બાયડ પોલીસ હાર્દિકના નિવાસસ્થાને પહોંચીઃ હાર્દિકની 20 મિનિટ સુધી કરી પૂછપરછ

અત્યારે બાયડ પોલીસ હાર્દિકના નિવાસસ્થાનેથી રવાના થઈ છે. હવે બપોર પછી ફરીથી હાર્દિકની પૂછપરછ કરવામાં આવશે. આ પછી હાર્દિક પટેલની ધરપકડ થાય છે કે નહીં, તે ખબર પડશે. નોંધનીય છે કે, 27 જુલાઈ 2015ના રોજ હાર્દિકે તેનપુરમાં સભા કરી હતી. બાયડ પોલીસે બાંભણીયાની સેક્ટર સાત પોલીસ સ્ટેશનમાં ધરપકડ કરી હતી. કલેક્ટરના જાહેરનામાના ભંગ બદલ તેની ધરપકડ કરવામાં આવી હતી.

ઉદેપુરઃ પાટીદાર અનામત આંદોલન બાદના હિંસક તોફાનોમાં મૃત્યુ પામેલા પાટીદાર યુવાનોને શ્રદ્ધાંજલી આપવા માટે બાયડના તેનપુરમાં મંજૂરી વગર યોજાયેલી સભા બદલ બાયડ પોલીસે પાસના કન્વીનર દિનેશ બાંભણીયાની ધરપકડ કરી છે. ત્યારે હવે આ કેસમાં હાર્દિક પટેલની પણ ગમે ત્યારે ધરપકડ થઈ શકે છે. બાયડ પોલીસ ઉદેપુર સ્થિત હાર્દિક પટેલના નિવાસસ્થાને પહોંચી હતી, જ્યાં તેમણે હાર્દિકની 20 મિનિટ સુધી પૂછપરછ કરી હતી.