2003ના વર્લ્ડ કપમાં ટીમ ઈન્ડિયામાંથી રમનારા આ ક્રિકેટર જોડાયા ભાજપમાં, જાણો કેવી હતી કારકિર્દી ?

નવા વરસની શરૂઆતમાં પંજાબમાં વિધાનસભાની ચૂંટણી યોજાવાની છે ત્યારે ભાજપ તેમને વિધાનસભા ચૂંટણીમાં ઉમેદવાર બનાવે તેવી પણ સંભાવના છે.

BJP_Flag

નવી દિલ્હીઃ દેશનાં પાંચ રાજ્યોમાં ચૂંટણીનાં પડઘમ વાગી રહ્યાં છે તેથી સેલિબ્રિટિઝનો રાજકીય પક્ષોમાં જોડાવાનો પ્રવાહ શરૂ થઈ ગયો છે. પંજાબમાં ટીમ ઈન્ડિયા વતી આંતરરાષ્ટ્રીય સ્તરે રમી ચૂકેલા ભૂતપૂર્વ ક્રિકેટર દિનેશ મોંગિયા ભાજપમાં જોડાઈ ગયા છે.

મંગળવારે  ભાજપના રાષ્ટ્રીય કાર્યાલયમાં દિનેશ મોંગિયા કેન્દ્રીય મંત્રી અને પંજાબમાં ભાજપના પ્રભારી ગજેન્દ્રસિંહ શેખાવતના હસ્તે ભાજપનુ સભ્યપદ આપવામાં આવ્યુ હતું. મોંગિયા 2003ના વર્લ્ડકપમાં ભારતીય ક્રિકેટ ટીમમાં હતા. ઓસ્ટ્રેલિયા સામે ફાઈનલમાં થયેલી હારમાં પણ મોંગિયા ટીમના સભ્ય હતા. આ ટીમના સુકાનીપદે સૌરવ ગાંગુલી હતા.

નવા વરસની શરૂઆતમાં પંજાબમાં વિધાનસભાની ચૂંટણી યોજાવાની છે ત્યારે ભાજપ તેમને વિધાનસભા ચૂંટણીમાં ઉમેદવાર બનાવે તેવી પણ સંભાવના છે. મોંગિયાને મોંગા જિલ્લામાંથી ભાજપ ઉમેદવાર બનાવે એવી શક્યતા છે.

દિનેશ મોંગિયાએ સ્થાનિક સ્તપે પંજાબ વતી રમીને પોતાના ક્રિકેટ કેરિયરનો પ્રારંભ કર્યો હતો. 2001માં તે પોતાની પહેલી  ઈન્ટરનેશનલ મેચ રમ્યા હતા. મોંગિયાએ ઓસ્ટ્રેલિયા સામે પોતાની વનડે કેરિયર શરૂ કરી હતી.2003માં વર્લ્ડકપ ટીમનો પણ મોંગિયા હિસ્સો રહી ચુકયા છે. છેલ્લે પંજાબ માટે તેઓ 2007માં રમ્યા હતા. એ પછી 2019માં મોંગિયાએ તમામ પ્રકારના ક્રિકેટમાંથી નિવૃત્તિની જાહેરાત કરી હતી.

તેણે 28 માર્ચે પુણેમાં ઓસ્ટ્રેલિયા સામે તેની કારકિર્દીની પ્રથમ આંતરરાષ્ટ્રીય મેચ રમી હતી. તેણે મે 2007માં બાંગ્લાદેશ સામે છેલ્લી ODI મેચ રમી હતી. આ સિવાય તેણે 2006માં દક્ષિણ આફ્રિકા સામે એકમાત્ર T20 ઈન્ટરનેશનલ મેચ રમી હતી.

જો મોંગિયાની કારકિર્દી પર નજર કરીએ તો તેણે 51 ODI ઇનિંગ્સમાં 1230 રન બનાવ્યા છે. આ દરમિયાન તેણે એક સદી અને ચાર અડધી સદી ફટકારી હતી. તેણે બોલિંગમાં પણ સારો દેખાવ કર્યો છે. મોંગિયાને 21 ODI ઇનિંગ્સમાં બોલિંગ કરવાની તક મળી. આ દરમિયાન તેણે 14 વિકેટ ઝડપી હતી. તેણે ઘરેલું મેચોમાં સારું પ્રદર્શન કર્યું છે.

આ પણ વાંચો..........