IND vs BAN: રોહિત શર્માએ 11 હજાર રન બનાવી રચ્યો ઇતિહાસ, તોડ્યો ‘ક્રિકેટના ભગવાન’નો રેકોર્ડ; માત્ર વિરાટ કોહલી આગળ

ચેમ્પિયન્સ ટ્રોફીમાં બાંગ્લાદેશ સામે ધમાકેદાર ઇનિંગ, સૌથી ઝડપી 11,000 વનડે રન બનાવવામાં વિશ્વનો બીજો બેટ્સમેન બન્યો

ભારતીય ક્રિકેટ ટીમના કેપ્ટન રોહિત શર્માએ વધુ એક સિદ્ધિ પોતાના નામે કરી છે. ચેમ્પિયન્સ ટ્રોફી 2025માં બાંગ્લાદેશ સામે રમાયેલી મેચમાં શાનદાર બેટિંગ કરતાં રોહિત શર્માએ વનડે ક્રિકેટમાં 11 હજાર રનનો આંકડો પાર કરી લીધો છે. આ સાથે જ તેણે ક્રિકેટ જગતના દિગ્ગજ ખેલાડી સચિન તેંડુલકરનો એક મોટો રેકોર્ડ પણ તોડી નાખ્યો છે.

ચેમ્પિયન્સ ટ્રોફીની શરૂઆત બાંગ્લાદેશ સામેની મેચથી થઈ અને રોહિત શર્માએ આ મેચમાં આક્રમક શરૂઆત કરી હતી. તેણે માત્ર 36 બોલમાં 7 ચોગ્ગાની મદદથી 41 રનની વિસ્ફોટક ઇનિંગ રમી હતી. આ ઇનિંગ દરમિયાન જ રોહિતે વનડે ક્રિકેટમાં 11 હજાર રન પૂરા કર્યા હતા.

આ સિદ્ધિ મેળવવાની સાથે જ રોહિત શર્મા વનડે ક્રિકેટના ઇતિહાસમાં સૌથી ઝડપી 11 હજાર રન બનાવનાર બીજો ખેલાડી બની ગયો છે. તેણે આ માટે માત્ર 261 ઇનિંગ્સ લીધી છે.