ભારતે ડોનાલ્ડ ટ્રમ્પને આપ્યો મોટો ઝાટકો, AMCA ફાઈટર જે માટે અમેરિકા નહીં આ દેશ સાથે એન્જિન બનાવવાની કરી ડીલ
ભારતના સંરક્ષણ પ્રધાન રાજનાથ સિંહે આ પ્રોજેક્ટની જાહેરાત કરીને સ્પષ્ટ કરી દીધું છે કે ભારત હવે લડાકુ વિમાનોના એન્જિન માટે વિદેશી નિર્ભરતા ઘટાડવા માગે છે.
India France fighter jet deal: ભારતે તેના સ્વદેશી પાંચમી પેઢીના ફાઇટર જેટ, AMCA (એડવાન્સ્ડ મીડિયમ કોમ્બેટ એરક્રાફ્ટ) માટે એક નવું અને શક્તિશાળી જેટ એન્જિન વિકસાવવા માટે ફ્રાન્સ સાથે કરાર કર્યો છે. આ નિર્ણય યુનાઇટેડ સ્ટેટ્સને મોટો આર્થિક અને રાજદ્વારી ઝટકો છે, કારણ કે અમેરિકન કંપનીઓ આ પ્રોજેક્ટ માટે એન્જિન સપ્લાય કરવાની આશા રાખી રહી હતી. આ ભાગીદારી ભારતના 'આત્મનિર્ભર ભારત' વિઝનને મજબૂત બનાવશે અને બંને દેશો વચ્ચેના વ્યૂહાત્મક સંબંધોને વધુ ગતિ આપશે.
ભારત હવે સ્વદેશી લડાકુ વિમાનોના નિર્માણ માટે સંપૂર્ણપણે આત્મનિર્ભર બનવાના માર્ગે છે. સંરક્ષણ પ્રધાન રાજનાથ સિંહે ફ્રાન્સની સફ્રાન (Safran) કંપની સાથે સંયુક્ત રીતે 120 KN થ્રસ્ટવાળા શક્તિશાળી જેટ એન્જિનના ઉત્પાદનની પુષ્ટિ કરી છે. આ સોદામાં સૌથી મહત્વની વાત એ છે કે ફ્રાન્સ 100% ટેકનોલોજી ભારતને ટ્રાન્સફર કરશે. આ પગલું અમેરિકા માટે મોટો આંચકો છે, જે આ પ્રોજેક્ટ માટે પોતાના GE-414 એન્જિન વેચવાની આશા રાખી રહ્યું હતું. આ પ્રોજેક્ટનો ખર્ચ આશરે $7 બિલિયન થશે અને તેનાથી ભારતના સંરક્ષણ ક્ષેત્રમાં સ્વદેશી નિર્માણ અને ટેકનોલોજીકલ સ્વતંત્રતાને વેગ મળશે.
ફ્રાન્સ સાથે 100% ટેકનોલોજી ટ્રાન્સફર
ભારતનું સંરક્ષણ સંશોધન અને વિકાસ સંગઠન (DRDO) ફ્રાન્સની જાણીતી કંપની સફ્રાન સાથે મળીને એક અત્યાધુનિક 120 કિલોન્યુટન થ્રસ્ટનું જેટ એન્જિન વિકસાવશે. આ સોદાનો સૌથી મોટો ફાયદો એ છે કે સફ્રાન કંપની આ એન્જિન સંબંધિત 100% ટેકનોલોજી ભારતને ટ્રાન્સફર કરવા સંમત થઈ છે. આનાથી ભારત પોતાના દેશમાં જ એન્જિનનું ડિઝાઇનિંગ, ઉત્પાદન, પરીક્ષણ અને પ્રમાણપત્ર કરી શકશે, જે લાંબા ગાળે ભારતને આ ક્ષેત્રે સંપૂર્ણપણે આત્મનિર્ભર બનાવશે.
અમેરિકાને આંચકો
લાંબા સમયથી, અમેરિકાની કંપનીઓ, ખાસ કરીને જનરલ ઇલેક્ટ્રિક (GE), ભારતના AMCA પ્રોજેક્ટ માટે GE-414 એન્જિન સપ્લાય કરવાની આશા રાખી રહી હતી. પરંતુ ફ્રાન્સ સાથેના આ કરારને કારણે અમેરિકાને એક મોટો આંચકો લાગ્યો છે. ભારતનો આ નિર્ણય અમેરિકાના તાજેતરના ટેરિફ યુદ્ધ અને અન્ય નીતિઓ સામે એક મજબૂત પ્રતિક્રિયા તરીકે પણ જોઈ શકાય છે. જોકે, શરૂઆતના કેટલાક AMCA યુનિટ્સ GE-414 એન્જિન સાથે ઉડાન ભરશે, પરંતુ ભવિષ્યમાં ભારતીય વાયુસેના સંપૂર્ણપણે સ્વદેશી એન્જિન પર નિર્ભર રહેશે.
સંરક્ષણ ક્ષેત્રમાં આત્મનિર્ભરતા
સંરક્ષણ મંત્રી રાજનાથ સિંહે ધ ઇકોનોમિક ટાઇમ્સ વર્લ્ડ લીડર્સ ફોરમમાં આ પ્રોજેક્ટની જાહેરાત કરતાં જણાવ્યું કે, "અમે અમારી પાંચમી પેઢીના ફાઇટર જેટ બનાવવા તરફ આગળ વધ્યા છીએ. અમે ભારતમાં જેટ એન્જિનનું ઉત્પાદન શરૂ કરવા માટે ફ્રેન્ચ કંપની સફ્રાન સાથે મળીને કામ કરવા જઈ રહ્યા છીએ." આ $7 બિલિયનના પ્રોજેક્ટને ટૂંક સમયમાં સુરક્ષા પરની કેબિનેટ સમિતિ (CCS) ની મંજૂરી માટે મોકલવામાં આવશે. આ પગલું ભારતીય સંરક્ષણ ક્ષેત્ર માટે એક ક્રાંતિકારી પરિવર્તન સાબિત થશે, કારણ કે તે લડાકુ વિમાનોના મુખ્ય ઘટક એન્જિન માટે વિદેશી નિર્ભરતાને સમાપ્ત કરશે.
ટોપ સ્ટોરી
ટ્રેન્ડિંગ સમાચાર
