900 ફ્લાઇટ્સ રદ્દ થવા મામલે ઇન્ડિગોની સ્પષ્ટતા, કેન્સલેશન બાદ સામે આવી પ્રથમ પ્રતિક્રિયા
Indigo Flights Cancelled: ઇન્ડિગોએ સ્વીકાર્યું કે, નવા નિયમોના કારણે ક્રૂની જરૂરિયાતોનું ખોટું મૂલ્યાંકન થયું છે
Indigo Flights Cancelled: દેશની સૌથી મોટી એરલાઇન ઇન્ડિગો હાલમાં મોટી સમસ્યાનો સામનો કરી રહ્યું છે. છેલ્લા ચાર દિવસથી ફ્લાઇટ્સમાં સતત વિલંબ અને રદ થવાથી મુસાફરો ગુસ્સે ભરાયા છે. ગુરુવારે જ 550 થી વધુ ફ્લાઇટ્સ રદ કરવામાં આવી હતી, જેના કારણે દિલ્હી, હૈદરાબાદ, ગોવા અને મુંબઈ જેવા મુખ્ય એરપોર્ટ પર અંધાધૂંધીનો માહોલ સર્જાયો હતો. યાત્રીઓનો હંગામો અને આક્રોશ બાદ હવે ઇન્ડિગોએ કેન્સલેશન મામલે પ્રતિક્રિયા આપી છે. ફ્લાઇટ્સ રદ્દ થવા મામલે સ્પષ્ટતા અને ખુલાસો કર્યો છે.
ઇન્ડિગોનો ખુલાસો- શું કરી સ્પષ્ટતા
ઇન્ડિગોએ સ્વીકાર્યું કે, નવા નિયમોના કારણે ક્રૂની જરૂરિયાતોનું ખોટું મૂલ્યાંકન થયું છે. વધુમાં, શિયાળાની ઋતુ, ટેકનિકલ સમસ્યાઓ અને સ્ટાફની અછતને કારણે ફ્લાઇટ્સ પર ભારે અસર પડી છે. ડિરેક્ટોરેટ જનરલ ઓફ સિવિલ એવિએશન (DGCA) ને આપેલા અહેવાલમાં, ઇન્ડિગોએ જણાવ્યું હતું કે તે નવા પાઇલટ-ક્રૂ ડ્યુટી નિયમોને અસ્થાયી રૂપે પાછા ખેંચી રહી છે. નાઇટ ડ્યુટી પહેલા સવારે 5 વાગ્યા સુધી લંબાવવામાં આવી હતી, પરંતુ હવે આ પાછી ખેંચી લેવામાં આવી છે. બે નાઇટ લેન્ડિંગની મર્યાદા પણ અસ્થાયી રૂપે હટાવી લેવામાં આવી છે.
ફ્લાઇટ્સ રદ્દ થયા બાદ યાત્રીઓ પરેશાન
હાલમાં ખાનગી ટીવી ચેનલના અહેવાલો અનુસાર, દિલ્હી એરપોર્ટ પર હજારો બેગ વેરવિખેર જોવા મળી હતી. ઘણા મુસાફરો ફ્લોર પર સૂતા જોવા મળ્યા હતા, અને સૂત્રોચ્ચાર કરવામાં આવ્યા હતા અને અંધાધૂંધીનો માહોલ હતો. દરમિયાન, આજે સવારથી દિલ્હી એરપોર્ટ પરથી 200 થી વધુ ઇન્ડિગો ફ્લાઇટ્સ રદ કરવામાં આવી છે, જેમાં 135 પ્રસ્થાન અને 90 આગમનનો સમાવેશ થાય છે.
દિલ્હી એરપોર્ટ પર મુસાફરોનો જમાવડો
દિલ્હી એરપોર્ટ પર મુસાફરોએ એરલાઇન પર પોતાનો ગુસ્સો ઠાલવ્યો. એક મુસાફરે કહ્યું, "અમે લગ્નમાં જઈ રહ્યા હતા, અને અમારો સામાન ગાયબ છે. 12 કલાક પછી પણ, ઇન્ડિગોએ એક પણ શબ્દ કહ્યું નથી. આ માનસિક ત્રાસ છે." બીજી એક મહિલા મુસાફરે કહ્યું, "14 કલાક થઈ ગયા છે, અને અમને કોઈ ખોરાક કે પાણી મળ્યું નથી. અમે સ્ટાફ સાથે વાત કરવાનો પ્રયાસ કરીએ છીએ, પરંતુ તેમને કોઈ જવાબ મળતો નથી."
હૈદરાબાદ અને ગોવામાં અફરાતફરી
હૈદરાબાદમાં, મુસાફરો એટલા ગુસ્સે હતા કે ઘણા લોકો એર ઇન્ડિયાની ફ્લાઇટની સામે બેસી ગયા અને તેને રોકી દીધી. ત્યાં એક વ્યક્તિએ કહ્યું, "ફ્લાઇટ ગઈકાલે સાંજે 7:30 વાગ્યે શરૂ થવાની હતી, પરંતુ હવે તે 12 કલાક મોડી છે. ઇન્ડિગો કહી રહી છે કે અનિશ્ચિત વિલંબ થઈ શકે છે. આ મજાક છે." ગોવા એરપોર્ટ પર પણ મુસાફરો ગુસ્સે ભરાયા હતા. વીડિયોમાં લોકો ઇન્ડિગોના સ્ટાફ પર બૂમો પાડી રહ્યા હતા, જેના કારણે પોલીસને દરમિયાનગીરી કરવાની ફરજ પડી હતી. દેશના વિવિધ શહેરોમાં ઇન્ડિગોની અસંખ્ય ફ્લાઇટ્સ રદ કરવામાં આવી હતી, જે નીચે મુજબ છે:
મુંબઇ- 118
બેગ્લુરું- 100
હૈદરાબાદ- 90
કોલકત્તા- 35
ચેન્નાઇ- 26
ગોવા- 11
ભોપાલ- 5
દિલ્હી- 225
ઇન્ડિગોએ આજે 400 થી વધુ ફ્લાઇટ્સ રદ કરી છે. ગઈકાલે આ આંકડો 500 હતો. આમ, બે દિવસમાં આ સંખ્યા 900 ને વટાવી ગઈ છે.
ટોપ સ્ટોરી
ટ્રેન્ડિંગ સમાચાર
