16 વર્ષમાં અમેરિકાએ કેટલા ભારતીયોને પાછા તગેડી મુક્યા? વિદેશ મંત્રાલયે સંસદમાં માહિતી આપી
ગેરકાયદેસર રીતે વિદેશ મોકલનારા એજન્ટો સામે સરકારની કડક કાર્યવાહીની તૈયારી.
India US deportation: વિદેશ મંત્રાલયે (MEA) સંસદમાં માહિતી આપતા જણાવ્યું છે કે છેલ્લા 16 વર્ષમાં અમેરિકાથી 15,564 ભારતીય નાગરિકોને પરત મોકલવામાં આવ્યા છે. મંત્રાલયે લોકસભામાં આ આંકડાઓ રજૂ કર્યા હતા અને જણાવ્યું હતું કે જે નાગરિકોને દેશનિકાલ કરવામાં આવ્યા છે તેમની પૂછપરછ કરવામાં આવી રહી છે કે તેઓ કયા એજન્ટો અથવા કંપનીઓ દ્વારા ગેરકાયદેસર રીતે વિદેશ ગયા હતા. સરકાર આવા નેટવર્ક સામે કડક કાર્યવાહી કરવાની તૈયારી કરી રહી છે.
વિદેશ મંત્રાલયે સ્પષ્ટતા કરી હતી કે અમેરિકામાં ગેરકાયદેસર રીતે રહેતા ભારતીયોને દેશનિકાલ કરવા એ કોઈ નવી વાત નથી. યુએસ સરકાર ઘણા સમયથી આવા લોકોને તેમના દેશમાંથી પરત મોકલી રહી છે અને આ સંખ્યા હજારોમાં છે. મંત્રાલય દ્વારા જાહેર કરવામાં આવેલા આંકડાઓ અનુસાર, વર્ષ 2009 થી 2024 ના અંત સુધીમાં કુલ 15,564 ભારતીયોને અમેરિકાથી દેશનિકાલ કરવામાં આવ્યા હતા. આ વર્ષે 2025 માં (માર્ચ સુધી) વધુ 388 ભારતીયોને પરત મોકલવામાં આવ્યા છે.
વિદેશ મંત્રાલયે દેશનિકાલના કારણો વિશે પણ માહિતી આપી હતી. તેમણે જણાવ્યું હતું કે જે ભારતીય નાગરિકો ગેરકાયદેસર રીતે અમેરિકામાં પ્રવેશ્યા હોય, જેમની વિઝાની મુદત પૂરી થઈ ગઈ હોય અથવા જેઓ કોઈપણ માન્ય દસ્તાવેજ વિના ત્યાં રહેતા હોય તેઓને દેશનિકાલ કરવામાં આવે છે. આ ઉપરાંત, જે લોકો સામે ફોજદારી કેસ નોંધાયેલા હોય તેમને પણ પરત મોકલવામાં આવે છે. આંતરરાષ્ટ્રીય કાયદાઓ મુજબ દરેક દેશ પોતાના ગેરકાયદેસર ઇમિગ્રન્ટ્સને પરત લેવા માટે જવાબદાર છે, પરંતુ આ પ્રક્રિયા રાષ્ટ્રીયતાની ચકાસણી પછી જ પૂર્ણ થાય છે.
ભારત સરકાર આ મામલાને ગંભીરતાથી લઈ રહી છે અને જે લોકો ગેરકાયદેસર રીતે ભારતીય નાગરિકોને વિદેશ મોકલે છે તેવા એજન્ટો અને દલાલો સામે કાર્યવાહી કરવાની યોજના બનાવી રહી છે. મંત્રાલયે જણાવ્યું હતું કે પરત ફરેલા પ્રવાસીઓની પૂછપરછ કરવામાં આવી રહી છે અને તેમની પાસેથી માહિતી મેળવવામાં આવી રહી છે કે તેઓ કયા એજન્ટો, કંપનીઓ અથવા વ્યક્તિઓના સંપર્કમાં આવ્યા હતા જેમણે તેમને ગેરકાયદેસર રીતે વિદેશ મોકલ્યા હતા. સરકાર આવા છેતરપિંડી કરનારા લોકો સામે કાયદેસરની કાર્યવાહી કરશે.
અમેરિકામાં ગેરકાયદેસર ઇમિગ્રન્ટ્સ સામે કાર્યવાહી રાષ્ટ્રપતિ ડોનાલ્ડ ટ્રમ્પના કાર્યકાળ દરમિયાન વધુ તીવ્ર બની હતી અને તે પછીથી દેશનિકાલની સંખ્યામાં વધારો જોવા મળ્યો છે. ભૂતકાળમાં દેશનિકાલ કરાયેલા લોકોને ભારત મોકલતી વખતે હાથ-પગમાં બેડીઓ બાંધવાની ઘટનાઓ પણ સામે આવી હતી, જેના કારણે માનવ અધિકારોના મુદ્દાઓ ઉભા થયા હતા. જો કે, ભારત સરકારે સ્પષ્ટતા કરી હતી કે દેશનિકાલની પ્રક્રિયા આંતરરાષ્ટ્રીય નિયમો અનુસાર જ કરવામાં આવે છે અને આ નીતિ માત્ર ભારતીયો માટે જ નહીં પરંતુ તમામ દેશોના ગેરકાયદેસર વસાહતીઓ માટે સમાન છે.
ટોપ સ્ટોરી
ટ્રેન્ડિંગ સમાચાર
