ઈરાન પર અમેરિકી હુમલા બાદ PM મોદીની પ્રથમ પ્રતિક્રિયા: ઈરાનના રાષ્ટ્રપતિ સાથે વાત કરીને કહ્યું કે રાજદ્વારી....
Iran Israel war: વડાપ્રધાન મોદીએ ઈરાનના રાષ્ટ્રપતિ પેઝેશ્કિયાન સાથે ફોન પર કરી ચર્ચા, મધ્ય પૂર્વમાં શાંતિ અને સુરક્ષા પુનઃસ્થાપિત કરવા હાકલ; અમેરિકી હુમલા બાદ વૈશ્વિક ચિંતા વધી.
- ઈરાન પર અમેરિકી હુમલા બાદ PM મોદીએ ઈરાનના રાષ્ટ્રપતિ મસૂદ પેઝેશ્કિયાન સાથે ફોન પર વાતચીત કરી.
- PM મોદીએ તાત્કાલિક તણાવ ઘટાડવા, રાજદ્વારી માધ્યમથી ઉકેલ લાવવા અને પ્રાદેશિક શાંતિ પુનઃસ્થાપિત કરવા અપીલ કરી.
- ભારતે હંમેશા વાતચીત અને રાજદ્વારી પ્રયાસોને કોઈપણ કટોકટીના ઉકેલ તરીકે ગણાવ્યા છે.
- અમેરિકાએ ઈરાનના ત્રણ પરમાણુ કેન્દ્રો પર હુમલો કર્યો, જેના પરિણામો માટે ઈરાને અમેરિકાને જવાબદાર ઠેરવ્યું.
- યુદ્ધ વધવાથી ભારતના પશ્ચિમ એશિયાઈ દેશો સાથેના વેપાર પર મોટી અસર થઈ શકે છે.
PM Modi: મધ્ય પૂર્વમાં ચાલી રહેલા તીવ્ર સંઘર્ષ અને ઈરાન પર અમેરિકાના તાજેતરના હુમલા બાદ, ભારતના પ્રધાનમંત્રી નરેન્દ્ર મોદીએ ઈરાનના નવા ચૂંટાયેલા રાષ્ટ્રપતિ મસૂદ પેઝેશ્કિયાન સાથે ફોન પર વિસ્તૃત વાતચીત કરી હતી. પીએમ મોદીએ વર્તમાન પરિસ્થિતિ અંગે ગંભીર ચિંતા વ્યક્ત કરી અને તાત્કાલિક તણાવ ઘટાડવા માટે તમામ બાબતોને રાજદ્વારી માધ્યમથી ઉકેલવા તથા પ્રાદેશિક શાંતિ અને સુરક્ષા પુનઃસ્થાપિત કરવા માટે અપીલ કરી હતી.
વડાપ્રધાન મોદીએ X (અગાઉ ટ્વિટર) પર પોસ્ટ કરીને ઇઝરાયેલ અને ઈરાન બંનેને તણાવ ઘટાડવા અને પરસ્પર વાટાઘાટો દ્વારા માર્ગ શોધવા માટે હાકલ કરી હતી. તેમણે ભારપૂર્વક જણાવ્યું કે, ભારત હંમેશા એવું માને છે કે વાતચીત અને રાજદ્વારી પ્રયાસો જ કોઈપણ કટોકટીનો શ્રેષ્ઠ ઉકેલ છે. પીએમ મોદીની ઈરાની રાષ્ટ્રપતિ સાથેની આ વાતચીત એવા સમયે થઈ છે જ્યારે અમેરિકા દ્વારા ઈરાનમાં ત્રણ પરમાણુ સ્થળો પર બોમ્બમારો કરવામાં આવ્યો છે, અને સમગ્ર વિશ્વ મધ્ય પૂર્વની ભયાવહ પરિસ્થિતિ પર નજર રાખી રહ્યું છે.
આ સંઘર્ષ વધુ વધવાથી ભારતના પશ્ચિમ એશિયાઈ દેશો – જેમાં ઈરાક, જોર્ડન, લેબનોન, સીરિયા અને યમનનો સમાવેશ થાય છે – સાથેના વેપાર સંબંધો પર મોટી અસર થવાની શક્યતા છે. અમેરિકાએ રવિવારે (જૂન 22, 2025) વહેલી સવારે ઈરાનના ત્રણ મહત્વપૂર્ણ પરમાણુ કેન્દ્રો, ફોર્ડો, નતાન્ઝ અને ઇસ્ફહાન પર હુમલો કર્યો હતો. આ હુમલાનો મુખ્ય ઉદ્દેશ્ય ઈરાનના પરમાણુ કાર્યક્રમને રોકવાનો હતો, જે આંતરરાષ્ટ્રીય સ્તરે લાંબા સમયથી ચિંતાનો વિષય રહ્યો છે.
બીજી તરફ, ઈરાનના વિદેશ મંત્રાલયે આ હુમલા બાદ આક્રમક પ્રતિક્રિયા આપી છે. વિદેશ પ્રધાન અબ્બાસ અરાઘચીએ જણાવ્યું કે, પરમાણુ સ્થળો પરના હુમલા પછી અમેરિકાએ પોતે જ ઈરાન સામે એક ખતરનાક યુદ્ધ શરૂ કર્યું છે. તેમણે ભારપૂર્વક કહ્યું કે, અમેરિકા તેના પરમાણુ સ્થળો પરના હુમલાના પરિણામો માટે સંપૂર્ણપણે જવાબદાર છે. અરાઘચીએ ઉમેર્યું કે, "એવી કોઈ લક્ષ્મણ રેખા બાકી નથી, જેને અમેરિકાએ પાર ન કરી હોય," જે દર્શાવે છે કે ઈરાન આ હુમલાને અત્યંત ગંભીરતાથી લઈ રહ્યું છે અને તેના પ્રત્યાઘાતો આવનારા સમયમાં જોવા મળી શકે છે.
ટોપ સ્ટોરી
ટ્રેન્ડિંગ સમાચાર
