માન્ચેસ્ટરમાં 35 વર્ષ પછી ભારતીય ક્રિકેટરનું ટેસ્ટ ડેબ્યૂ: 1990માં અનિલ કુંબલેએ પ્રથમ ટેસ્ટ મેચ રમી હતી

બંને બોલરોએ એક જ ઇનિંગ્સમાં 10 વિકેટ લેવાની અનોખી સિદ્ધિ મેળવી છે.

માન્ચેસ્ટરમાં 35 વર્ષ પછી ભારતીય ક્રિકેટરનું ટેસ્ટ ડેબ્યૂ

Source : PTI

Anshul Kamboj Test debut: ભારત અને ઇંગ્લેન્ડ વચ્ચે માન્ચેસ્ટરમાં શરૂ થયેલી ચોથી ટેસ્ટ મેચમાં ભારતીય ટીમે યુવા ફાસ્ટ બોલર અંશુલ કંબોજને ડેબ્યૂ કરવાની તક આપી છે. 35 વર્ષના લાંબા ગાળા પછી, અંશુલ કંબોજ માન્ચેસ્ટરના ઐતિહાસિક ઓલ્ડ ટ્રેફોર્ડ મેદાન પર ટેસ્ટ ડેબ્યૂ કરનાર બીજા ભારતીય ક્રિકેટર બન્યા છે, જેમણે 1990 માં અનિલ કુંબલેએ પણ આ જ મેદાન પર પોતાની પ્રથમ ટેસ્ટ રમી હતી. બંને ખેલાડીઓ વચ્ચે એક અનોખી સમાનતા એ પણ છે કે બંનેએ રેડ-બોલ ક્રિકેટમાં એક જ ઇનિંગ્સમાં 10 વિકેટ લેવાની સિદ્ધિ હાંસલ કરી છે. અંશુલ કંબોજ ભારતીય ટેસ્ટ ટીમમાં 318મા ખેલાડી તરીકે સ્થાન પામ્યા છે.

માન્ચેસ્ટરનું ઐતિહાસિક મેદાન અને 35 વર્ષ પછીનું પુનરાવર્તન

અંશુલ કંબોજ માટે આ ડેબ્યૂ વધુ ખાસ એટલા માટે છે કારણ કે તે માન્ચેસ્ટરના એ જ ઐતિહાસિક મેદાન પર થયું છે જ્યાં 35 વર્ષ પહેલાં, 1990 માં, ભારતીય ક્રિકેટના મહાન સ્પિનર અનિલ કુંબલેએ પણ પોતાની ટેસ્ટ કારકિર્દીનો પ્રારંભ કર્યો હતો. આમ, અંશુલ કંબોજ અનિલ કુંબલે પછી માન્ચેસ્ટરમાં ટેસ્ટ ડેબ્યૂ કરનાર બીજા ભારતીય ક્રિકેટર બન્યા છે.

અંશુલ કંબોજની કારકિર્દી અને ટીમમાં સમાવેશ

ઘરેલુ ક્રિકેટમાં હરિયાણા તરફથી રમનારા અંશુલ કંબોજે છેલ્લી ઘરેલુ સિઝનમાં પોતાની બોલિંગથી સૌનું ધ્યાન ખેંચ્યું હતું. તેમના પ્રભાવશાળી પ્રદર્શનને કારણે જ તેમને ઇંગ્લેન્ડ સામેની છેલ્લી બે ટેસ્ટ મેચ માટે ભારતીય ટીમમાં સામેલ કરવામાં આવ્યા હતા. આ પહેલા, અંશુલ ઇંગ્લેન્ડ લાયન્સ સામે બે બિનસત્તાવાર ટેસ્ટ મેચ રમનારી ઇન્ડિયા A ટીમનો પણ ભાગ હતા. તે મેચોમાં, તેણે 3 ઇનિંગ્સમાં 5 વિકેટ લીધી હતી અને તેની પ્રથમ મેચમાં અણનમ અડધી સદી પણ ફટકારી હતી. અંશુલ ભારત માટે ટેસ્ટ ક્રિકેટ રમનાર 318મા ખેલાડી બન્યા છે.

કુંબલે અને કંબોજ વચ્ચેની અનોખી સમાનતા

અનિલ કુંબલે અને અંશુલ કંબોજ વચ્ચે માત્ર માન્ચેસ્ટરમાં ડેબ્યૂની જ નહીં, પરંતુ એક વધુ અનોખી અને દુર્લભ સમાનતા છે. બંને બોલરોએ રેડ-બોલ ક્રિકેટમાં એક જ ઇનિંગ્સમાં 10 વિકેટ લેવાની અદ્ભુત સિદ્ધિ હાંસલ કરી છે:

• અનિલ કુંબલે: 1999 માં, અનિલ કુંબલેએ પાકિસ્તાન સામેની ટેસ્ટ મેચની બીજી ઇનિંગ્સમાં તમામ 10 વિકેટ ઝડપીને ઇતિહાસ રચ્યો હતો. તેણે તે આખી મેચમાં કુલ 14 વિકેટ લીધી હતી.
• અંશુલ કંબોજ: અંશુલે ભારતીય ઘરેલુ ક્રિકેટમાં આ સિદ્ધિ મેળવી છે. તેણે 2024 માં રણજી ટ્રોફીની એક મેચમાં કેરળના તમામ 10 બેટ્સમેનોને આઉટ કરીને આ કમાલ કરી હતી.