IND vs ENG: યશસ્વી જયસ્વાલે માન્ચેસ્ટરમાં 51 વર્ષ જૂનો રેકોર્ડ તોડ્યો, અડધી સદી ફટકારી ઇતિહાસ રચ્યો
ઓલ્ડ ટ્રેફોર્ડમાં 50+ રન બનાવનાર પ્રથમ ભારતીય ઓપનર, 1974 પછી ગાવસ્કરનો રેકોર્ડ તોડ્યો; ઇંગ્લેન્ડ સામે 1000 ટેસ્ટ રન પણ પૂરા કર્યા.
ભારત અને ઇંગ્લેન્ડ વચ્ચે માન્ચેસ્ટરના ઓલ્ડ ટ્રેફોર્ડ ખાતે રમાઈ રહેલી ચોથી ટેસ્ટ મેચમાં ભારતીય ઓપનર યશસ્વી જયસ્વાલે ઇતિહાસ રચ્યો છે. તેણે શાનદાર અડધી સદી (58 રન) ફટકારીને 51 વર્ષના દુકાળનો અંત લાવ્યો છે. જયસ્વાલ 1974માં સુનીલ ગાવસ્કર પછી માન્ચેસ્ટરના આ મેદાન પર 50 કે તેથી વધુ રન બનાવનાર પ્રથમ ભારતીય ઓપનર બન્યો છે. આ ઉપરાંત, આ ઇનિંગ સાથે તેણે ઇંગ્લેન્ડ સામેની ટેસ્ટ મેચોમાં 1000 રન પણ પૂરા કર્યા છે, જે સિદ્ધિ મેળવનાર તે 20મો ભારતીય બેટ્સમેન અને ચોથો ભારતીય ઓપનર બન્યો છે.
ભારત અને ઇંગ્લેન્ડ વચ્ચે પાંચ મેચની ટેસ્ટ શ્રેણીની ચોથી મેચ હાલમાં બુધવાર, જુલાઈ 23 થી માન્ચેસ્ટરના ઐતિહાસિક ઓલ્ડ ટ્રેફોર્ડ મેદાન પર રમાઈ રહી છે. આ મેચમાં ભારતના યુવા ઓપનર યશસ્વી જયસ્વાલે પોતાના નામે એક અનોખો રેકોર્ડ નોંધાવીને ઇતિહાસ રચ્યો છે.
માન્ચેસ્ટરમાં 51 વર્ષનો દુકાળ સમાપ્ત
યશસ્વી જયસ્વાલે ઇંગ્લેન્ડ સામેની આ મેચમાં શાનદાર અડધી સદી ફટકારીને પોતાના ચાહકોને નિરાશ કર્યા નથી, જેઓ લોર્ડ્સ ટેસ્ટમાં તેના નબળા પ્રદર્શનથી નિરાશ હતા. જયસ્વાલે 58 રનની ઇનિંગ રમી, જેમાં 10 ચોગ્ગા અને એક છગ્ગાનો સમાવેશ થાય છે. આ ઇનિંગ સાથે, જયસ્વાલે માન્ચેસ્ટરના ઓલ્ડ ટ્રેફોર્ડ મેદાન પર 51 વર્ષ જૂના દુકાળનો અંત લાવી દીધો. તે 1974માં સુનીલ ગાવસ્કર પછી, આ મેદાન પર 50 કે તેથી વધુ રન બનાવનાર પ્રથમ ભારતીય ઓપનર બન્યો છે. ગાવસ્કરે છેલ્લી વખત ઓપનર તરીકે આ સિદ્ધિ મેળવી હતી.
ઇંગ્લેન્ડ સામે 1000 ટેસ્ટ રન પૂરા કર્યા
58 રનની આ મહત્વપૂર્ણ ઇનિંગ સાથે, યશસ્વી જયસ્વાલે બીજી એક મોટી સિદ્ધિ પણ પોતાના નામે કરી છે. તેણે ઇંગ્લેન્ડ સામેની ટેસ્ટ મેચોમાં 1000 રન પૂરા કર્યા છે. જયસ્વાલે માત્ર 9 ટેસ્ટ મેચમાં લગભગ 67 ની પ્રભાવશાળી સરેરાશથી કુલ 1003 રન બનાવ્યા છે. આ દરમિયાન તેણે ઇંગ્લેન્ડ સામે 5 અડધી સદી અને 3 શાનદાર સદી ફટકારી છે.
આ સિદ્ધિ સાથે, જયસ્વાલ ઇંગ્લેન્ડ સામે ટેસ્ટ ક્રિકેટમાં 1000 રન પૂરા કરનાર 20મો ભારતીય બેટ્સમેન બન્યો છે. ઓપનર તરીકે આવું કરનાર તે માત્ર ચોથો ભારતીય ખેલાડી છે. રસપ્રદ વાત એ છે કે જયસ્વાલે આ સિદ્ધિ માત્ર 16 ઇનિંગ્સમાં મેળવી છે. આ મામલે તે ફક્ત સચિન તેંડુલકર અને રાહુલ દ્રવિડથી પાછળ છે, જેમણે ઇંગ્લેન્ડ સામે માત્ર 15 ઇનિંગ્સમાં 1000 રન પૂરા કર્યા હતા.
ટોપ સ્ટોરી
ટ્રેન્ડિંગ સમાચાર
