બંગાળમાં સુવેન્દુ અધિકારી બન્યા મુખ્યમંત્રી, અભિષેક બેનર્જીએ કહ્યું - ‘બંગાળ અને દિલ્હીમાં હવે...’

Suvendu Adhikari CM: TMCનો 30 લાખ મતદારોના નામ કમી કરવાનો આરોપ, કહ્યું- બંગાળ અને દિલ્હીમાં મજબૂત વિપક્ષ બનીશું.

Abhishek Banerjee Slams EC as Suvendu Adhikari Takes Oath as Bengal CM

Source : Twitter

Show Quick Read

Key points generated by AI, verified by newsroom

• સુવેન્દુ અધિકારી પશ્ચિમ બંગાળના પ્રથમ ભાજપ મુખ્યમંત્રી બન્યા.
• TMCના અભિષેક બેનર્જીએ ચૂંટણી પ્રક્રિયામાં ગેરરીતિનો આરોપ લગાવ્યો.
• 30 લાખ મતદારોના નામ ગાયબ અને EVM ગડબડનો દાવો કરાયો.
• TMC બંગાળ અને દિલ્હીમાં મજબૂત વિરોધ પક્ષ તરીકે લડશે.

Suvendu Adhikari CM: પશ્ચિમ બંગાળમાં સત્તા પરિવર્તન થતા જ રાજકીય ગરમાવો આવી ગયો છે. ભાજપના નેતા સુવેન્દુ અધિકારીએ બંગાળના પ્રથમ ભાજપ મુખ્યમંત્રી તરીકે શપથ લીધા છે. ત્યારે બીજી તરફ TMCના રાષ્ટ્રીય મહાસચિવ અભિષેક બેનર્જીએ નવી સરકાર અને ચૂંટણી પ્રક્રિયા પર આકરા પ્રહારો કર્યા છે. તેમણે 30 લાખ મતદારોના નામ ગાયબ હોવાનો અને EVMમાં ગરબડનો આરોપ લગાવ્યો છે. સાથે જ તેમણે સ્પષ્ટ કર્યું છે કે તેમની પાર્ટી બંગાળ અને દિલ્હીમાં એક મજબૂત વિપક્ષ તરીકે ડર્યા વિના લડત આપશે.

કોલકાતાના બ્રિગેડ પરેડ ગ્રાઉન્ડમાં રાજ્યપાલ આર.એન. રવિએ એક ભવ્ય સમારોહમાં સુવેન્દુ અધિકારીને મુખ્યમંત્રી પદના શપથ લેવડાવ્યા હતા. ભાજપ આ જીતને બંગાળમાં નવા રાજકીય યુગની શરૂઆત ગણાવી રહ્યું છે, તો સામે પક્ષે તૃણમૂલ કોંગ્રેસે ચૂંટણીની નિષ્પક્ષતા સામે ગંભીર સવાલો ઉભા કર્યા છે. ચૂંટણી પરિણામો બાદ પોતાની પહેલી જ પ્રતિક્રિયા આપતા અભિષેક બેનર્જીએ ચૂંટણી પંચ અને સરકારી એજન્સીઓ પર પક્ષપાતનો આરોપ લગાવ્યો છે. તેમનો સનસનીખેજ દાવો છે કે આ ચૂંટણીમાં લગભગ 30 લાખ જેટલા સાચા મતદારોને જાણીજોઈને મતદાર યાદીમાંથી બહાર રાખવામાં આવ્યા હતા.

અભિષેક બેનર્જીએ એમ પણ કહ્યું કે, જે લોકશાહી સંસ્થાઓએ તટસ્થ રીતે કામ કરવાનું હતું, તેમની ભૂમિકા એકદમ શંકાસ્પદ રહી છે. મતગણતરીની પ્રક્રિયાથી લઈને EVMના સંચાલન અને હેરફેર સુધીની ઘણી ઘટનાઓએ લોકોના મનમાં શંકાના બીજ વાવ્યા છે. તેમણે કંટ્રોલ યુનિટ્સના આંકડા મેચ ન થતા હોવાનો પણ આરોપ લગાવ્યો છે. આ શંકાઓ દૂર કરવા તેમણે માંગ કરી છે કે મતગણતરી કેન્દ્રોના CCTV ફૂટેજ જાહેર કરવામાં આવે તેમજ VVPAT સ્લિપની પણ પારદર્શક રીતે ગણતરી થાય. તેમનું કહેવું છે કે જો આમ થશે તો જ સત્ય બહાર આવશે અને લોકોનો ચૂંટણી પંચ પરથી ઉઠી ગયેલો વિશ્વાસ પાછો ફરી શકશે.

We have fought an extremely difficult election where nearly 30 lakh genuine voters were allegedly disenfranchised from the electoral rolls. Throughout this entire process, we witnessed what we believe was deeply partisan conduct by several government agencies as well as the…

— Abhishek Banerjee (@abhishekaitc) May 9, 2026

આ ઉપરાંત, ચૂંટણી પછી રાજ્યમાં થઈ રહેલી હિંસા અંગે પણ તેમણે ઉંડી ચિંતા વ્યક્ત કરી હતી. તેમણે જણાવ્યું કે TMCની ઓફિસો પર હુમલા થઈ રહ્યા છે, કાર્યકરોને ડરાવવામાં આવી રહ્યા છે અને ઘણા સમર્થકોને તો તેમના ઘર છોડવા માટે પણ મજબૂર કરવામાં આવ્યા છે. લોકશાહીમાં કોઈપણ કાર્યકરને તેની રાજકીય વિચારધારા અને સુરક્ષા વચ્ચે પસંદગી કરવાની ફરજ ન પડવી જોઈએ.

અંતમાં તેમણે સ્પષ્ટ જાહેરાત કરી કે મમતા બેનર્જીના નેતૃત્વમાં તેમની પાર્ટી લોકશાહી, બંધારણીય મૂલ્યો અને લોકોના અધિકારોના રક્ષણ માટે કોઈ પણ જાતના ડર કે સમાધાન વગર લડતી રહેશે. દિલ્હી અને બંગાળ બંને જગ્યાએ TMC મજબૂત અને અવાજ ઉઠાવનાર વિપક્ષની ભૂમિકા ભજવશે. તેમણે તમામ કાર્યકરો અને સમર્થકોને એક થઈને મજબૂતીથી ઉભા રહેવા અપીલ કરી છે અને ખાતરી આપી છે કે જો કોઈ પણ કાર્યકરને ચૂંટણી પછીની હિંસા કે ધમકીઓનો સામનો કરવો પડે, તો તેઓ સીધો તેમનો સંપર્ક કરે. પાર્ટી દરેક કાર્યકરની સુરક્ષા માટે તમામ કાનૂની અને લોકશાહી પગલાં લેશે.