WhatsApp યુઝ કરનાર લોકોને મોટો ઝટકો, ChatGPTની સેવા નહિ આપે મેટા, જાણો કારણે

WhatsApp પર યુઝર્સ થર્ડ-પાર્ટી AI ચેટબોટ્સનો ઉપયોગ કરી શકશે નહીં. મેટાના નિર્ણય બાદ, યુઝર્સની પાસે માત્ર મેટા AI નો ઉપયોગ કરવાનો વિકલ્પ રહેશે.

પ્રતીકાત્મક તસવીર

Source : AI

WhatsApp:વોટ્સએપ યુઝર્સ હવે થર્ડ-પાર્ટી એઆઈ ચેટબોટનો ઉપયોગ કરી શકશે નહીં. મેટાએ જાહેરાત કરી છે કે, વોટ્સએપ પર ફક્ત મેટા એઆઈ આસિસ્ટન્ટ જ ઉપલબ્ધ રહેશે, અને અન્ય તમામ થર્ડ-પાર્ટી એઆઈ ચેટબોટ પર પ્રતિબંધ મૂકવામાં આવશે. આ નિર્ણયથી ઓપનએઆઈ અને પરપ્લેક્સિટી જેવી કંપનીઓને મોટો ફટકો પડશે, જે એઆઈ રેસમાં મેટા સાથે સ્પર્ધા કરી રહી છે. આનો અર્થ એ થયો કે યુઝર્સ હવે વોટ્સએપ પર ફક્ત મેટાના એઆઈ ચેટબોટનો ઉપયોગ કરી શકશે.

નવો નિર્ણય ક્યારે આવશે અમલી

મેટાનો આ નિર્ણય આવતા વર્ષની 15 જાન્યુઆરીથી અમલમાં આવશે. આનો અર્થ એ થયો કે 15 જાન્યુઆરી પછી, ચેટજીપીટી અને પરપ્લેક્સિટી એઆઈ જેવા ચેટબોટ્સ હવે વોટ્સએપ પર કામ કરી શકશે નહીં. મેટાએ આને સંબોધવા માટે વોટ્સએપ બિઝનેસ API અપડેટ કર્યું છે. અપડેટ કરેલી પોલિસીમાં  જણાવાયું છે કે, જો કોઈ કંપની ચેટબોટ્સને તેની પ્રાથમિક સેવા તરીકે ઓફર કરે છે, તો તે વોટ્સએપ બિઝનેસ સોલ્યુશનનો ઉપયોગ કરી શકશે નહીં.

શું વ્યવસાયોને અસર થશે?

મેટાએ સ્પષ્ટતા કરી કે, આ નિર્ણયથી ટ્રાવેલ કંપનીઓ અને ઈ-કોમર્સ બ્રાન્ડ્સ સહિતના વ્યવસાયોને કોઈ અસર થશે નહીં, જે ઓટોમેટેડ ગ્રાહક સેવા બોટ્સ અને અન્ય મર્યાદિત પદ્ધતિઓનો ઉપયોગ કરી રહ્યા છે. આ નિર્ણયની સીધી અસર AI સ્ટાર્ટઅપ્સ પર પડશે જે WhatsApp દ્વારા ગ્રાહકોને ચેટ-બેઇઝડ આસિસ્ટન્ટ પ્રોવાઇડ કરે છે.  મેટાએ કહ્યું કે, આ વલણ તેના માળખાગત સુવિધાઓ અને સપોર્ટ સિસ્ટમ્સ પર દબાણ લાવી રહ્યું છે.

મેસેજ લિમિટ પણ સેટ કરશે મેટા

સ્પૈમને રોકવા માટે WhatsApp એક નવો ઉપાય અમલમાં મૂકી રહ્યું છે. આમાં જવાબ ન આપનારા લોકોને મોકલવામાં આવતા સંદેશાઓ પર માસિક મર્યાદા શામેલ હોઈ શકે છે. આ નિર્ણય વ્યવસાયો તેમજ યુઝર્સ ને પણ લાગુ પડશે. આગામી થોડા અઠવાડિયામાં ઘણા દેશોમાં ટ્રાયલ શરૂ થશે.