Mohali Blast: મોહાલીમાં થયેલા બ્લાસ્ટમાં વપરાયેલ રૉકેટ લોન્ચર મળ્યું, શંકાસ્પદ લોકોની પુછપરછ ચાલુ

પંજાબના મોહાલીમાં ગઈકાલે થયેલા રોકેટ હુમલાના કેસની તપાસ પંજાબ પોલીસ કરી રહી છે. હવે આ હુમલાની માહિતી પણ આપવામાં આવી છે.

રોકેટ હુમલો

Mohali RPG Blast: પંજાબના મોહાલીમાં ગઈકાલે થયેલા રોકેટ હુમલાના કેસની તપાસ પંજાબ પોલીસ કરી રહી છે. હવે આ હુમલાની માહિતી પણ આપવામાં આવી છે. જેમાં કહેવામાં આવ્યું છે કે મોહાલીમાં ઈન્ટેલિજન્સ ઓફિસ પર હુમલાને લઈને ઘણા શંકાસ્પદ લોકોની પૂછપરછ કરવામાં આવી રહી છે. આ સાથે જે લોન્ચરથી આ રોકેટ છોડવામાં આવ્યું હતું તે પણ મળી આવ્યું છે.

પોલીસ પાસેથી મળતી માહિતી મુજબ આ મામલાની ગંભીરતાથી તપાસ કરવામાં આવી રહી છે. આ સાથે પોલીસે RPG લોન્ચર પણ કબજે કર્યું છે. આ મામલે બાકીના શકમંદોની ધરપકડ કરીને પૂછપરછ કરવામાં આવી રહી છે. પોલીસને આશા છે કે ટૂંક સમયમાં જ આરોપીઓની ધરપકડ કરવામાં આવશે.

વિપક્ષી પક્ષોએ પંજાબ સરકાર પર પ્રહારો કર્યાઃ
વિપક્ષી પક્ષોએ મોહાલીમાં પંજાબ પોલીસના ઇન્ટેલિજન્સ યુનિટના હેડક્વાર્ટરમાં થયેલા વિસ્ફોટની નિંદા કરી અને મુખ્યમંત્રી ભગવંત માનને તેમની પ્રાથમિકતાઓને યોગ્ય રીતે નક્કી કરવા અને રાજ્ય દ્વારા સામનો કરવામાં આવતા ગંભીર પડકારો પર ધ્યાન કેન્દ્રિત કરવા જણાવ્યું છે. વિસ્ફોટની ઘટના પર નિવેદન આપતાં, પંજાબ કોંગ્રેસના પ્રમુખ રાજા વાડિંગે મુખ્યમંત્રીને રાજ્ય જે ગંભીર પડકારોનો સામનો કરી રહ્યું છે તેના પર ધ્યાન કેન્દ્રિત કરવા માટે જણાવ્યું હતું. કોંગ્રેસ નેતાએ એક નિવેદનમાં કહ્યું કે, "આમ આદમી પાર્ટીની સરકારનો ઓછો અનુભવ અને ખોટી પ્રાથમિકતાઓનો આતંકવાદીઓ દ્વારા ઉપયોગ કરવામાં આવી રહ્યો છે."

કેપ્ટન અમરિંદર સિંહે ISI નો ઉલ્લેખ કર્યોઃ
પૂર્વ મુખ્યમંત્રી અમરિંદર સિંહે કહ્યું કે, દેશની એકતા અને અખંડિતતા માટે જે શક્તિઓ ખતરારુપ છે પંજાબ સતત તે શક્તિઓના નિશાના પર છે. તેમણે તેનો સામનો કરવા માટે સંકલિત, સમન્વયિત અને મજબૂત પ્રયાસ કરવા હાકલ કરી હતી. સિંહે પાકિસ્તાની ગુપ્તચર એજન્સી ISI ની રચનાઓ વિશે પણ ચેતવણી આપી હતી અને કહ્યું હતું કે, તેણે પંજાબને લઈને પોતાનો ખરાબ ઈરાદાઓ ક્યારેય છોડ્યા નથી અને તેઓ  કોઈપણ તકનો લાભ લેવાનો પ્રયાસ કરશે.

મોહાલીના સેક્ટર 77માં પોલીસ ઈન્ટેલિજન્સ યુનિટના હેડક્વાર્ટરના પરિસરમાં સોમવારે રાત્રે રોકેટ-સંચાલિત ગ્રેનેડથી હુમલો કરવામાં આવ્યો હતો, જેણે બિલ્ડિંગની બારીઓ તોડી નાખી હતી. આ ઘટનાને ગુપ્તચર તંત્રની મોટી નિષ્ફળતા તરીકે જોવામાં આવી રહી છે, કારણ કે આ બિલ્ડિંગમાં રાજ્યની 'કાઉન્ટર ઈન્ટેલિજન્સ વિંગ', સ્પેશિયલ ટાસ્ક ફોર્સ અને કેટલાક અન્ય એકમોની ઓફિસો આવેલી છે.