પાકિસ્તાનમાં દર વર્ષે 'મિનિ વર્લ્ડકપ'ની દરખાસ્તઃ ભારત સહિત કઈ ટોચની ચાર ટીમ વચ્ચે ટી-20 સુપર સીરિઝ રમાડવાની યોજના ?

પાકિસ્તાનમાં હવે કોઈ મોટી ટીમ રમી રહી નથી અને પીસીબીને લાખો ડોલરનું નુકસાન સહન કરવું પડી રહ્યું છે.

ફાઈલ તસવીર

Cricket News: પાકિસ્તાનમાં ભારત,ઈંગ્લેન્ડ અને ઓસ્ટ્રેલિયા જેવી ધરખમ ટીમોએ ક્રિકેટ રમવાનો ઈન્કાર કર્યા બાદ હવે PCBએ નવી ચાલ ચાલી છે. પાકિસ્તાન ક્રિકેટ બોર્ડના અધ્યક્ષ રમીઝ રાજાએ ચાર દેશોની T20 શ્રેણીનો પ્રસ્તાવ આપ્યો હતો.

પીસીબી ચેરમેન રમીઝ રાજાએ શું કર્યુ ટ્વીટ

રમીઝ રાજાએ ટ્વીટ કર્યું કે PCB ICC સમક્ષ દર વર્ષે ભારત, ઈંગ્લેન્ડ, ઓસ્ટ્રેલિયા અને પાકિસ્તાનને સામેલ કરતી ચાર દેશોની T20 સુપર સિરીઝ શરૂ કરવામાં આવે તેવી માંગ કરે છે. રોટેશન મુજબ, દરેક દેશમાં એક વર્ષમાં ઇવેન્ટનું આયોજન કરી શકાય છે અને આ ટુર્નામેન્ટમાંથી જે નફો થશે તે ICCના તમામ સભ્ય દેશોમાં વહેંચવો જોઈએ.

જો આમ થાય તો કોને સૌથી વધુ ફાયદો થાય

જો આ ટુર્નામેન્ટ વાસ્તવિક સ્વરૂપમાં બની હોય, તો કયા દેશને સૌથી વધુ ફાયદો થાય છે? જવાબ છે પાકિસ્તાન. કારણ કે પાકિસ્તાનમાં હવે કોઈ મોટી ટીમ રમી રહી નથી અને પીસીબીને લાખો ડોલરનું નુકસાન સહન કરવું પડી રહ્યું છે. આ ટૂર્નામેન્ટ દ્વારા જો કોઈ પણ રીતે પાકિસ્તાન ક્રિકેટ બોર્ડ ભારતીય ટીમને પાકિસ્તાનની ધરતી પર રમવા લઈ જઈ શકે તો તે આ મુશ્કેલીમાંથી બહાર આવી શકે છે. અને તેથી જ હવે ICCને સામે રાખીને PCBનું આ નવું પગલું ભર્યુ છે.

હાલ પીસીબીને થઈ રહ્યું છે જંગી નુકસાન

ઈંગ્લેન્ડ અને ન્યુઝીલેન્ડની ટીમોએ ગત વર્ષે પાકિસ્તાનમાં રમવાનું ટાળ્યું હતું. ભારત પણ ICC ટૂર્નામેન્ટ સિવાય કોઈપણ દ્વિપક્ષીય શ્રેણીમાં પાકિસ્તાન સામે રમવા માંગતું નથી. ઓસ્ટ્રેલિયાની ટીમે પણ વર્ષોથી પાકિસ્તાનનો પ્રવાસ કર્યો નથી. ભલે વેસ્ટ ઈન્ડિઝ જેવી ટીમો પાકિસ્તાનમાં રમી રહી હોય, પરંતુ ભવિષ્યમાં આ મોટી ટીમોનો પ્રવાસ ક્યારે કરશે તે કોઈને ખબર નથી અને આવી સ્થિતિમાં પીસીબીને સતત મોટું નુકસાન થઈ રહ્યું છે.

બીસીસીઆઈએ શું કહ્યું

આ ટ્વીટ અંગે બીસીસીઆઈના એક સૂત્રએ એબીપી ન્યૂઝને જણાવ્યું  કે, "દેશ પહેલા છે અને સરકાર દ્વારા લેવામાં આવેલા નિર્ણયને પાકિસ્તાન સામે કોઈપણ શ્રેણી રમવા પહેલા ધ્યાનમાં લેવામાં આવશે. જ્યાં સુધી આઈસીસી તરફથી બીસીસીઆઈને કોઈ પ્રસ્તાવ ન આવે ત્યાં સુધી આ પ્રકારની ટ્વીટનો કોઈ અર્થ નથી. "