ઉત્તરાખંડમાં યુનિફોર્મ સિવિલ કોડ આજથી લાગુ, બન્યું દેશનું પ્રથમ રાજ્ય, જાણો CM ધામીએ શું કહ્યું ? 

ઉત્તરાખંડમાં યુનિફોર્મ સિવિલ કોડની સૂચના જારી કર્યા બાદ મુખ્યમંત્રી પુષ્કર સિંહ ધામીએ કહ્યું કે આ એક ઐતિહાસિક પગલું છે.

મુખ્યમંત્રી પુષ્કરસિંહ ધામી

Source : PTI

UCC In Uttarakhand: ઉત્તરાખંડમાં યુનિફોર્મ સિવિલ કોડની સૂચના જારી કર્યા બાદ મુખ્યમંત્રી પુષ્કર સિંહ ધામીએ કહ્યું કે આ એક ઐતિહાસિક પગલું છે. મુખ્યમંત્રીએ કહ્યું કે આ કાયદા માટે રાજ્ય સરકારના અધિકારીઓએ દિવસ-રાત મહેનત કરી છે. બધાએ સંકલનથી કામ કર્યું. મુખ્ય સેવક સદન ખાતે આયોજિત કાર્યક્રમમાં સીએમ ધામીએ કહ્યું કે આજનો દિવસ માત્ર આપણા રાજ્ય માટે જ નહીં પરંતુ સમગ્ર દેશ માટે ઐતિહાસિક દિવસ છે. સમાનતા પ્રસ્થાપિત કરવાના ઉદ્દેશ્ય સાથે બનાવવામાં આવેલ યુસીસીનો અમલ કરવામાં આવી રહ્યો છે.  ઉત્તરાખંડે આજે ઈતિહાસ રચ્યો  છે. યુનિફોર્મ સિવિલ કોડ (UCC) લાગુ કરનાર ઉત્તરાખંડ પ્રથમ રાજ્ય બન્યું છે. 

તેમણે કહ્યું કે ઉત્તરાખંડમાં UCC લાગુ કરીને બાબા સાહેબ ભીમરાવ આંબેડકર સહિત બંધારણ સભાના તમામ સભ્યોને શ્રદ્ધાંજલિ આપી રહ્યા છે. સીએમએ કહ્યું કે UCCના અમલીકરણથી ઉત્તરાખંડના તમામ રહેવાસીઓના અધિકાર સમાન બની ગયા છે. હવે તમામ ધર્મની મહિલાઓ માટે સંપૂર્ણ કાયદો છે. સીએમએ કહ્યું કે આજે આ ક્ષણ મારા માટે ખૂબ જ ભાવુક છે. આ કાયદાના અમલ સાથે જ હલાલા, ઇદ્દત, બહુવિવાહ, ટ્રિપલ તલાક પર સંપૂર્ણ પ્રતિબંધ લાગશે.

આ કોઈ ધર્મ કે સંપ્રદાય વિરુદ્ધ નથી-ધામી 

મુખ્યમંત્રીએ કહ્યું કે સમાન નાગરિક સંહિતા કોઈ ધર્મ કે સંપ્રદાયની વિરુદ્ધ નથી. આમાં કોઈને નિશાન બનાવવાનું કોઈ કારણ નથી. સમાજમાં સમાનતા લાવવાનો આ કાનૂની પ્રયાસ છે. આમાં કોઈ રિવાજ બદલવામાં આવ્યો નથી પરંતુ ખરાબ પ્રથા દૂર કરવામાં આવી છે.

તમને જણાવી દઈએ કે ઉત્તરાખંડમાં UCCનો અમલ એ રાજ્યમાં 2022ની વિધાનસભા ચૂંટણી દરમિયાન સત્તાધારી ભારતીય જનતા પાર્ટી (BJP) દ્વારા કરવામાં આવેલા મોટા વચનોમાંનું એક હતું. માર્ચ 2022 માં ફરીથી સત્તા સંભાળ્યા પછી મુખ્ય પ્રધાન પુષ્કર સિંહ ધામીના નેતૃત્વમાં કેબિનેટની પ્રથમ બેઠકમાં, UCC પ્રસ્તાવને મંજૂરી આપવામાં આવી હતી અને તેનો ડ્રાફ્ટ તૈયાર કરવા માટે નિષ્ણાત સમિતિની રચનાને મંજૂરી આપવામાં આવી હતી.

જસ્ટિસ દેસાઈની અધ્યક્ષતામાં 27 મે, 2022ના રોજ એક વિશેષજ્ઞ સમિતિની રચના કરવામાં આવી હતી, જેમણે લગભગ દોઢ વર્ષની મહેનત બાદ 2 ફેબ્રુઆરી, 2024ના રોજ રાજ્ય સરકારને ચાર સંસ્કરણોમાં તૈયાર કરાયેલ તેનો વિગતવાર અહેવાલ સુપરત કર્યો હતો. તેના આધારે, 7 ફેબ્રુઆરી, 2024 ના રોજ રાજ્ય વિધાનસભાના વિશેષ સત્રમાં UCC બિલ પસાર કરવામાં આવ્યું હતું. એક મહિના પછી, 12 માર્ચ, 2024 ના રોજ, રાષ્ટ્રપતિએ પણ તેને મંજૂરી આપી. યુસીસી એક્ટના અમલ પછી, ભૂતપૂર્વ મુખ્ય સચિવ શત્રુઘ્ન સિંહની અધ્યક્ષતામાં રચાયેલી સમિતિએ તેના અમલીકરણ માટે નિયમો તૈયાર કર્યા હતા, જેને તાજેતરમાં રાજ્ય કેબિનેટ દ્વારા મંજૂરી આપવામાં આવી હતી.