T20 વર્લ્ડ કપ: બુમરાહને આરામ મળશે કે નહીં? નેધરલેન્ડ્સ સામેની મેચ પહેલા મોટા સમાચાર!

બુધવારે અમદાવાદમાં રમાનારી ઇન્ડિયા વર્સીસ નેધરલેન્ડ્સ T20 વર્લ્ડ કપ મેચમાં જસપ્રીત બુમરાહ રમશે કે કેમ? બેટિંગ કોચે આપ્યું મોટું અપડેટ. જાણો અભિષેક શર્માની ફિટનેસ વિગતો.

Jasprit Bumrah rest

Source : IANS

Show Quick Read

Key points generated by AI, verified by newsroom

T20 વર્લ્ડ કપ 2026 માં શાનદાર પ્રદર્શન કરતા સુપર 8 રાઉન્ડમાં પોતાનું સ્થાન પહેલેથી જ નિશ્ચિત કરી ચૂકેલી ભારતીય ક્રિકેટ ટીમ બુધવારે, 18 ફેબ્રુઆરીના રોજ અમદાવાદના મેદાન પર નેધરલેન્ડ્સ સામે ટકરાવા જઈ રહી છે. આ અંતિમ ગ્રુપ મેચ પહેલા ટીમ મેનેજમેન્ટની રણનીતિ અંગે ચર્ચા કરવા માટે યોજાયેલી પ્રેસ કોન્ફરન્સમાં ભારતના બેટિંગ કોચ સિતાંશુ કોટકે સ્પષ્ટ કરી દીધું છે કે, સુપર 8 ની મહત્વપૂર્ણ મેચો પહેલા ટીમ પોતાની વિજયી લય જાળવી રાખવા માંગે છે, તેથી આ મેચમાં સ્ટાર ફાસ્ટ બોલર જસપ્રીત બુમરાહને પ્લેઇંગ 11 માંથી આરામ આપવામાં આવે તેવી સંભાવના નહિવત છે.

બુમરાહનું ફોર્મ અને વર્કલોડ મેનેજમેન્ટ

ટીમ ઈન્ડિયા ભલે પોઈન્ટ ટેબલમાં મજબૂત સ્થિતિમાં હોય, પરંતુ મેનેજમેન્ટ વર્લ્ડ કપ જેવી મેગા ઇવેન્ટમાં કોઈપણ વિરોધી ટીમને હળવાશથી લેવાની ભૂલ કરવા માંગતું નથી. કોટકે સ્પષ્ટ કર્યું કે, "હાલની પરિસ્થિતિ જોતા એવું જરાય નથી લાગતું કે બુમરાહને આ તબક્કે આરામ આપવામાં આવશે. જોકે પિચ અને ખેલાડીઓની સ્થિતિ જોયા બાદ અંતિમ નિર્ણય લેવાશે."

નોંધનીય છે કે, પાકિસ્તાન સામે રમાયેલી અગાઉની હાઈ વોલ્ટેજ મેચમાં બુમરાહનું પ્રદર્શન એકદમ ઘાતક અને મેચ વિનિંગ રહ્યું હતું. તેણે ખતરનાક ફોર્મમાં ચાલી રહેલા સેમ અયુબ અને પાકિસ્તાની કેપ્ટન સલમાન અલી આગાની મહત્વપૂર્ણ વિકેટો ઝડપીને પાકિસ્તાનની કમર તોડી નાખી હતી. બુમરાહની આ શરૂઆતી સફળતાના કારણે જ ભારતે પાકિસ્તાન સામે 61 રનથી ઐતિહાસિક અને વ્યાપક વિજય મેળવ્યો હતો. જોકે, ભવિષ્યની મેચોને ધ્યાનમાં રાખીને ભારતીય સ્પોર્ટ્સ સાયન્સ અને મેડિકલ ટીમ બુમરાહના વર્કલોડ પર સતત નજર રાખી રહી છે.

અભિષેક શર્માની ફિટનેસ અને ઈશાન કિશનના વખાણ

આ પ્રેસ કોન્ફરન્સમાં યુવા ઓપનર અભિષેક શર્માની ફિટનેસ અંગે પણ મોટું અપડેટ આપવામાં આવ્યું હતું. પેટની ગંભીર બીમારીના કારણે તાજેતરમાં જ દિલ્હીની હોસ્પિટલમાં દાખલ થયેલો અભિષેક નામિબિયા સામેની મેચ રમી શક્યો નહોતો. તે પાકિસ્તાન સામે મેદાનમાં તો ઉતર્યો હતો, પરંતુ પ્રથમ ઓવરમાં જ ખાતું ખોલાવ્યા વિના આઉટ થઈ ગયો હતો. કોટકે યુવા ખેલાડીનો બચાવ કરતા કહ્યું કે, તે હજુ શારીરિક રીતે સંપૂર્ણ સ્વસ્થ નહોતો, તેથી ટીમ તેના આ એક પ્રદર્શનનું વધુ પડતું વિશ્લેષણ કરીને તેના પર દબાણ વધારવા માંગતી નથી. તે પોતાની બેટિંગ યોજનાઓ અંગે એકદમ સ્પષ્ટ છે.

બીજી તરફ, બેટિંગ કોચે વિકેટકીપર બેટ્સમેન ઈશાન કિશનની આક્રમક માનસિકતાના ભરપેટ વખાણ કર્યા હતા. બાળપણથી જ કિશનનો અતૂટ આત્મવિશ્વાસ તેની સૌથી મોટી તાકાત રહ્યો છે, અને આ જ નીડરતા તેને T20 ફોર્મેટમાં એક અલગ જ કક્ષાનો ખેલાડી બનાવે છે. પાકિસ્તાન સામેની પ્રેશરવાળી મેચમાં ઈશાને ફટકારેલી શાનદાર અડધી સદી ભારતના મોટા સ્કોર અને વિજયનો મજબૂત પાયો સાબિત થઈ હતી.

નેધરલેન્ડ્સને નબળી ગણવાની ભૂલ નહીં

અમદાવાદમાં રમાનારી આગામી મેચ અંગે ચેતવણી આપતા કોટકે અંતમાં જણાવ્યું કે, આ વર્લ્ડ કપમાં અત્યાર સુધીમાં અનેક અણધાર્યા ઉલટફેર જોવા મળ્યા છે, જ્યાં નાની ટીમોએ દિગ્ગજોને ધૂળ ચટાડી છે. આથી, ભારત નેધરલેન્ડ્સ સામેની મેચને સહેજ પણ સરળ કે હળવાશથી લેશે નહીં. દરેક મેચ ટીમ માટે ફાઇનલ જેટલી જ મહત્વપૂર્ણ છે.

આ પણ વાંચો

T20 વર્લ્ડ કપ 2026: 7 ટીમો સુપર 8માં નક્કી, ઓસ્ટ્રેલિયા બહાર, પાકિસ્તાન પર લટકતી તલવાર