Gopal Italia : જીત બાદ ગોપાલ પ્રથમવાર પહોંચ્યો વિધાનસભા , શું આપી પહેલી પ્રતિક્રિયા?

Gopal Italia : જીત બાદ ગોપાલ પ્રથમવાર પહોંચ્યો વિધાનસભા , શું આપી પહેલી પ્રતિક્રિયા?

AAP MLA Gopal Italia assembly: આમ આદમી પાર્ટી (AAP) ના વિસાવદરના ધારાસભ્ય ગોપાલ ઇટાલિયા એ ગુજરાત વિધાનસભામાં પોતાના પ્રથમ દિવસે જ ધમાકેદાર એન્ટ્રી કરી. તેઓ હાથમાં પ્લેકાર્ડ લઈને વિધાનસભા પહોંચ્યા અને જનતાના વિવિધ પ્રશ્નોની રજૂઆત કરી. પોતાના ઉત્સાહ અને જવાબદારીની ભાવના વ્યક્ત કરતાં, તેમણે સરકાર સમક્ષ એક સાથે 25 પ્રશ્નો મૂક્યા, જેમાં ટૂંકી નોટિસના પ્રશ્નોનો પણ સમાવેશ થાય છે. આ પગલાથી તેમણે સ્પષ્ટ કરી દીધું કે તેઓ ધારાસભ્ય તરીકે લોકોના પ્રશ્નોને સક્રિય રીતે ઉઠાવવા માટે પ્રતિબદ્ધ છે.

ગુજરાત વિધાનસભાના નવા સત્રના પ્રારંભે, આમ આદમી પાર્ટી (AAP) ના યુવા ધારાસભ્ય ગોપાલ ઇટાલિયા એ પોતાના અલગ અંદાજથી સૌનું ધ્યાન ખેંચ્યું. વિધાનસભામાં પોતાના પ્રથમ દિવસે જ તેઓ એક પ્લેકાર્ડ સાથે આવ્યા, જેમાં રસ્તા પરના ખાડાઓ અને અન્ય જનતાની સમસ્યાઓ દર્શાવવામાં આવી હતી. આ પ્રતીકાત્મક રજૂઆત દ્વારા તેમણે સરકારને લોકોના મૂળભૂત મુદ્દાઓ પર ધ્યાન આપવા માટે અપીલ કરી.

ધારાસભ્ય તરીકે પ્રથમ દિવસ: લોકપ્રશ્નો સાથે એન્ટ્રી

વિધાનસભા પહોંચતા જ ગોપાલ ઇટાલિયા એ મીડિયા સાથે વાતચીત કરી. તેમણે જણાવ્યું કે, “વિસાવદરની જનતાએ મને આ મહાન ગૃહની અંદર બેસવાનો મોકો આપ્યો છે, જેનાથી હું અત્યંત ઉત્સાહ, જિજ્ઞાસા અને થોડી નર્વસનેસ અનુભવું છું.” તેમણે વધુમાં કહ્યું કે, તેમનો મુખ્ય ઉદ્દેશ્ય જનતા માટે કામ કરવાનો છે અને તેઓ આ મોકાનો શ્રેષ્ઠ ઉપયોગ કરવાનો પ્રયાસ કરશે.

એક સાથે 25 પ્રશ્નોની રજૂઆત

પોતાની તૈયારી અને સક્રિયતા દર્શાવતા, ગોપાલ ઇટાલિયા એ પહેલા જ દિવસે સરકાર સમક્ષ 25 જેટલા પ્રશ્નો રજૂ કર્યા. આ પ્રશ્નોમાં ટૂંકી નોટિસ પરના પ્રશ્નોનો પણ સમાવેશ થાય છે.

વિસાવદરમાં AAPના ગોપાલ ઈટાલિયાનો ભવ્ય વિજય થયો હતો

વિસાવદર વિધાનસભા બેઠક પર આમ આદમી પાર્ટી (AAP) ના ઉમેદવાર ગોપાલ ઈટાલિયા નો ભવ્ય વિજય થયો હતો. આ ચૂંટણીમાં તેમણે પોતાના નજીકના હરીફ સામે 17,554 મતની જંગી સરસાઈથી જીત મેળવી હતી.

21 રાઉન્ડની મતગણતરીના અંતે, AAP ને કુલ 75,906 મત મળ્યા હતા, જે બેઠક પરના કુલ મતોના 51 ટકાથી પણ વધુ હતા. બીજી તરફ, ભાજપ ને 58,325 મત મળ્યા હતા, જ્યારે કોંગ્રેસ માત્ર 5,491 મતો પર સમેટાઈ ગઈ હતી. ગોપાલ ઈટાલિયા ની આ પ્રચંડ જીત બાદ, વિસાવદર માં આમ આદમી પાર્ટી ના કાર્યકરોમાં ભારે ઉત્સાહ અને ખુશીનો માહોલ જોવા મળ્યો હતો.