ભરૂચઃ કારને અજાણ્યા વાહને ટક્કર મારતાં ખાબકી ખાઈમાં, ચાર મહિલા સહિત પાંચ લોકોના મોત

નેત્રંગ મોવી રોડ પર થયેલા ગમખ્વાર અકસ્માતમાં પાંચ લોકોના મોત.

ભરૂચ જિલ્લામાં માતેલા સાંઢની જેમ દોડી રહેલા વાહનોના કારણે જીવલેણ અકસ્માતોની સંખ્યા વધી રહી છે. જેમાં ઘણા નિર્દોષ નાગરિકોના જીવ ગયા છે. આ દરમિયાન આજે નેત્રંગ મોવી રોડ પર થયેલા ગમખ્વાર અકસ્માતમાં પાંચ લોકોના મોત નિપજ્યા છે.

અકસ્માતની મળી રહેલી પ્રાથમિક વિગતો અનુસાર, પેસેન્જર કારને કોઈ અજાણ્યા વાહને ટક્કર મારતા ખાઈમાં ખાબકતા 4 મહિલા સહીત કુલ પાંચના મૃત્યુ નિપજ્યા છે.

ભરૂચ જિલ્લાના નેત્રંગ મોવી રોડ ઉપરસ ફેકટરીમાંથી છુટીને કામદારો પેસેન્જર કારમાં બેસીને ઘરે જઈ રહ્યાં હતા. આ સમયે, કોઈ અજાણ્યા વાહનચાલકે પેસેન્જર કારને ટક્કર મારી હતી. પેસેન્જર કારને લાગેલી ટક્કરને કારણે તે રોડની બાજુમાં આવેલી ઊંડી ખાઈમાં ખાબકી હતી.

આ ગમખ્વાર અકસ્માતમાં પેસેન્જર કારમાં સવાર પૈકી એક પુરુષનું ઘટનાસ્થળે જ મોત નિપજ્યું હતું. જ્યારે બાકીના ઈજાગ્રસ્તોને સારવાર માટે નજીકની રાજપીપળા ખાતેની હોસ્પિટલમાં લઈ જવાયા હતા.

રાજપીપળા હોસ્પિટલના સત્તાવાળાએ સારવાર અર્થે આવેલ ઈજાગ્રસ્તોમાંથી ચાર મહિલાના મૃત્યુ નિપજ્યા હોવાનું જણાવ્યુ છે. પોલીસે વધુ કાર્યવાહી હાથ ધરી છે.