Bihar Elections 2025: સાથી પક્ષે જ NDA સામે બાંયો ચડાવી, એનડીએ સામે 53 ઉમેદવારો ઉભા રાખ્યા
Om Prakash Rajbhar Bihar election: ઉત્તર પ્રદેશના રાજકારણમાં એક મહત્ત્વનો ચહેરો ગણાતા અને NDA ના સહયોગી ઓમ પ્રકાશ રાજભરે બિહારની ચૂંટણીમાં ગઠબંધનના સમીકરણોને હચમચાવી દીધા છે.
ઉત્તર પ્રદેશમાં NDA ના મહત્ત્વપૂર્ણ સાથી અને યોગી આદિત્યનાથ સરકારમાં મંત્રી, સુહેલદેવ ભારતીય સમાજ પાર્ટી (SBSP) ના પ્રમુખ ઓમ પ્રકાશ રાજભરે બિહાર વિધાનસભા ચૂંટણી 2025 માં બળવાખોર વલણ અપનાવ્યું છે. ગઠબંધન ભાગીદાર હોવા છતાં, SBSP એ NDA સામે જ 53 બેઠકો પર પોતાના ઉમેદવારોની પ્રથમ યાદી જાહેર કરી દીધી છે. પાર્ટીના રાષ્ટ્રીય મહાસચિવ અરવિંદ રાજભરે જણાવ્યું કે NDA પાસેથી બેઠકોની માંગણી કરવા છતાં એક પણ બેઠક ન મળતા આ નિર્ણય લેવામાં આવ્યો છે. SBSP હવે કુલ 132 બેઠકો પર ચૂંટણી લડવાની તૈયારીમાં છે. રાજભરે ભાજપ પર ગઠબંધનના સિદ્ધાંતોનું પાલન ન કરવાનો આરોપ લગાવતા દાવો કર્યો છે કે આ નિર્ણયના કારણે NDA ને ઓછામાં ઓછી 50 બેઠકોનું નુકસાન થઈ શકે છે.
બિહારમાં રાજભરનો વિદ્રોહ: બેઠકો ન મળતા એકલા લડવાનો નિર્ણય
ઉત્તર પ્રદેશના રાજકારણમાં એક મહત્ત્વનો ચહેરો ગણાતા અને NDA ના સહયોગી ઓમ પ્રકાશ રાજભરે બિહારની ચૂંટણીમાં ગઠબંધનના સમીકરણોને હચમચાવી દીધા છે. તેમની પાર્ટી સુહેલદેવ ભારતીય સમાજ પાર્ટી (SBSP) એ સ્પષ્ટ કર્યું છે કે તેમને NDA પાસેથી એક પણ બેઠક ન મળતા, તેઓ હવે બિહારમાં સ્વતંત્ર રીતે ચૂંટણી લડશે.
SBSP ના રાષ્ટ્રીય મહાસચિવ અરવિંદ રાજભરે આ નિર્ણયની પુષ્ટિ કરતાં જણાવ્યું કે તેમની પાર્ટીના કાર્યકરો લાંબા સમયથી ચૂંટણીની તૈયારી કરી રહ્યા હતા, પરંતુ ગઠબંધનમાં તેમને સ્થાન ન મળ્યું. રાજભરે ભાજપ પર આક્ષેપ કર્યો છે કે તેમણે ગઠબંધનના સિદ્ધાંતોનું પાલન કરવામાં નિષ્ફળતા દર્શાવી છે. આ બળવાખોર વલણના ભાગરૂપે, SBSP એ પ્રથમ તબક્કા માટે 53 બેઠકો પર પોતાના ઉમેદવારો જાહેર કરી દીધા છે.
કુલ 132 બેઠકો પર ચૂંટણી લડવાનો મક્કમ ઇરાદો
પાર્ટીના નેતૃત્વએ પોતાનો ઇરાદો સ્પષ્ટ કરતાં જણાવ્યું છે કે SBSP હવે માત્ર 53 બેઠકો સુધી સીમિત નહીં રહે, પરંતુ કુલ 132 બેઠકો પર ઉમેદવારો ઉભા રાખશે. પાર્ટીના પ્રવક્તા અરુણ રાજભરે જણાવ્યું કે આ નિર્ણય રાજ્ય નેતૃત્વ તરફથી મળેલા નકારાત્મક પ્રતિસાદ ને કારણે લેવામાં આવ્યો છે.
રાજભરે દાવો કર્યો છે કે NDA ને આ વિદ્રોહનું નુકસાન સહન કરવું પડશે અને ગઠબંધન ઓછામાં ઓછી 50 બેઠકો ગુમાવશે. તેમણે ઉમેર્યું કે પાર્ટી અન્ય દળો સાથે મળીને એક નવો મોરચો બનાવવાની તૈયારીમાં છે, જેની જાહેરાત ટૂંક સમયમાં કરવામાં આવશે.
ઉલ્લેખનીય છે કે NDA એ બિહાર વિધાનસભા માટે બેઠકોની વહેંચણીને અંતિમ સ્વરૂપ આપ્યું છે, જે મુજબ ભાજપ અને JD(U) દરેક 101 બેઠકો, લોક જનશક્તિ પાર્ટી (રામવિલાસ) 29 બેઠકો, અને RLM તથા હિન્દુસ્તાની અવમ મોરચા (HAM) ને છ-છ બેઠકો પર ચૂંટણી લડશે. રાજભરનું આ પગલું આ નિર્ધારિત બેઠક વહેંચણીમાં એક નવો પડકાર ઊભો કરી શકે છે.
ટોપ સ્ટોરી
ટ્રેન્ડિંગ સમાચાર
