વડાપ્રધાન ઇન્ટર્નશીપ યોજનાના બીજા તબક્કા માટે અરજી શરૂ, રોજગારની સંભાવના વધશે

બીજા તબક્કામાં ભારતના 730થી વધુ જિલ્લાઓમાં ટોચની કંપનીઓમાં એક લાખથી વધુ ઇન્ટર્નશિપની તકો પૂરી પાડવામાં આવશે.

પ્રતિકાત્મક તસવીર

Source : PM Internship scheme

પ્રધાનમંત્રી ઇન્ટર્નશિપ યોજના (PMIS) ના બીજા તબક્કા માટે અરજી શરૂ થઈ ગઈ છે. કોર્પોરેટ બાબતોના મંત્રાલયે ગુરુવારે જણાવ્યું હતું કે બીજા તબક્કામાં ભારતના 730થી વધુ જિલ્લાઓમાં ટોચની કંપનીઓમાં એક લાખથી વધુ ઇન્ટર્નશિપની તકો પૂરી પાડવામાં આવશે.

પ્રથમ તબક્કામાં છ લાખથી વધુ અરજીઓ મળી હતી

પ્રથમ તબક્કામાં છ લાખથી વધુ અરજીઓ મળી હતી. તેલ, ગેસ અને ઉર્જા, બેંકિંગ અને નાણાકીય સેવાઓ, મુસાફરી અને આરોગ્યસંભાળ, ઓટોમોટિવ, ધાતુઓ, ખાણકામ ઉત્પાદન અને ઔદ્યોગિક, ફાસ્ટ-મુવિંગ કન્ઝ્યુમર ગુડ્સ (FMCG) અને ઘણા વધુ ક્ષેત્રોની 300થી વધુ ટોચની કંપનીઓએ ભારતીય યુવાનોને અનુભવ મેળવવા, વ્યાવસાયિકો સાથે નેટવર્ક બનાવવા અને તેમની રોજગારક્ષમતા વધારવા માટે ઇન્ટર્નશિપની તકો ઓફર કરી છે.

લાયક યુવાનો તેમના પસંદગીના જિલ્લા, રાજ્ય, ક્ષેત્ર, પ્રદેશના આધારે ઇન્ટર્નશિપ માટે પસંદગી કરી શકે છે. મંત્રાલયે જણાવ્યું હતું કે બીજા તબક્કામાં દરેક અરજદાર અરજીની છેલ્લી તારીખ સુધીમાં વધુમાં વધુ ત્રણ ઇન્ટર્નશિપ માટે અરજી કરી શકે છે.

મંત્રાલયના જણાવ્યા અનુસાર, બીજા તબક્કા માટે ઇન્ટર્નશિપ માટે જરૂરી પાત્રતા માપદંડોના આધારે કોલેજો, યુનિવર્સિટીઓ, ITI, જોબ મેળાઓ વગેરેમાં મહત્તમ ઇન્ટર્નશિપ તકો ધરાવતા જિલ્લાઓમાં ભારતભરમાં 70થી વધુ IEC કાર્યક્રમોનું આયોજન કરવામાં આવી રહ્યું છે. વધુમાં યુવાનો માટે તકોની ઉપલબ્ધતા અને સુસંગતતાના આધારે વિવિધ પ્લેટફોર્મ અને પ્રભાવકો દ્વારા રાષ્ટ્રીય સ્તરે ડિજિટલ ઝુંબેશ ચલાવવામાં આવી રહી છે.

પ્રધાનમંત્રી ઇન્ટર્નશિપ યોજનાના બીજા તબક્કામાં કાર્યક્રમની પહોંચને વિસ્તૃત કરવા માટે મહારાષ્ટ્ર, ઝારખંડ અને બિહાર સહિત વિવિધ રાજ્યોમાં 21-24 વર્ષની વય જૂથના યુવાનો સાથે ઇન્ટરેક્ટિવ સત્રોનું આયોજન કરવામાં આવી રહ્યું છે. કોર્પોરેટ બાબતોના મંત્રાલય (MCA) અનુસાર, આ યોજના 25 ક્ષેત્રો અને 740થી વધુ જિલ્લાઓમાં અરજદારોને રિલાયન્સ, HDFC બેન્ક, ઇન્ડિયન ઓઇલ અને મારુતિ સુઝુકી જેવી ટોચની કંપનીઓમાં 1,15,000થી વધુ ઇન્ટર્નશિપ તકો પ્રદાન કરે છે.

MCA તરફથી એક અખબારી નિવેદનમાં કહેવામાં આવ્યું છે કે “તેલ, ગેસ અને ઉર્જા, બેંકિંગ અને નાણાકીય સેવાઓ, મુસાફરી, ઓટોમોટિવ, ધાતુઓ અને ખાણકામ, ઉત્પાદન અને ઔદ્યોગિક ક્ષેત્ર, ફાસ્ટ-મુવિંગ કન્ઝ્યુમર ગુડ્સ (FMCG) સહિતના ક્ષેત્રોની 300થી વધુ ટોચની કંપનીઓએ ભારતીય યુવાનોને વાસ્તવિક દુનિયાનો અનુભવ મેળવવા, વ્યાવસાયિકો સાથે નેટવર્ક બનાવવા અને તેમની રોજગારક્ષમતા વધારવા માટે ઇન્ટર્નશિપની તકો ઓફર કરી છે.”