ગુજરાત વહીવટી તંત્રમાં ધરખમ ફેરફાર: 26 IAS અધિકારીઓની બદલી, સંજીવ કુમાર હવે CMના અગ્ર સચિવ
અવંતિકા સિંઘ હવે GSPC નું સુકાન સંભાળશે. શિક્ષણ અને આરોગ્ય વિભાગમાં નવા ચહેરાઓની એન્ટ્રી. અન્ય મહત્વના વિભાગોમાં થયેલી ઉથલપાથલ.
ગાંધીનગરના સચિવાલયમાં મંગળવારે મોટી હલચલ જોવા મળી હતી. ગુજરાત સરકારે વહીવટી માળખામાં મોટાપાયે સર્જરી કરતા 26 વરિષ્ઠ IAS અધિકારીઓની બદલીના આદેશો જારી કર્યા છે. આ ફેરફારોમાં સૌથી વધુ ચર્ચા મુખ્યમંત્રી કાર્યાલય (CMO) ને લઈને છે. વન અને પર્યાવરણ વિભાગના સંજીવ કુમારને હવે મુખ્યમંત્રીના પ્રિન્સિપાલ સેક્રેટરી (અગ્ર સચિવ) તરીકે નિયુક્ત કરવામાં આવ્યા છે, જ્યારે અવંતિકા સિંઘને CMO માંથી મુક્ત કરી GSPC ની મહત્વની જવાબદારી સોંપવામાં આવી છે.
ગુજરાત સરકાર દ્વારા મંગળવારે વહીવટી તંત્રને વધુ ગતિશીલ બનાવવાના હેતુથી એક મહત્વપૂર્ણ નિર્ણય લેવામાં આવ્યો છે. રાજ્યના સામાન્ય વહીવટ વિભાગ દ્વારા 26 જેટલા સિનિયર સનદી અધિકારીઓ (IAS) ની બદલીના આદેશો કરવામાં આવ્યા છે. આ સમગ્ર ઘટનાક્રમમાં મુખ્યમંત્રી કાર્યાલય (CMO) ના સેટઅપમાં કરવામાં આવેલા ફેરફારો કેન્દ્રસ્થાને રહ્યા છે.
મુખ્યમંત્રી કાર્યાલય (CMO) માં કોનું કદ વધ્યું?
સરકારે CMO ની ટીમમાં નવા ચહેરાઓને સ્થાન આપ્યું છે. 1998 બેચના અનુભવી IAS અધિકારી સંજીવ કુમાર, જેઓ અત્યાર સુધી વન અને પર્યાવરણ વિભાગમાં ફરજ બજાવતા હતા, તેમને હવે મુખ્યમંત્રીના અગ્ર સચિવ (Principal Secretary) તરીકે નિયુક્ત કરવામાં આવ્યા છે. તેમની આ નિમણૂક સાથે જ તેમને ગૃહ વિભાગના અગ્ર સચિવનો વધારાનો ચાર્જ પણ આપવામાં આવ્યો છે, જે દર્શાવે છે કે સરકારનો તેમના પર ભરોસો વધ્યો છે.
આ ઉપરાંત, CMO માં અન્ય બે મહત્વના ફેરફારો થયા છે. ડૉ. વિક્રાંત પાંડેના હોદ્દાનું નામ બદલીને હવે તેમને "મુખ્યમંત્રીના એડિશનલ પ્રિન્સિપાલ સેક્રેટરી" તરીકે ઓળખવામાં આવશે અને સાથે જ માહિતી અને પ્રસારણ વિભાગનો હવાલો પણ સોંપવામાં આવ્યો છે. જ્યારે ડેપ્યુટેશન પરથી પરત ફરેલા અજય કુમારને મુખ્યમંત્રીના સચિવ (Secretary to CM) તરીકેની જવાબદારી સોંપવામાં આવી છે.
અવંતિકા સિંઘની કોર્પોરેટ સેક્ટરમાં એન્ટ્રી
લાંબા સમયથી મુખ્યમંત્રી કાર્યાલયમાં એડિશનલ પ્રિન્સિપાલ સેક્રેટરી તરીકે ફરજ બજાવતા અવંતિકા સિંઘની બદલી એનર્જી અને પેટ્રોકેમિકલ્સ વિભાગ હેઠળ કરવામાં આવી છે. તેમને ગુજરાત સરકારના પ્રતિષ્ઠિત સાહસ ગુજરાત સ્ટેટ પેટ્રોલિયમ કોર્પોરેશન (GSPC) ના મેનેજિંગ ડિરેક્ટર (MD) તરીકે મૂકવામાં આવ્યા છે. આ સાથે તેઓ GSPC LNG લિમિટેડ અને ગુજરાત ગેસ લિમિટેડના MD તરીકેનો વધારાનો હવાલો પણ સંભાળશે.
શિક્ષણ અને આરોગ્ય ક્ષેત્રે નવી નિયુક્તિઓ
નાગરિકોને સીધી સ્પર્શતી સેવાઓમાં પણ ફેરફારો કરાયા છે. સ્ટેટ ટેક્સ કમિશનર તરીકે ફરજ બજાવતા રાજીવ ટોપનોને હવે આરોગ્ય અને પરિવાર કલ્યાણ વિભાગના અગ્ર સચિવ બનાવવામાં આવ્યા છે. શિક્ષણ વિભાગમાં બે ભાગમાં વહેંચણી કરવામાં આવી છે; મુકેશ કુમારને ઉચ્ચ અને તકનીકી શિક્ષણના અગ્ર સચિવ તરીકે, જ્યારે મિલિંદ તોરવણેને પંચાયત વિભાગમાંથી લાવીને પ્રાથમિક અને માધ્યમિક શિક્ષણ વિભાગની જવાબદારી સોંપવામાં આવી છે.
અન્ય મહત્વની બદલીઓ પર એક નજર
આ મેગા ઓપરેશનમાં અન્ય વરિષ્ઠ અધિકારીઓના વિભાગો પણ બદલાયા છે:
ડૉ. અંજુ શર્મા: કૃષિ વિભાગમાંથી બદલી કરીને હવે સામાન્ય વહીવટ વિભાગ (GAD - Personnel) ના અધિક મુખ્ય સચિવ (ACS) તરીકે મુકાયા છે.
રમેશ ચંદ મીના: બંદરો અને વાહનવ્યવહાર વિભાગમાંથી ખસેડીને કૃષિ અને ખેડૂત કલ્યાણ વિભાગના અગ્ર સચિવ બનાવવામાં આવ્યા છે.
અશ્વિની કુમાર: રમતગમત વિભાગમાંથી બદલી કરીને હવે એનર્જી અને પેટ્રોકેમિકલ્સ વિભાગના અગ્ર સચિવ તરીકે નિમણૂક પામ્યા છે.
આરતી કુંવર: નાણા વિભાગમાંથી બદલી કરીને સ્ટેટ ટેક્સના ચીફ કમિશનર (અમદાવાદ) તરીકે મૂકવામાં આવ્યા છે.
રાજકુમાર બેનીવાલ: ગુજરાત મેરીટાઇમ બોર્ડ (GMB) માંથી બદલી કરીને GNFC ના મેનેજિંગ ડિરેક્ટર તરીકે નવી જવાબદારી સોંપાઈ છે.
Before You Go
Electricity Crisis: રાજ્યમાં વીજ સંકટ પર સરકારે તોડ્યું મૌન?
ટોપ સ્ટોરી
ટ્રેન્ડિંગ સમાચાર
