન કીટ (Research Kit) અને અન્ય જરૂરી સંસાધનો પાછળ કરવામાં આવ્યો હતો. આ મિશન હેઠળ, સરકારે શુભાંશુને ISS મોકલવા માટે ભંડોળ પૂરું પાડ્યું હતું. આંતરરાષ્ટ્રીય સ્ટેશન પર તેમણે ISRO માટે 7 મહત્વપૂર્ણ સંશોધનો કર્યા હતા, અને આખી ટીમ સાથે મળીને કુલ આશરે 60 જેટલા સંશોધનોમાં ભાગ લીધો હતો. શુભાંશુએ ISRO માટે કરેલા આ પ્રયોગો ભારતના મિશન ગગનયાનના ભવિષ્ય માટે ખૂબ જ મહત્વપૂર્ણ ગણાય છે.
શુભાંશુ શુક્લાનો પગાર
આશ્ચર્યજનક રીતે, શુભાંશુ શુક્લાને આ મિશન માટે એક પણ રૂપિયો મળ્યો ન હતો. આ મિશન તેમના માટે એક મૂલ્યવાન અનુભવ મેળવવાનું માધ્યમ હતું, જેનો લાભ ISROને તેના આગામી મિશનમાં સીધો મળશે. તેમને ISRO, નાસા (NASA) અને એક્સિયોમ (Axiom) દ્વારા કોઈ પણ પ્રકારે સીધી ચુકવણી કરવામાં આવી ન હતી. એટલે કે, તેમને આ વિશેષ મિશન માટે કોઈ પગાર આપવામાં આવ્યો ન હતો.
શુભાંશુ ભારતીય વાયુસેનામાં (Indian Air Force) ગ્રુપ કેપ્ટન (Group Captain) તરીકે ફરજ બાવે છે. સામાન્ય રીતે આ રેન્ક પર વાર્ષિક પગાર ₹30 લાખથી ₹46 લાખની વચ્ચે હોય છે, જેમાં મૂળભૂત પગાર, ગ્રેડ પે, મોંઘવારી ભથ્થું (DA) અને અન્ય સુવિધાઓનો સમાવેશ થાય છે. આની સરખામણીમાં, નાસા (NASA) તેના અવકાશયાત્રીઓને વાર્ષિક આશરે ₹1.35 કરોડનો પગાર આપે છે. ભલે શુભાંશુને આ મિશન માટે સીધો પગાર ન મળ્યો હોય, પરંતુ તેમની મહેનત, હિંમત અને સમર્પણને કારણે, દેશ આગામી સમયમાં અવકાશ ક્ષેત્રે અનેક નવા સીમાચિહ્નો હાંસલ કરશે. તેમને 2019માં ભારતના ગગનયાન મિશન માટે પસંદ કરવામાં આવ્યા હતા અને આ અંતર્ગત તેમણે રશિયા (Russia) અને ભારતમાં (India) વ્યાપક તાલીમ લીધી હતી.
ટોપ સ્ટોરી
ટ્રેન્ડિંગ સમાચાર
