મહેસાણા જિલ્લામાં ₹23 લાખનું મનરેગા કૌભાંડ, કાગળ પર કામ બતાવી કોન્ટ્રાક્ટરે ઉપાડી લીધા નાણાં
મહેસાણા જિલ્લાના ચાચરીયા ગામમાં મનરેગા યોજના અંતર્ગત હાથ ધરવામાં આવેલા માટીકામના કામોમાં એક મોટા કૌભાંડનો આક્ષેપ કરવામાં આવ્યો છે.
MGNREGA scam Mehsana: મહેસાણા જિલ્લાના ચાચરીયા ગામમાં મનરેગા યોજના હેઠળ ₹23 લાખના કૌભાંડનો પર્દાફાશ થયો છે. આરોપ છે કે બોગસ જોબકાર્ડ બનાવીને અને માત્ર કાગળ પર માટીકામ દર્શાવીને આ કૌભાંડ આચરવામાં આવ્યું છે. સ્થળ પર કોઈ કામ થયું નથી, માત્ર એક તખ્તી લગાવી દેવામાં આવી હતી. આ કૌભાંડની પોલ ત્યારે ખુલી જ્યારે લોકપાલે રૂબરૂ સ્થળ તપાસ કરી. તપાસ દરમિયાન એ પણ સામે આવ્યું છે કે કોન્ટ્રાક્ટરે શ્રમિકોના બેંક એકાઉન્ટ ખોલાવીને તેમના ATM કાર્ડ અને PIN નંબર મેળવી લીધા હતા અને લાખો રૂપિયા જાતે જ ઉપાડી લીધા હતા. આ મામલે કડક કાર્યવાહીની ભલામણ કરવામાં આવી છે.
કૌભાંડનો પર્દાફાશ: ચાચરીયા ગામમાં મનરેગા યોજનાની પોલ ખુલી
મહેસાણા જિલ્લાના ચાચરીયા ગામમાં મનરેગા યોજના અંતર્ગત હાથ ધરવામાં આવેલા માટીકામના કામોમાં એક મોટા કૌભાંડનો આક્ષેપ કરવામાં આવ્યો છે. સરકારી ચોપડે લાખો રૂપિયાના કામો થયા હોવાનું દર્શાવવામાં આવ્યું હતું, પરંતુ વાસ્તવિકતા કંઈક જુદી જ હતી.
કાગળ પર કામ, સ્થળ પર માત્ર તખ્તી
આ કૌભાંડનો મુખ્ય મુદ્દો એ છે કે મનરેગા યોજના હેઠળ જે કામો થયા હોવાનું કાગળ પર બતાવવામાં આવ્યું છે, તે સ્થળ પર કોઈ કામ થયું જ નથી. તંત્ર દ્વારા માત્ર એક તખ્તી લગાવીને કામ થયાનો દાવો કરવામાં આવ્યો હતો. કેટલીક જગ્યાએ તો આ તખ્તીઓ પણ ઝાડી-ઝાંખરામાં છુપાવેલી જોવા મળી હતી.
સમગ્ર કૌભાંડનો ભાંડો ત્યારે ફૂટ્યો જ્યારે લોકપાલે સ્થળ પર જઈને રૂબરૂ તપાસ હાથ ધરી. તપાસમાં જાણવા મળ્યું કે પાંચ જેટલા માટીકામના કામો થયા વગર જ લાખો રૂપિયાની ચૂકવણી કરી દેવામાં આવી હતી.
બેંક એકાઉન્ટ ખોલાવી, ATM કાર્ડથી પૈસા ઉપાડ્યા
આ કૌભાંડમાં સૌથી ચોંકાવનારી વાત એ છે કે કૌભાંડ આચરનારાઓએ બોગસ જોબકાર્ડ બનાવીને શ્રમિકોના નામે બેંક એકાઉન્ટ ખોલાવ્યા હતા. ત્યારબાદ તેમણે શ્રમિકોના ATM કાર્ડ અને PIN નંબર મેળવીને આ બેંક એકાઉન્ટમાંથી સીધા જ નાણાં ઉપાડી લીધા હતા. સરકારી ચોપડે કુલ 50 શ્રમિકોના નામ હતા, પરંતુ જ્યારે લોકપાલ દ્વારા તેમને તપાસ માટે બોલાવવામાં આવ્યા, ત્યારે માત્ર 6 શ્રમિકો જ હાજર રહ્યા હતા.
આ મામલે લોકપાલે રાજ્યકક્ષાએથી વિશેષ તપાસ સમિતિ બનાવીને કડક કાર્યવાહીની ભલામણ કરી છે. જોકે, આ મુદ્દે જિલ્લા કે તાલુકા પંચાયતના કોઈ પણ અધિકારી કેમેરા સામે કંઈ પણ કહેવા માટે તૈયાર નથી. લોકપાલે પણ જણાવ્યું છે કે તપાસ ચાલુ છે અને તેનો અહેવાલ રાજ્ય સરકારને મોકલવામાં આવ્યો છે.
ટોપ સ્ટોરી
ટ્રેન્ડિંગ સમાચાર
