મારુતિની નવી SUV Victorisની કિંમતો જાહેર: ADAS અને 5 સ્ટાર સેફ્ટી રેટિંગ સાથે કુલ 21 વેરિઅન્ટ્સ બજારમાં મળશે

₹10.49 લાખથી શરૂ થતી આ કાર હ્યુન્ડાઇ ક્રેટા અને ટાટા નેક્સનને આપશે ટક્કર, જાણો તમામ વેરિઅન્ટની કિંમતો.

મારુતિની નવી SUV Victoriisની કિંમતો જાહેર

દેશની અગ્રણી કાર નિર્માતા કંપની મારુતિ સુઝુકીએ તાજેતરમાં તેની નવી SUV Victoris ની કિંમતો સત્તાવાર રીતે જાહેર કરી છે. 3 સપ્ટેમ્બરના રોજ રજૂ થયેલી આ કારનું વેચાણ 22 સપ્ટેમ્બરથી શરૂ થશે.

મારુતિ સુઝુકી વિક્ટોરિસ ને કુલ 3 પાવરટ્રેન વિકલ્પો સાથે લોન્ચ કરવામાં આવી છે, જેમાં 1.5 લિટર પેટ્રોલ એન્જિન સાથે માઈલ્ડ હાઈબ્રિડ, સ્ટ્રોંગ હાઈબ્રિડ, અને CNG નો સમાવેશ થાય છે. આ વિવિધ એન્જિન વિકલ્પો સાથે, આ કાર LXI, VXI, ZXI, ZXI (O), ZXI+ અને ZXI+ (O) જેવા કુલ 6 મુખ્ય વેરિઅન્ટમાં ઉપલબ્ધ છે, જે કુલ 21 અલગ-અલગ રૂપરેખામાં ઉપલબ્ધ થશે.

આ કારની એક્સ-શોરૂમ કિંમત ₹10,49,900 થી શરૂ થઈને તેના ટોપ મોડેલની કિંમત ₹19,98,900 સુધી પહોંચે છે. CNG વેરિઅન્ટની કિંમત ₹11,49,900 થી ₹14,56,900 સુધીની છે, જે તેને ગ્રાહકો માટે વધુ સસ્તો અને સારો વિકલ્પ બનાવે છે.

મારુતિ સુઝુકી Victoriis એ સુરક્ષાના મામલે કોઈ કસર છોડી નથી. તેને ભારત NCAP માંથી 5 સ્ટાર સેફ્ટી રેટિંગ મળ્યું છે, જે તેની મજબૂત બાંધણીનો પુરાવો છે. આ કારમાં 6 એરબેગ્સ, ABS, રિયર પાર્કિંગ સેન્સર, ટાયર પ્રેશર મોનિટરિંગ સિસ્ટમ અને હિલ-હોલ્ડ આસિસ્ટ જેવી અદ્યતન સુરક્ષા સુવિધાઓ પણ સામેલ છે.

સુવિધાઓની વાત કરીએ તો, વિક્ટોરિસ ભારતીય રસ્તાઓ પર મારુતિની પ્રથમ એવી કાર છે જે લેવલ 2 ADAS સાથે આવે છે. આ ઉપરાંત, તેમાં એલેક્સા વોઇસ આસિસ્ટન્ટ, ડોલ્બી એટમોસ સરાઉન્ડ સાઉન્ડ સિસ્ટમ, અને સ્માર્ટ પાવર્ડ ટેલગેટ જેવી આધુનિક સુવિધાઓ પણ છે. આ કાર હ્યુન્ડાઇ ક્રેટા, ટાટા નેક્સન, કિયા સેલ્ટોસ, ફોક્સવેગન તૈગુન અને સ્કોડા કુશક જેવી લોકપ્રિય SUV સાથે સીધી સ્પર્ધા કરશે. તેની બુકિંગ પહેલેથી જ શરૂ થઈ ગયું છે, જ્યારે વેચાણ 22 સપ્ટેમ્બરથી શરૂ થશે.