One Nation One Rate: આખા દેશમાં એક જ હશે ગોલ્ડના રેટ, જલદી થવા જઇ રહ્યો છે મોટો ફેરફાર
One Nation One Rate: દેશના વિવિધ શહેરોમાં સોના-ચાંદીના ભાવ પણ અલગ-અલગ હોય છે
One Nation One Rate: દેશના વિવિધ શહેરોમાં સોના-ચાંદીના ભાવ પણ અલગ-અલગ હોય છે. દરેક રાજ્યના અલગ-અલગ ટેક્સ ઉપરાંત, સોના-ચાંદીના દરમાં બીજી ઘણી વસ્તુઓ પણ ઉમેરવામાં આવે છે. આ કારણે રાજ્યોમાં આ કીમતી ધાતુઓના ભાવ પણ અલગ-અલગ હોય છે. જો કે હવે દેશમાં મોટો બદલાવ આવવાનો છે. ટૂંક સમયમાં જ સમગ્ર દેશમાં 'વન નેશન, વન રેટ' નીતિ લાગુ થવા જઈ રહી છે. આ પછી જો તમે દેશમાં ક્યાંય પણ સોનું ખરીદો છો તો તમને સમાન દર મળશે. જો આમ થશે તો સોનાના વેપારીઓ અને જ્વેલર્સ માટે પણ સરળ બનશે. દેશભરના તમામ મોટા જ્વેલર્સ પણ આને લાગુ કરવા સહમત થયા છે.
જેમ એન્ડ જ્વેલરી કાઉન્સિલ પણ સમર્થનમાં આવ્યું
જેમ એન્ડ જ્વેલરી કાઉન્સિલ (GJC) એ પણ સોનાના ભાવને નિયંત્રિત કરવા માટે લાવવામાં આવેલી 'વન નેશન વન રેટ' નીતિને સમર્થન આપ્યું છે. તેનો ઉદ્દેશ્ય સમગ્ર દેશમાં સોનાની સમાન કિંમતો રાખવાનો છે. મીડિયા રિપોર્ટ્સ અનુસાર, સપ્ટેમ્બર 2024માં યોજાનારી બેઠકમાં આ અંગે સત્તાવાર જાહેરાત કરવામાં આવી શકે છે. જોકે, આ પોલિસી લાગુ કર્યા બાદ પડકારોનો સામનો કરવા માટે ગોલ્ડ ઈન્ડસ્ટ્રી નવી યોજનાઓ બનાવી રહી છે.
વન નેશન, વન રેટ પોલિસીથી શું બદલાવ આવશે?
આ યોજના હેઠળ કેન્દ્ર સરકાર સમગ્ર દેશમાં સોનાની કિંમતો સમાન કરવા માંગે છે. આ પોલિસીના અમલ પછી તમે દિલ્હી, મુંબઈ, ચેન્નઈ અથવા કોલકાતા જેવા મેટ્રો શહેરમાં હોવ અથવા નાના શહેરમાં સોનું ખરીદો તમારે સમાન કિંમત ચૂકવવી પડશે. આ નીતિ હેઠળ સરકાર નેશનલ બુલિયન એક્સચેન્જ બનાવશે જે દરેક જગ્યાએ સોનાની સમાન કિંમતો નક્કી કરશે. તેમજ જ્વેલર્સે આ ભાવે સોનું વેચવું પડશે.
સોનાના ભાવ ઘટી શકે છે, જ્વેલર્સ પર પણ નિયંત્રણ રહેશે
આ નીતિના અમલીકરણથી બજારમાં પારદર્શિતા વધશે. સોનાના ભાવમાં તફાવતને કારણે તેની કિંમતો પણ ઘટી શકે છે. આ ઉપરાંત સોનાના વેચાણ માટે ક્યારેક મનસ્વી ભાવ વસૂલનારા જ્વેલર્સ પર પણ અંકુશ આવશે. નોંધનીય છે કે છેલ્લા કેટલાક વર્ષોમાં સોનાના ભાવમાં ધરખમ વધારો થયો છે. હાલમાં 24 કેરેટ શુદ્ધ સોનાની કિંમત 74000 રૂપિયા પ્રતિ 10 ગ્રામ છે.
ટ્રેન્ડિંગ સમાચાર
ટોપ સ્ટોરી
