આજે સોનું અને ચાંદી સસ્તું થયું: સતત ત્રીજા દિવસે ભાવ ઘટ્યા, ચાંદી ₹4,500 ગબડી! જાણો આજના લેટેસ્ટ ભાવ

Gold Silver Rates: વૈશ્વિક માંગમાં ઘટાડો અને સુરક્ષિત રોકાણની ઓછી જરૂરિયાત ભાવ ઘટાડા માટે જવાબદાર.

Gold Silver Rate: ભારતીય બજારોમાં સોના (Gold) અને ચાંદીના (Silver) ભાવમાં સતત ઘટાડો નોંધાઈ રહ્યો છે. ગુરુવારે સતત ત્રીજા દિવસે કિંમતી ધાતુઓના ભાવમાં ઘટાડો થયો છે, જે વૈશ્વિક બજારોમાં નબળી માંગ અને સ્ટોકિસ્ટો દ્વારા વેચવાલીના કારણે જોવા મળ્યો છે.

ગુરુવારે દિલ્હીના (Delhi) સોના બજારમાં 99.9 ટકા શુદ્ધતાવાળા સોનાનો ભાવ ₹200 ઘટીને ₹98,670 પ્રતિ 10 ગ્રામ પર બંધ થયો. અગાઉ બુધવારે, તેનો ભાવ ₹500 ઘટીને ₹98,870 પ્રતિ 10 ગ્રામ પર બંધ થયો હતો. દરમિયાન, 99.5 ટકા શુદ્ધતા ધરાવતું સોનું પણ આજે ₹200 ઘટીને ₹98,200 પ્રતિ 10 ગ્રામ થયું, જે બુધવારે ₹98,400 પ્રતિ 10 ગ્રામ પર બંધ થયું હતું.

ચાંદીના ભાવમાં પણ મોટો ઘટાડો નોંધાયો છે. ગુરુવારે ચાંદીના ભાવ ₹500 ઘટીને ₹1,10,500 પ્રતિ કિલો થયા, જ્યારે બુધવારે તે ₹1,11,000 પ્રતિ કિલો પર બંધ થઈ હતી. ઉલ્લેખનીય છે કે સોમવારે ચાંદીના ભાવમાં ₹5,000નો ઉછાળો આવ્યો હતો, જેના પગલે તે ₹1,15,000 પ્રતિ કિલોના સર્વકાલીન ઉચ્ચતમ સ્તર પર પહોંચી ગઈ હતી. જોકે, ત્યારથી, માત્ર 3 દિવસમાં ચાંદીના ભાવમાં ₹4,500 પ્રતિ કિલોનો ઘટાડો થયો છે.