આ ખેલાડીઓએ વર્લ્ડકપ બાદ વન-ડેમાંથી જાહેર કરી નિવૃતિ, જાણો કોણ કોણ છે સામેલ?

નવી દિલ્હીઃ ઇગ્લેન્ડ અને વેલ્સમાં રમાઇ રહેલા વર્લ્ડકપ બાદ અનેક ખેલાડીઓએ વન-ડે ક્રિકેટને અલવિદા કરી દીધું છે. પાકિસ્તાનના પૂર્વ કેપ્ટન શોએબ મલિક,સાઉથ આફ્રિકાના સ્પિનર ઇમરાન તાહિર, જેપી ડ્યુમિનીનો સમાવેશ થાય છે. ઇમરાન તાહિર અને જેપી ડ્યુમિનીએ ઓસ્ટ્રેલિયા સામે પોતાની અંતિમ વન-ડે મેચ રમી હતી જ્યારે પાકિસ્તાનના શોએબ મલિકે ભારત સામે વર્લ્ડકપમાં અંતિમ વન-ડે મેચ રમી હતી.

તાહિરે ટ્વિટર પર નિવૃતિ જાહેર કરતા કહ્યુ હતું કે, હું અંતિમ વખત સાઉથ આફ્રિકાની જર્સી પહેરીને વન-ડે ઇન્ટરનેશનલ મેચ રમવા ઉતરી રહ્યો છું. આ મારા માટે ખૂબ ભાવુક ક્ષણ છે. હું એ તમામ લોકોનો આભારી છું જેમણે મારા કરિયર દરમિયાન મારો સાથ આપ્યો છે. સાથે ક્રિકેટ સાઉથ આફ્રિકાને વિશેષ રીતે ધન્યવાદ આપવા માંગું છું જેણે મારા સપનાને હકીકતમાં બદલ્યું. ઇમરાન તાહિરે 107 વન-ડે રમી છે જેમાં 173 વિકેટ ઝડપી છે જેમાં 45 રનમાં સાત વિકેટ તેનું શ્રેષ્ઠ પ્રદર્શન છે.

સાઉથ આફ્રિકાના બેટિંગ ઓલરાઉન્ડર જેપી ડ્યુમિનીએ ઓસ્ટ્રેલિયા સામેની વર્લ્ડકપની મેચ બાદ વન-ડે ક્રિકેટમાંથી નિવૃતિ જાહેર કરી છે. ડ્યુમિનીએ સાઉથ આફ્રિકા માટે 198 વન-ડે મેચ રમી છે. 35 વર્ષીય ડ્યુમિનીએ 5103 રન બનાવ્યા છે. આ દરમિયાન તેણે ચાર સદી અને 27 અડધી સદી લગાવી છે. સાથે તેમણે 69 વિકેટ લીધી છે.

પાકિસ્તાનની ક્રિકેટ ટીમના પૂર્વ કેપ્ટન શોએબ મલિકે બાંગ્લાદેશ વિરુદ્ધ મેચ બાદ વન-ડે ઇન્ટરનેશનલ ક્રિકેટમાંથી નિવૃતિની જાહેરાત કરી દીધી હતી. મલિકે કહ્યું કે, આજે હું વન-ડે ક્રિકેટમાં નિવૃતિ લઇ રહ્યો છું. હું જે ખેલાડીઓ સાથે રમ્યો અને તે તમામ કોચ જેમના અંડરમાં ટ્રેનિંગ લીધી, પરિવાર, દોસ્ત, મીડિયા અને સ્પોન્સર્સનો આભારી છું. હું તમામ લોકોને ખૂબ પ્રેમ કરું છું. મલિકે કહ્યું કે, તે વન-ડે ક્રિકેટ છોડતા ખૂબ દુખી છે પણ હવે તેને પરિવાર સાથે વધુ સમય વિતાવવાનો સમય મળશે.