Moradabad: UPના મુરાદાબાદમાં નર્સ સાથે હેવાનિયત, ડોક્ટરે બંધક બનાવી આચર્યું દુષ્કર્મ

Moradabad: નર્સના પિતાની ફરિયાદના આધારે પોલીસે ડોક્ટર સહિત ત્રણ લોકો સામે ગુનો નોંધ્યો છે

પ્રતિકાત્મક તસવીર

Moradabad: ઉત્તર પ્રદેશના મુરાદાબાદની AVM હોસ્પિટલમાં શનિવારે રાત્રે એક નર્સ સાથે બનેલી જઘન્ય ઘટનાથી લોકો હચમચી ગયા હતા. ડોક્ટર શાહનવાઝે એક નર્સને બંધક બનાવીને તેની સાથે દુષ્કર્મ આચર્યાની ઘટના બની હતી. આ કૃત્ય પછી નર્સે રવિવારે સવારે તેના પરિવારને આ દર્દનાક ઘટના વિશે જાણ કરી હતી. નર્સના પિતાની ફરિયાદના આધારે પોલીસે ડોક્ટર સહિત ત્રણ લોકો સામે ગુનો નોંધ્યો છે. આ કેસમાં પોલીસે ડોક્ટરની ધરપકડ કરી છે જ્યારે અન્ય બે આરોપી વોર્ડ બોયની પૂછપરછ કરવામાં આવી રહી છે.

દિલારી પોલીસ સ્ટેશન વિસ્તારના એક ગામના રહેવાસીએ પોલીસને ફરિયાદ કરી કે તેમની 20 વર્ષની પુત્રી છેલ્લા 10 મહિનાથી હોસ્પિટલમાં નર્સ તરીકે કામ કરે છે. શનિવારે સાંજે સાતેક વાગ્યે તેમની પુત્રી ફરજ માટે હોસ્પિટલમાં ગઈ હતી. આરોપ છે કે હોસ્પિટલમાં કામ કરતી એક નર્સે તેને છેતરીને કહ્યું કે ડોક્ટર શાહનવાઝે તેને પોતાના રૂમમાં બોલાવે છે.

જ્યારે પીડિતાએ ડોક્ટરના રૂમમાં જવાની ના પાડી તો વોર્ડ બોય જુનેદ અને મેહનાઝ તેને બળજબરીથી ડોક્ટરના રૂમમાં લઈ ગયા અને બહારથી દરવાજો બંધ કરી દીધો. રાત્રે લગભગ 12 વાગે ડોક્ટરે નર્સને બંધક બનાવીને તેના પર દુષ્કર્મ આચર્યું હતું.  ડોક્ટરે જાનથી મારી નાખવાની ધમકી પણ આપી હતી. ડોક્ટરે નર્સનો મોબાઈલ પણ પોતાની પાસે રાખ્યો હતો.

પોલીસ કાર્યવાહી અને આરોગ્ય વિભાગની તપાસ

રવિવારે સવારે જ્યારે હોસ્પિટલની હેડ નર્સ આવી ત્યારે પીડિતાએ તેને પોતાની આપવીતિ વર્ણવી હતી અને તેને ઘરે મોકલી દેવામાં આવી હતી. પીડિતા ઘરે પહોંચી અને તેના પરિવારને સમગ્ર ઘટનાની જાણ કરી હતી. પોલીસે ડોક્ટર શાહનવાઝ, મેહનાઝ અને જુનૈદ વિરુદ્ધ બળાત્કાર, એસસી/એસટી એક્ટ અને અન્ય કલમો હેઠળ કેસ નોંધ્યો છે. આરોપી ડૉક્ટરની ધરપકડ કરવામાં આવી છે અને પીડિતાની મેડિકલ તપાસ પણ કરવામાં આવી છે. ઈન્ચાર્જ ઈન્સ્પેક્ટર રાજીવ ચૌધરીએ જણાવ્યું કે પીડિતાનું નિવેદન હજુ સુધી નોંધવામાં આવ્યું નથી.

સીએમઓની સૂચના પર આરોગ્ય વિભાગની ટીમે પોલીસ સાથે રવિવારે સાંજે હોસ્પિટલનું નિરીક્ષણ કર્યું હતું. સીએચસી સુપરિન્ટેન્ડેન્ટે ડો.ઇન્તેખાબ આલમ, ફાર્માસિસ્ટ કમલ સિંહ રાવત અને આશુ ગુપ્તાની ટીમને હોસ્પિટલમાં મોકલી અને ત્યાં દાખલ દર્દીઓની સ્થિતિ વિશે પૂછપરછ કરી હતી. હોસ્પિટલ સીલ કરવામાં આવશે તો દર્દીઓને ખસેડવાની વ્યવસ્થા કરવામાં આવશે. હોસ્પિટલમાં નવ જેટલા દર્દીઓ દાખલ થયા હતા. સીઓ રાજેશ કુમારે જણાવ્યું કે આરોપી ડોક્ટર સહિત ત્રણ લોકો વિરુદ્ધ રિપોર્ટ નોંધવામાં આવ્યો છે. ડૉ. શાહનવાઝ પાસે BUMS ડિગ્રી હોવાનું કહેવાય છે. આ ઘટના હોસ્પિટલમાં બની રહેલી ગંભીર ઘટનાઓ તરફ ઈશારો કરે છે અને આ અંગે લોકોમાં ભારે રોષ જોવા મળી રહ્યો છે.