Vadodara Rain: વડોદરામાં ત્રાટક્યું મીની વાવાઝોડું, સુસવાટા મારતા પવન અને કાળા ડિબાંગ વાદળો સાથે કમોસમી વરસાદ, ખેડૂતો ચિંતિત
Vadodara Rain: હવામાન વિભાગની આગાહી મુજબ બન્યું વાતાવરણ, શિનોર ખેતી પ્રધાન તાલુકામાં એરંડા, કપાસ, કેળ, આંબાવાડીયા જેવા પાક બરબાદ થવાનો ભય.
Vadodara weather today: હવામાન વિભાગ દ્વારા ગુજરાતમાં કમોસમી વરસાદ અને ભારે પવનની આગાહી કરવામાં આવી હતી, તે મુજબ વડોદરા જિલ્લાના કરજણ અને શિનોર તાલુકાના વાતાવરણમાં અચાનક મોટો પલટો આવ્યો છે. બપોર બાદ આ વિસ્તારોમાં સુસવાટા મારતા ભારે પવનો ફૂંકાવા લાગ્યા હતા અને આકાશ કાળા ડિબાંગ વાદળોથી ઘેરાઈ ગયું હતું. ત્યારબાદ ભારે પવન સાથે કમોસમી વરસાદ પડ્યો છે. વડોદરામાં જાણે મીની વાવાઝોડું ત્રાટક્યું હોય તેવી સ્થિતિ હાલ જોવા મળી રહી છે.
કાળા ડિબાંગ જેવા વાદળો અને ભારે પવનને જોઈને ખેડૂતોના જીવ તાળવે ચોંટી ગયા છે. શિનોર તાલુકો મુખ્યત્વે ખેતી પર નિર્ભર ખેતી પ્રધાન તાલુકો છે, અને અહીંના ખેડૂતો ઉનાળુ પાક લઈને બેઠા છે.
જો હવામાન વિભાગની આગાહી પ્રમાણે મધ્ય ગુજરાતના વડોદરા સહિતના તાલુકાઓમાં ભારે પવન અને વરસાદ વરસે, તો ખેડૂતોના ઉભા પાકને વ્યાપક નુકસાન થવાની ભીતિ સેવાઈ રહી છે. ખાસ કરીને એરંડા, કપાસ, કેળ, અને આંબાવાડીયા કરતા ખેડૂતોને મોટો ફટકો પડી શકે છે અને તેમના પાક બરબાદ થઈ જાય તેવી શક્યતા છે.
ભારે પવન સાથે વરસાદ આવવાથી પાક જમીનદોસ્ત થઈ શકે છે, કેળાના પાકને ભારે નુકસાન થઈ શકે છે અને આંબાવાડીયામાં ફળોને પણ નુકસાન થઈ શકે છે.
હાલ વાતાવરણ તંગ બન્યું છે અને જો આગાહી મુજબ ભારે વરસાદ શરૂ થશે, તો આ વિસ્તારમાં 'ભુક્કા બોલાવે' તેવી પરિસ્થિતિ સર્જાઈ શકે છે, જેનાથી ખેડૂતોની મહેનત પર પાણી ફરી વળશે. ખેડૂતો હાલ ચિંતિત છે અને ભગવાનને પાકને નુકસાન ન થાય તે માટે પ્રાર્થના કરી રહ્યા છે.
રાજ્યમાં આગામી ૫ દિવસ વીજળીના કડાકા-ભડાકા અને ભારે પવન સાથે કમોસમી વરસાદની આગાહી
ગુજરાતમાં ઉનાળાના માહોલ વચ્ચે અચાનક વાતાવરણમાં આવેલા પલટા અને કમોસમી વરસાદનો દોર આગામી પાંચ દિવસ સુધી યથાવત રહેવાની હવામાન વિભાગે આગાહી કરી છે. રાજ્યના અનેક જિલ્લાઓમાં વીજળીના કડાકા-ભડાકા, ગાજવીજ, ભારે પવન અને બરફના કરા સાથે કમોસમી વરસાદ વરસી શકે છે.
આજે (૫ મે) ક્યાં ક્યાં વરસાદની આગાહી?
હવામાન વિભાગની આગાહી મુજબ, આજે રાજ્યમાં વીજળીના કડાકા-ભડાકા અને ગાજવીજ સાથે ભારે વરસાદની શક્યતા છે. કેટલાક જિલ્લાઓમાં કરા પડવાની પણ આગાહી છે, જેને લઈને ઓરેન્જ એલર્ટ જારી કરવામાં આવ્યું છે.
- ઓરેન્જ એલર્ટ (વરસાદ અને કરા): કચ્છ, બનાસકાંઠા, પાટણ, સાબરકાંઠા, મહેસાણા, અરવલ્લી, મહીસાગર, પંચમહાલ, દાહોદ, મોરબી અને રાજકોટ.
- ભારે પવન ગાજવીજ સાથે વરસાદ: જામનગર, જૂનાગઢ, ગીર સોમનાથ, દ્વારકા, પોરબંદર, અમરેલી, ભાવનગર, બોટાદ, સુરેન્દ્રનગર, અમદાવાદ, ગાંધીનગર, ખેડા, વડોદરા, છોટા ઉદેપુર, સુરત, તાપી, નવસારી, ડાંગ, વલસાડ, દમણ અને દાદરાનગર હવેલી.
આવતીકાલે (૬ મે) ક્યાં ક્યાં વરસાદની આગાહી?
આવતીકાલે પણ રાજ્યમાં કમોસમી વરસાદ અને વાવાઝોડાનો માહોલ યથાવત રહેશે. કરા સાથે માવઠાની આગાહી ધરાવતા જિલ્લાઓ માટે ઓરેન્જ એલર્ટ જારી કરાયું છે.
- ઓરેન્જ એલર્ટ (વરસાદ અને કરા): કચ્છ, બનાસકાંઠા, પાટણ, સાબરકાંઠા, મહેસાણા, અરવલ્લી, મહીસાગર, પંચમહાલ, આણંદ, ભરૂચ, નર્મદા, દાહોદ, મોરબી અને રાજકોટ. (નોંધ: આણંદ, ભરૂચ, નર્મદા જિલ્લાનો પણ આવતીકાલના ઓરેન્જ એલર્ટમાં સમાવેશ કરાયો છે).
- ભારે પવન ગાજવીજ સાથે વરસાદ: જામનગર, જૂનાગઢ, ગીર સોમનાથ, દ્વારકા, પોરબંદર, અમરેલી, ભાવનગર, બોટાદ, સુરેન્દ્રનગર, અમદાવાદ, ગાંધીનગર, ખેડા, વડોદરા, છોટા ઉદેપુર, સુરત, તાપી, નવસારી, ડાંગ, વલસાડ, દમણ અને દાદરાનગર હવેલી.
ટોપ સ્ટોરી
ટ્રેન્ડિંગ સમાચાર
