કોલ્ડપ્લે કોન્સર્ટ માટે નરેન્દ્ર મોદી સ્ટેડિયમમાં અભેદ્ય સુરક્ષા કવચ: 3800થી વધુ પોલીસકર્મી, NSG અને SDRF ખડેપગે

પોલીસ કમિશનર સહિતના ઉચ્ચ અધિકારીઓએ સ્ટેડિયમની મુલાકાત લઈને સુરક્ષા વ્યવસ્થાનું જાત નિરીક્ષણ કર્યું હતું અને બંદોબસ્તની તૈયારીઓની સમીક્ષા કરી હતી.

કોલ્ડપ્લે કોન્સર્ટ માટે નરેન્દ્ર મોદી સ્ટેડિયમમાં અભેદ્ય સુરક્ષા કવચ

Source : Instagram

Coldplay concert security 2025: અમદાવાદના નરેન્દ્ર મોદી સ્ટેડિયમ ખાતે આગામી 25 અને 26 જાન્યુઆરીના રોજ યોજાનારા કોલ્ડપ્લે કોન્સર્ટ માટે સુરક્ષાનો અભેદ્ય કિલ્લો તૈયાર કરવામાં આવ્યો છે. બે દિવસ ચાલનારા આ મ્યુઝિકલ ફેસ્ટમાં બે લાખથી વધુ લોકો ઉમટે તેવી સંભાવના છે, જેને ધ્યાનમાં રાખીને પોલીસ તંત્રએ ફૂલપ્રૂફ પ્લાન બનાવ્યો છે.

પોલીસ કમિશનર સહિતના ઉચ્ચ અધિકારીઓએ સ્ટેડિયમની મુલાકાત લઈને સુરક્ષા વ્યવસ્થાનું જાત નિરીક્ષણ કર્યું હતું અને બંદોબસ્તની તૈયારીઓની સમીક્ષા કરી હતી. આ દરમિયાન, સુરક્ષામાં કોઈ કચાશ ન રહી જાય તે માટે જરૂરી સૂચનાઓ પણ આપવામાં આવી હતી.

ચુસ્ત બંદોબસ્ત અને આધુનિક મોનિટરિંગ:

• કોન્સર્ટમાં આવનાર દરેક વ્યક્તિનું સઘન ચેકિંગ કરવામાં આવશે.
• મહિલાઓની સુરક્ષાને ધ્યાનમાં રાખીને વિશેષ વ્યવસ્થા કરવામાં આવી છે, જેમાં વધુ ચેકિંગ કાઉન્ટર ઊભા કરાશે.
• સ્ટેડિયમ અને તેની આસપાસના વિસ્તારો પર 400થી વધુ સીસીટીવી કેમેરાથી સતત નજર રાખવામાં આવશે.
• 26 જાન્યુઆરીના સંદર્ભમાં ઇન્ટેલિજન્સ બ્યુરો (IB) દ્વારા આપવામાં આવેલા એલર્ટને ધ્યાનમાં રાખીને સુરક્ષા વધુ સઘન કરવામાં આવી છે.
• કોન્સર્ટમાં તૈનાત પોલીસ કર્મચારીઓ ખાસ તાલીમ પામેલા છે.

જંગી પોલીસ દળ અને વિશેષ ટુકડીઓ:

કોન્સર્ટની સુરક્ષામાં 3825 પોલીસ કર્મચારીઓનો કાફલો તૈનાત રહેશે, જેમાં 3581 પોલીસ કોન્સ્ટેબલ, 142 PSI, 63 PI, 25 ACP અને 14 DCP કક્ષાના અધિકારીઓનો સમાવેશ થાય છે. આ ઉપરાંત, ક્વિક રિસ્પોન્સ ટીમ (QRT)ની 3 ટીમ, નેશનલ સિક્યુરિટી ગાર્ડ (NSG)ની 1 ટીમ, સ્ટેટ ડિઝાસ્ટર રિસ્પોન્સ ફોર્સ (SDRF)ની 1 ટીમ અને બોમ્બ ડિસ્પોઝલ સ્ક્વોડ (BDDS)ની 10 ટીમ પણ સ્ટેડિયમમાં હાજર રહેશે.

અન્ય સુરક્ષા વ્યવસ્થાઓ:

• સ્ટેડિયમમાં જ કામચલાઉ હોસ્પિટલ અને એમ્બ્યુલન્સની વ્યવસ્થા કરવામાં આવી છે, જેથી કોઈપણ મેડિકલ ઇમરજન્સીને તાત્કાલિક પહોંચી શકાય.
• સ્ટેડિયમની ફરતે મજબૂત બેરિકેડિંગ કરવામાં આવ્યું છે.
• દર્શકો માટે પીવાના પાણીની મફત વ્યવસ્થા કરવામાં આવી છે.
• ટિકિટમાં અનેક સેફ્ટી ફીચર્સ હોવાથી નકલી ટિકિટની સંભાવના નહિવત્ છે.

આ તમામ સુરક્ષા વ્યવસ્થાઓ સાથે, કોલ્ડપ્લે કોન્સર્ટ એક યાદગાર અને સુરક્ષિત અનુભવ બની રહેશે તેવી આશા છે.

ઘાટલોડિયામાં કોલ્ડપ્લે કોન્સર્ટની ટિકિટની કાળા બજારીનો પર્દાફાશ, બે ઝડપાયા

અમદાવાદમાં આગામી 25 અને 26 જાન્યુઆરીના રોજ યોજાનારા કોલ્ડપ્લે કોન્સર્ટની ટિકિટોની ભારે માંગ વચ્ચે કાળા બજારી કરતા બે આરોપીઓને ઘટલોડિયા પોલીસે ઝડપી પાડ્યા છે. પોલીસે શિવમ રાવલ અને રોહન આહુજા નામના બે વ્યક્તિઓની ધરપકડ કરી છે, જેઓ કોન્સર્ટની ટિકિટો બ્લેકમાં વેચી રહ્યા હતા. પોલીસે આરોપીઓ પાસેથી કુલ 6 ટિકિટ જપ્ત કરી છે, જેની કુલ કિંમત રૂ. 45,000 છે. પોલીસ તપાસમાં જાણવા મળ્યું છે કે આરોપીઓ રૂ. 7500ની કિંમતની એક ટિકિટ બમણાથી પણ વધુ ભાવે વેચી રહ્યા હતા. કોલ્ડપ્લે કોન્સર્ટની ટિકિટોનું વેચાણ શરૂ થતાની સાથે જ હાઉસફુલ થઈ ગયું હતું. આ સ્થિતિનો ગેરલાભ ઉઠાવીને કેટલાક લોકો કાળા બજારીમાં સંડોવાયા હતા અને ટિકિટોના ઊંચા ભાવ વસૂલ કરી રહ્યા હતા. પોલીસે આ મામલે કડક કાર્યવાહી કરીને આરોપીઓની ધરપકડ કરી છે અને કાળા બજારીના આ રેકેટનો પર્દાફાશ કર્યો છે.

આ પણ વાંચો...