આ વર્ષે સોનાનો ભાવ ૧00000 થશે કે ૫૫000! જાણો નિષ્ણાતો શું કહે છે

વૈશ્વિક અસ્થિરતા અને ટ્રેડ વોર વચ્ચે સોનાની તેજી, કેટલાક નિષ્ણાતોને ૧ લાખની આશા તો કેટલાકને ૪૦% ઘટાડાની ભીતિ.

સોનાના ભાવમાં છેલ્લા કેટલાક સમયથી સતત વધારો જોવા મળી રહ્યો છે, જેના કારણે એવી અટકળો વહેતી થઈ છે કે શું સોનું આ વર્ષે ૧ લાખ રૂપિયા પ્રતિ ૧૦ ગ્રામના આંકડાને સ્પર્શી જશે. જો કે, કેટલાક નિષ્ણાતોનું માનવું છે કે તેની કિંમતમાં ૪૦ ટકા સુધીનો ઘટાડો પણ થઈ શકે છે.

છેલ્લા કેટલાક મહિનાઓથી સોનાના ભાવમાં સતત તેજી જોવા મળી રહી છે. આ તેજીનું મુખ્ય કારણ વૈશ્વિક સ્તરે જોવા મળી રહેલી અસ્થિરતા અને અમેરિકા અને ચીન વચ્ચેનો ટ્રેડ વોરનો તણાવ છે. અમેરિકી રાષ્ટ્રપતિ ડોનાલ્ડ ટ્રમ્પ દ્વારા વિશ્વભરના દેશો પર આયાત જકાત લાદવાની જાહેરાત બાદ સોનાના ભાવમાં વધુ ઉછાળો આવ્યો હતો. જો કે, ટ્રમ્પે હાલમાં ચીન સિવાયના અન્ય દેશો પર ટેરિફ લાદવાનો નિર્ણય ૯૦ દિવસ માટે મોકૂફ રાખ્યો છે, પરંતુ તેમ છતાં સોનાની કિંમત ઘટવાના કોઈ સંકેત દેખાઈ રહ્યા નથી.

આજે શુક્રવારે મલ્ટી કોમોડિટી એક્સચેન્જ (MCX) પર સોનાએ નવો રેકોર્ડ બનાવ્યો હતો. દિલ્હીમાં આજે ૨૨ કેરેટ સોનાનો ભાવ ૮૫,૭૬૦ રૂપિયા અને ૨૪ કેરેટ સોનાનો ભાવ ૯૩,૫૪૦ રૂપિયા પ્રતિ ૧૦ ગ્રામ નોંધાયો હતો.