આજથી ભારત-ઇંગ્લેન્ડ વચ્ચે પાંચમી ટેસ્ટ, આ રેકોર્ડ પર રહેશે નજર

આ મેચોનુ લાઇવ, મેચની ઇગ્લિંશ કૉમેન્ટ્રી Sony Six અને Sony Six Hd પર થશે, જ્યારે SONY TEN 3 અને SONY TEN 3 HD પર હિન્દીમાં કૉમેન્ટ્રી પ્રસારિત થશે. સાથે Sony LIV પર સ્ટ્રીમિંગ જોઈ શકાશે.

આજે ભારત અને ઇંગ્લેન્ડ વચ્ચે સીરીઝની અંતિમ ટેસ્ટ મેચ લંડનના કેનિન્ગટનમાં રમાશે, મેચનું લાઇવ બ્રૉડકાસ્ટિંગ લંડનના કેનિંગટન ઓવેલ મેદાન પરથી બપોરે 3.30 કલાકે કરાશે.

ભારતીય ઓપનર લોકેશ રાહુલ અને ઇંગ્લેન્ડનો ઓપનર એલિસ્ટર કૂક ભારત-ઇંગ્લેન્ડ શ્રેણીમાં સૌથી વધારે કેચ પકડનાર ફિલ્ડર બનવાથી 1 કેચ દૂર છે. ફક્ત એકનાથ સોલ્કર (1972-73માં 12 કેચ) જ તેનાથી આગળ છે. કૂક અને રાહુલે 11-11 કેચ પકડ્યા છે.

જો અજિંક્ય રહાણેને ટીમમાં સ્થાન મળશે તો ઓવલ ટેસ્ટ તેની કારકિર્દીની 50મી ટેસ્ટ બનશે. તે 50 ટેસ્ટ રમનાર વર્લ્ડનો 280મો અને ભારતનો 32મો ક્રિકેટર બનશે. ઇંગ્લેન્ડનો ઓપનર એલિસ્ટર કૂક નિવૃત્તિની જાહેરાત કરી ચૂક્યો છે. ઓવલ ટેસ્ટ તેની કારકિર્દીની અંતિમ ટેસ્ટ બનશે. કૂકને ઓવલમાં 1000 રન પુરા કરવા માટે ફક્ત 1 રનની જરૂર છે. ફક્ત લેન હટન (1521) અને ગ્રાહમ ગુચ (1097) જ આવી સિદ્ધિ મેળવી ચૂક્યા છે.

વિરાટ કોહલીએ આ શ્રેણીની 4 ટેસ્ટમાં 554 રન બનાવ્યા છે. તે ઇંગ્લેન્ડ પ્રવાસમાં એક શ્રેણીમાં સૌથી વધારે રન બનાવનાર ભારતીય બનવાથી ફક્ત 59 રન દૂર છે. હાલ આ રેકોર્ડ રાહુલ દ્રવિડના નામે છે. દ્રવિડે 2002માં ઇંગ્લેન્ડે પ્રવાસમાં 3 સદીની મદદથી 602 રન બનાવ્યા હતા.

લંડનઃ એક વખત ફરી શ્રેણી ગુમાવવાથી નિરાશ ભારતીય ક્રિકેટ ટીમ આજે એટલે કે 7 સપ્ટેમ્બરથી શરૂ થનારા પાંચમી અને અંતિમ ટેસ્ટમાં ઇંગ્લેન્ડના પૂર્વ કેપ્ટન એલિસ્ટેયર કુકની વિદાય ટેસ્ટમાં જીત સાથે મેદાન પર ઉતરશે. ઇંગ્લેન્ડે પાંચ મેચની શ્રેણી 3-1થી જીતી લીધી છે જેના કારણે આજે ઓવલમાં શરૂ થનારી પાંચમી ટેસ્ટ મેચ માત્ર ઔપચારિક મેચ બની ગઈ છે. જોકે ટીમ ઇન્ડિયા પાંચમી ટેસ્ટ જીતી પ્રતિષ્ઠા બચાવવા પ્રયત્ન કરશે.