SGB 2023-24: સસ્તું સોનું ખરીદવાની તક, એક ગ્રામ માટે ચૂકવવા પડશે માત્ર આટલા પૈસા, જાણો ખરીદવાની રીત

Sovereign Gold Bonds: ચાલુ નાણાકીય વર્ષમાં સોવરિન ગોલ્ડ બોન્ડનો આ છેલ્લો હપ્તો છે, જેનું સબસ્ક્રિપ્શન આજથી શરૂ થયું છે. 16મી ફેબ્રુઆરી સુધી તેને ખરીદવાની તક છે...

પ્રતિકાત્મક તસવીર

રોકાણકારોના મનપસંદ સોવરિન ગોલ્ડ બોન્ડમાં નાણાં રોકવાની બીજી તક આજથી શરૂ થઈ છે. સોવરિન ગોલ્ડ બોન્ડ (SGB) 2023-24 સિરીઝ-4 માટે સબસ્ક્રિપ્શન આજે, સોમવાર 12મી ફેબ્રુઆરી શરૂ થયું છે. SGB માટે સબસ્ક્રિપ્શન પાંચ દિવસ માટે એટલે કે 16મી ફેબ્રુઆરી સુધી ખુલ્લું રહેશે.

ચાલુ નાણાકીય વર્ષ દરમિયાન સોવરિન ગોલ્ડ બોન્ડનો આ છેલ્લો હપ્તો છે. એટલે કે, નાણાકીય વર્ષ 2023-24માં, SGBમાં રોકાણ કરવાની છેલ્લી તક આજથી 16 ફેબ્રુઆરી સુધી છે. આ હપ્તા હેઠળ 21મી ફેબ્રુઆરીએ ગોલ્ડ બોન્ડ જારી કરવામાં આવશે.

રિઝર્વ બેંકના જણાવ્યા અનુસાર, SGBના આ હપ્તા માટે ઈશ્યુ પ્રાઇસ 6,263 રૂપિયા પ્રતિ ગ્રામ નક્કી કરવામાં આવી છે. રોકાણકારો એક ગ્રામના ગુણાંકમાં સોવરિન ગોલ્ડ બોન્ડ ખરીદી શકે છે. એટલે કે તેને 1 ગ્રામ, 2 ગ્રામ, 3 ગ્રામના ગુણાંકમાં ખરીદી શકાય છે...

વ્યક્તિગત રોકાણકાર SGBમાં વધુમાં વધુ 4 કિલો સોનું ખરીદી શકે છે. અવિભાજિત હિન્દુ પરિવારો માટે પણ ઉપલી મર્યાદા 4 કિલો છે, જ્યારે ટ્રસ્ટ 20 કિલો સોનું ખરીદી શકે છે.

અગાઉ, સોવરિન ગોલ્ડ બોન્ડ સિરીઝ 2023-24ના ત્રીજા હપ્તા માટેનું સબસ્ક્રિપ્શન ડિસેમ્બર 2023માં ખોલવામાં આવ્યું હતું. તેનું સબ્સ્ક્રિપ્શન 18મી ડિસેમ્બરથી ખોલવામાં આવ્યું હતું અને 22મી ડિસેમ્બર સુધી સબ્સ્ક્રિપ્શન માટે ખુલ્લું હતું. SGB સિરીઝ-3 28 ડિસેમ્બરે જારી કરવામાં આવી હતી.

સોવરિન ગોલ્ડ બોન્ડ પર રોકાણકારોને વાર્ષિક 2.50 ટકાના દરે વ્યાજ મળે છે. વ્યાજના નાણાં વર્ષમાં બે વાર SGB રોકાણકારોના ખાતામાં જમા થાય છે.

સોવરિન ગોલ્ડ બોન્ડની શરૂઆત વર્ષ 2015માં કરવામાં આવી હતી. તે 8 વર્ષમાં પરિપક્વ થાય છે, પરંતુ તેને 5 વર્ષના સમયગાળા પછી ગમે ત્યારે રિડીમ કરી શકાય છે. પરિપક્વતા પર કર લાભો ઉપલબ્ધ છે.

સોવરિન ગોલ્ડ બોન્ડ કોઈપણ શેડ્યુલ્ડ કોમર્શિયલ બેંક, પોસ્ટ ઓફિસ, સ્ટોક હોલ્ડિંગ કોર્પોરેશન ઓફ ઈન્ડિયા, ક્લિયરિંગ કોર્પોરેશન ઓફ ઈન્ડિયા, BSE અને NSEમાંથી ખરીદી શકાય છે.