Paytm નો IPO 8 નવેમ્બરે ખુલશે, જાણો કેટલી છે પ્રાઈસ બેન્ડ અને ક્યારે થશે માર્કેટમાં લિસ્ટ

Paytm ની મૂળ કંપની One97 Communications છે. તેથી, Paytmના શેરને One97 કોમ્યુનિકેશનના નામે સ્ટોક એક્સચેન્જમાં લિસ્ટ કરવામાં આવશે.

પ્રતિકાત્મક તસવીર

મર્ચન્ટ પેમેન્ટ કંપની Paytmના IPOની તારીખ નક્કી કરવામાં આવી છે. Paytm નો IPO 8 નવેમ્બરે સબસ્ક્રિપ્શન માટે ખુલશે અને 10 નવેમ્બરે બંધ થશે. કંપનીએ તેની કિંમત 2080 થી 2150 રૂપિયા સુધી નક્કી કરી છે. આ પછી, શેર 18 નવેમ્બરના રોજ સ્ટોક એક્સચેન્જમાં લિસ્ટ થઈ શકે છે. ભારતના ઈતિહાસમાં આ અત્યાર સુધીનો સૌથી મોટો આઈપીઓ બનવા જઈ રહ્યો છે.

શેર One97 કોમ્યુનિકેશનના નામે લિસ્ટ થશે

Paytm ની મૂળ કંપની One97 Communications છે. તેથી, Paytmના શેરને One97 કોમ્યુનિકેશનના નામે સ્ટોક એક્સચેન્જમાં લિસ્ટ કરવામાં આવશે. Paytm એ પણ તેના IPOનું કદ રૂ. 16,600 કરોડથી વધારીને રૂ. 18,300 કરોડ કર્યું છે. Paytm ઓફર ફોર સેલ (OFS) દ્વારા રૂ. 10 હજાર કરોડ એકત્ર કરવાની યોજના ધરાવે છે, જ્યારે નવા શેર્સ (IPO) દ્વારા રૂ. 8,300 કરોડ એકત્ર કરવાની યોજના ધરાવે છે.

અગાઉ સમાન રકમ એકત્ર કરવાની યોજના હતી

Paytmની અગાઉ નવા શેર અને ઓફર ફોર સેલ દ્વારા સમાન રકમ એકત્ર કરવાની યોજના હતી, પરંતુ IPO માર્કેટમાં જોવા મળતા ઉત્સાહને કારણે કંપનીએ ઓફર ફોર સેલમાંથી એકત્ર કરવા માટેની રકમમાં રૂ. 2,000 કરોડનો વધારો કર્યો છે. ઓફર ફોર સેલનો અર્થ એ છે કે કંપનીના હાલના રોકાણકારો IPOમાં તેમનો હિસ્સો વેચશે.

OFS માં કોણ કેટલું વેચાણ કરશે?

કંપનીના ટોચના એક્ઝિક્યુટિવ વિજય શેખર શર્મા રૂ. 402 કરોડના શેરનું વેચાણ કરશે

એન્ટફિન ઓપન માર્કેટમાં તેના રૂ. 4,704 કરોડના શેરનું વેચાણ કરશે

ચીનનું અલીબાબા ગ્રૂપ તેની હિસ્સેદારીમાંથી રૂ. 784 કરોડના શેર પાછા ખેંચશે

આ સિવાય ઘણી વધુ કંપનીઓ IPOમાં Paytmમાં તેમનો હિસ્સો વેચશે.

કોલ ઈન્ડિયા પાસે સૌથી મોટી ઈસ્યુનો રેકોર્ડ છે

પેટીએમ પહેલા કોલ ઈન્ડિયા સૌથી મોટો આઈપીઓ લાવી હતી. કોલ ઈન્ડિયાએ 2010માં આઈપીઓ દ્વારા રૂ. 15,299 કરોડ એકત્ર કર્યા હતા. જોકે, Paytmનો રેકોર્ડ બહુ લાંબો સમય ચાલશે નહીં, કારણ કે LIC આ નાણાકીય વર્ષમાં તેનો IPO લાવવા જઈ રહી છે. આ દ્વારા LIC 80 હજાર કરોડથી 1 લાખ કરોડ રૂપિયાની રકમ એકત્ર કરી શકે છે.

નવેમ્બર હિટ રહેશે

ભારતીય IPO માર્કેટની દ્રષ્ટિએ અત્યાર સુધીની સૌથી વધુ રકમ એકત્ર કરવામાં નવેમ્બર મહિનો ટોચ પર રહેશે. નવેમ્બર મહિનાની શરૂઆત 3 IPO આવી રહ્યા છે. 1 નવેમ્બરના રોજ પોલિસીબજાર સાથે વધુ બે કંપનીઓ આશરે રૂ. 6,500 કરોડ એકત્ર કરવા બજારમાં પ્રવેશ કરશે. તે જ સમયે, Paytm આ મહિનામાં 18,300 કરોડ રૂપિયા એકત્ર કરશે. આવી સ્થિતિમાં આ ચાર આઈપીઓથી નવેમ્બરમાં લગભગ 25 હજાર કરોડ રૂપિયા એકત્ર થશે.