હવે Instagram પર બધા જ નહીં કરી શકે Live! જાણો કોને મળશે લાઈવ થવાનો અધિકાર

ભારતમાં તાજેતરમાં લોન્ચ થયેલા નવા DM અને બ્લોકિંગ ફીચર પછી આ નવી નીતિ લાગુ કરવામાં આવી છે

પ્રતિકાત્મક તસવીર

Source : એબીપી અસ્મિતા

Instagram Live: ઈન્સ્ટાગ્રામ એ પોતાના લાઇવ-સ્ટ્રીમિંગ ફીચરમાં મોટો ફેરફાર કર્યો છે. હવે ફક્ત તે જ યુઝર્સ લાઇવ થઈ શકશે જેમના ઓછામાં ઓછા 1,000 ફોલોઅર્સ છે. ભારતમાં તાજેતરમાં લોન્ચ થયેલા નવા DM અને બ્લોકિંગ ફીચર પછી આ નવી નીતિ લાગુ કરવામાં આવી છે. જે યુઝર્સ પાસે 1,000થી ઓછા ફોલોઅર્સ છે તેઓ હજુ પણ વીડિયો કોલિંગનો ઉપયોગ કરીને તેમના પ્રેક્ષકો સાથે કનેક્ટ થઈ શકશે પરંતુ તેમના માટે લાઇવનો વિકલ્પ બંધ રહેશે.

નાના ક્રિએટર્સ માટે ઝટકો

આ નવો નિયમ ખાસ કરીને નાના કન્ટેન્ટ ક્રિએટર્સને અસર કરશે જેઓ લાઇવ થઈને તેમના ફોલોઅર્સ સાથે કનેક્ટ થવાનો પ્રયાસ કરતા હતા. હવે તેઓએ તેમના ઓડિયન્સ વધારવા માટે પહેલા 1,000 ફોલોઅર્સ મેળવવા પડશે. કંપનીએ આ ફેરફાર માટે કોઈ સત્તાવાર કારણ આપ્યું નથી, પરંતુ એવું માનવામાં આવે છે કે આ પગલું સંસાધનો બચાવવા અને સિસ્ટમને હળવી રાખવા માટે લેવામાં આવ્યું છે કારણ કે લાઇવ સ્ટ્રીમિંગ ભારે સર્વર અને ડેટાનો ઉપયોગ કરે છે.

વાંધાજનક કન્ટેન્ટ પર પ્રતિબંધ મૂકવાનો પ્રયાસ?

ઘણા યુઝર્સ માને છે કે Instagram આ ફેરફાર દ્વારા વાંધાજનક અથવા અશ્લીલ લાઇવ સામગ્રીને રોકવા માંગે છે. જો કોઈ યુઝરને આ પ્રકારના કન્ટેન્ટ માટે પ્રતિબંધિત કરવામાં આવે છે, તો તેને ફરીથી લાઈવ થવા માટે 1,000 ફોલોઅર્સ એકત્રિત કરવા પડશે. આ રીતે લાઈવ ફીચરને જવાબદાર અને મર્યાદિત બનાવીને તેનો દુરુપયોગ થવાની શક્યતા ઘટાડી શકાય છે.

અન્ય પ્લેટફોર્મ જેવી જ નીતિ

ઇન્સ્ટાગ્રામનું આ પગલું અન્ય સોશિયલ મીડિયા પ્લેટફોર્મ જેવું જ છે. ઉદાહરણ તરીકે, યુટ્યુબ પર લાઈવ સ્ટ્રીમિંગ માટે ઓછામાં ઓછા 50 સબ્સ્ક્રાઇબર્સ જરૂરી છે, જ્યારે ટિકટોક પર આ સંખ્યા 1,000 ફોલોઅર્સ છે.

યુવા યુઝર્સ માટે નવા સિક્યોરિટી ફિચર્સ

આ સાથે ઇન્સ્ટાગ્રામે કિશોર યુઝર્સ માટે DM સેક્શનમાં બે નવા સુરક્ષા ફીચર્સ પણ લોન્ચ કરી છે. હવે જ્યારે કોઈ કિશોર કોઈની સાથે ચેટ શરૂ કરે છે, ભલે તે બંને એકબીજાને ફોલો કરે, તો પણ ઇન્સ્ટાગ્રામ તેમને કેટલીક સુરક્ષા ટિપ્સ બતાવશે. આ તેમને બીજા યુઝરની પ્રોફાઇલ કાળજીપૂર્વક જોવા અને વ્યક્તિગત માહિતી શેર કરતા પહેલા વિચારવાનું કહેશે. એટલું જ નહીં, હવે ચેટ વિંડોમાં બીજી વ્યક્તિનું એકાઉન્ટ ક્યારે બનાવવામાં આવ્યું તે તારીખ (મહિનો અને વર્ષ) પણ દેખાશે. આ યુવા યુઝર્સને નકલી અથવા શંકાસ્પદ એકાઉન્ટ ઓળખવામાં મદદ કરશે.