RR vs CSK: ચેન્નાઈને 32 રને હરાવી રાજસ્થાનની ટીમ IPL પોઈન્ટ ટેબલમાં નંબર વન પર પહોંચી

RR vs CSK Full Match Highlights: જયપુરના સવાઇ માનસિંહ સ્ટેડિયમમાં રમાયેલી IPL 2023 ની 37મી મેચમાં, રાજસ્થાન રોયલ્સે ચેન્નાઇ સુપર કિંગ્સને 32 રનથી હરાવ્યું.

( Image Source : PTI )

RR vs CSK Full Match Highlights: જયપુરના સવાઇ માનસિંહ સ્ટેડિયમમાં રમાયેલી IPL 2023 ની 37મી મેચમાં, રાજસ્થાન રોયલ્સે ચેન્નાઇ સુપર કિંગ્સને 32 રનથી હરાવ્યું. આ જીત સાથે રાજસ્થાનની ટીમ પોઈન્ટ ટેબલમાં નંબર વન પર પહોંચી ગઈ છે. રાજસ્થાન રોયલ્સે પ્રથમ મેચમાં ચેન્નાઈ સુપર કિંગ્સને 203 રનનો ટાર્ગેટ આપ્યો હતો. જવાબમાં એમએસ ધોનીની ટીમ 170 રન જ બનાવી શકી હતી.

ચેન્નાઈ સુપર કિંગ્સ તરફથી શિવમ દુબેએ 52 રનની ઇનિંગ રમી હતી, પરંતુ તે ટીમને જીત અપાવી શક્યો ન હતો. બીજી તરફ રાજસ્થાન તરફથી બોલિંગમાં એડમ ઝેમ્પાએ 3 અને રવિચંદ્રન અશ્વિને 2 વિકેટ ઝડપી હતી.

ડેવોન કોનવે અને રુતુરાજ ગાયકવાડે સારી શરૂઆત કરી હતી પરંતુ નિર્ણાયક સમયે વિકેટ ગુમાવી

203 રનના લક્ષ્યાંકનો પીછો કરવા ઉતરેલી ચેન્નાઈ સુપર કિંગ્સ ટીમની ઓપનિંગ જોડીએ સારી શરૂઆત આપી હતી. રૂતુરાજ ગાયકવાડ અને ડેવોન કોનવેની જોડીએ પ્રથમ 3 ઓવરમાં થોડી ધીમી બેટિંગ કરી હતી, પરંતુ તે પછી બંનેએ સાથે મળીને રન બનાવવાની પ્રક્રિયા શરૂ કરી હતી. પ્રથમ 6 ઓવરમાં ટીમ 42 રનના સ્કોર સુધી પહોંચાડવામાં સફળ રહી હતી, પરંતુ પાવરપ્લેના છેલ્લા બોલ પર કોનવેના રૂપમાં ટીમને મોટો ફટકો લાગ્યો હતો, જે 16 બોલમાં 8 રન બનાવીને પેવેલિયન પરત ફર્યો હતો.

ચેન્નાઈએ એક છેડેથી એક પછી એક 3 મહત્વપૂર્ણ વિકેટ ગુમાવી 

ડેવોન કોનવેના પેવેલિયનમાં પરત ફર્યા બાદ મેદાન પર રુતુરાજ ગાયકવાડને સપોર્ટ કરવા ઉતરેલા અજિંક્ય રહાણેએ ચોક્કસપણે સ્કોર આગળ ધપાવવાનો પ્રયાસ કર્યો હતો. પરંતુ ચેન્નાઈને બીજો ફટકો 69ના સ્કોર પર ગાયકવાડના રૂપમાં લાગ્યો હતો, જે 29 બોલમાં 47 રનની ઈનિંગ રમીને પેવેલિયન પરત ફર્યા હતા. આ પછી ચેન્નાઈએ 73ના સ્કોર પર અજિંક્ય રહાણે અને અંબાતી રાયડુના રૂપમાં સતત 2 વિકેટ ગુમાવી હતી, જેમને પેવેલિયન મોકલવાનું કામ અશ્વિને કર્યું હતું.

મોઈન અલી સાથે શિવમ દુબેએ ચેન્નાઈની ઈનિંગ્સ સંભાળી 

73ના સ્કોર પર 4 મહત્વની વિકેટ ગુમાવ્યા બાદ શિવમ દુબે અને મોઇન અલીએ ઝડપી ગતિએ રન બનાવવાની પ્રક્રિયા શરૂ કરી હતી, જેના કારણે રાજસ્થાનના બોલરો પર થોડું દબાણ હતું. મોઈન અને શિવમ વચ્ચે 5મી વિકેટ માટે માત્ર 25 બોલમાં 51 રનની ભાગીદારી જોવા મળી હતી. મોઇન અલીને 23ના અંગત સ્કોર પર એડમ જેમ્પાએ પોતાનો શિકાર બનાવ્યો હતો.

દુબેની અડધી સદીની ઈનિંગ નિરર્થક ગઈ, ચેન્નાઈનો પરાજય થયો

 આ મેચમાં 124ના સ્કોર પર ચેન્નાઈ સુપર કિંગ્સની અડધી ટીમ પેવેલિયન ભેગી થઈ હતી. આ પછી, દરેકની નજર ફક્ત શિવમ દુબે પર જ ટકેલી હતી, જેણે એક છેડેથી ઝડપી સ્કોર કરવાનું ચાલુ રાખ્યું, પરંતુ બીજા છેડેથી અપેક્ષિત સમર્થન મેળવી શક્યો નહીં. આ મેચમાં શિવમ દુબેએ 33 બોલમાં 52 રનની ઇનિંગ રમી હતી. CSK આ મેચમાં 20 ઓવર પછી 6 વિકેટ ગુમાવીને 170 રન સુધી પહોંચવામાં સફળ રહી હતી. આ મેચમાં રાજસ્થાન તરફથી બોલિંગમાં એડમ જેમ્પાએ તેની 3 ઓવરમાં 3 વિકેટ ઝડપી હતી જ્યારે રવિચંદ્રન અશ્વિને તેની 4 ઓવરમાં 2 વિકેટ ઝડપી હતી.