Ahmedabad: અમદાવાદ મનપાએ ફ્લાવર શોના સમયમાં કર્યો ફેરફાર, જાણો કેટલા વાગ્યા સુધી જોઇ શકાશે?

Ahmedabad: અમદાવાદ મહાનગરપાલિકાએ ફ્લાવર શોને લઇને મહત્વનો નિર્ણય કર્યો હતો

ફ્લાવર શો

Ahmedabad: અમદાવાદ મહાનગરપાલિકાએ ફ્લાવર શોને લઇને મહત્વનો નિર્ણય કર્યો હતો. હવે અમદાવાદમાં ફ્લાવર શોના સમયમાં ફેરફાર કરવામાં આવ્યો છે. રવિવારના મોટી સંખ્યામાં નાગરિકો આવતા મહાપાલિકાએ નિર્ણય બદલવો પડ્યો છે. હવે ફ્લાવર શો રાત્રિના 11 વાગ્યા સુધી ચાલુ રહેશે એટલે કે રાત્રિના 10 વાગ્યા સુધી આવનારા નાગરિકોને ફ્લાવર શોની એન્ટ્રી ટિકીટ મળશે.

આ મુલાકાતીઓ રાત્રિના 11 વાગ્યા સુધી ફ્લાવર શો નિહાળી શકશે. અગાઉ મહાપાલિકાએ નિર્ણય કર્યો હતો કે રાત્રિના 9 વાગ્યા સુધી ટિકિટ વિતરણ કરવામાં આવશે અને રાત્રિના 10 વાગ્યે ફ્લાવર શો બંધ કરાશે. જોકે મુલાકાતીઓના સતત ધસારાના કારણે હવે મહાપાલિકાએ મહત્વનો નિર્ણય લીધો હતો.

અમદાવાદના આ ફ્લાવર શોમાં શહેરીજનોને સરદાર વલ્લભભાઈ પટેલ, નવા સંસદ ભવનની પ્રતિકૃતિ, મોઢેરાના સૂર્યમંદિરની અને વિક્રમ લેન્ડર-ચંદ્રયાન 3ની પ્રતિકૃતિ જોવા મળી રહી છે જેને અલગ જ આકર્ષણ ઉભુ કર્યું છે. શોમાં ઓલમ્પિક, વડનગર તોરણની થીમથી  મુખ્ય પ્રવેશદ્વાર બનાવાયો છે જ્યારે બાળકો માટેના કાર્ટૂન કેરેક્ટર, વાઇબ્રન્ટ ગુજરાત, પતંગિયા, સાત ઘોડાની પ્રતિકૃતિ, જેવી વિવિધ પ્રતિકૃતિઓ બનાવવામાં આવી છે.

મુખ્યમંત્રી ભૂપેન્દ્ર પટેલના હસ્તે સાબરમતી રિવરફ્રન્ટ ખાતે ‘વાઇબ્રન્ટ અમદાવાદ ફ્લાવર શો-2024’ પ્રજાજનો માટે ખુલ્લો મૂકવામાં આવ્યો હતો. એ ઉદઘાટન બાદ મુખ્ય મંત્રી સહિત ઉપસ્થિત મહાનુભાવોએ ફ્લાવર શોનાં વિવિધ આકર્ષણો નિહાળ્યાં હતાં. અનેકવિધ સ્કલ્પચરને મુખ્ય મંત્રી સહિત સૌએ બિરદાવ્યા હતા.

અમદાવાદ મ્યુનિસિપલ કોર્પોરેશન દ્વારા આયોજિત વાઈબ્રન્ટ અમદાવાદ ફ્લાવર શો 30 ડિસેમ્બરે મુખ્ય મંત્રી ભુપેન્દ્ર પટેલ,  મેયર પ્રતિભાબહેન જૈન સહિતના મહાનુભાવોની ઉપસ્થિતિમાં ખુલ્લો મુકાયા બાદ 15 જાન્યુઆરી, 2024 સુધી લોકો નિહાળી શકશે. અમદાવાદમાં સૌથી વધારે આકર્ષણ જમાવતા ફ્લાવર શો 2024માં અનેક ફૂલોની વેરાઇટી મૂકવામાં આવી છે. બાગ બગીચાને સજાવતી સામગ્રીના સ્ટોલ પણ મુકવામાં આવ્યા છે.

કાંકરિયા કાર્નિવલ પૂર્ણ 

અમદાવાદ મ્યુનિસિપલ કોર્પોરેશન તરફથી દર વર્ષની જેમ 25 ડિસેમ્બરથી કાંકરિયા કાર્નિવલનું આયોજન કરવામાં આવ્યું હતુ. કાંકરિયા લેક ફ્રન્ટ ખાતે 25 થી 31 ડિસેમ્બર સુધી યોજાનાર આ કાર્નિવલ 'વસુદેવ કુટુંબકમ, એક ધરતી, એક પરિવાર, એક ભવિષ્ય' થીમ પર આધારિત હતો. આ વર્ષે ધનુષ થીમ આધારિત પ્રવેશ દ્વાર અને ચંદ્રયાન-3ની થીમ આધારિત સેલ્ફી પૉઈન્ટ આકર્ષણનું કેન્દ્ર બન્યા હતા.કાંકરિયા પરિસરમાં યોગા, અરોબિક્સ, ઝુમ્બા લાફિંગમાં કુલ 4057 કલાકારો તથા મુલાકાતીઓએ ભાગ લીધો હતો.