Rule Change: એક માર્ચથી દેશભરમાં લાગુ થશે આ પાંચ મોટા ફેરફારો, તમારા ખિસ્સા પર પડશે અસર
LPG સિલિન્ડરના ભાવથી લઈને વીમા પ્રીમિયમ પેમેન્ટ્સની પદ્ધતિઓ સુધી દરેક બાબતમાં ફેરફાર થવાનો છે.
ફેબ્રુઆરી મહિનો પૂરો થવાનો છે અને એક નવો મહિનો શરૂ થવાનો છે. દર મહિનાની જેમ માર્ચ મહિનો પણ ઘણા મોટા ફેરફારો (Rule Change From 1st March) સાથે શરૂ થવાનો છે. LPG સિલિન્ડરના ભાવથી લઈને વીમા પ્રીમિયમ પેમેન્ટ્સની પદ્ધતિઓ સુધી દરેક બાબતમાં ફેરફાર થવાનો છે. આ સાથે મ્યુચ્યુઅલ ફંડ ખાતામાં નોમિની ઉમેરવા સંબંધિત નિયમમાં પણ મોટો ફેરફાર જોવા મળશે. ચાલો જાણીએ આવા પાંચ મોટા ફેરફારો વિશે જે પહેલી તારીખથી લાગુ થવા જઈ રહ્યા છે.
LPG સિલિન્ડરના ભાવ
1,માર્ચથી પહેલો ફેરફાર LPG ગેસ સિલિન્ડરના ભાવમાં સુધારાના સ્વરૂપમાં જોઈ શકાય છે. ઓઇલ માર્કેટિંગ કંપનીઓ દર મહિનાની પહેલી તારીખે આ ફેરફારો કરે છે. આ પહેલા 1 ફેબ્રુઆરીના રોજ બજેટમાં કંપનીઓએ 19 કિલોગ્રામના કોમર્શિયલ ગેસ સિલિન્ડરના ભાવમાં 7 રૂપિયાનો ઘટાડો કર્યો હતો. જોકે, દેશમાં 14 કિલોગ્રામના ઘરેલુ ગેસ સિલિન્ડરના ભાવ લાંબા સમયથી સ્થિર રહ્યા છે અને આગામી મહિનામાં રાહત મળવાની અપેક્ષા છે.
ATF ના ભાવમાં સુધારો
દર મહિનાની પહેલી તારીખે તેલ વિતરણ કંપનીઓ દ્વારા LPG સિલિન્ડરના ભાવની સાથે એર ટર્બાઇન ફ્યુઅલ (ATF) ના ભાવ પણ સુધારવામાં આવે છે. આવી સ્થિતિમાં 1 માર્ચ, 2025ના રોજ પણ ઉડ્ડયન ઇંધણના ભાવમાં ફેરફાર જોવા મળી શકે છે. આમાં થયેલા ફેરફારોની સીધી અસર હવાઈ મુસાફરોના ખિસ્સા પર જોવા મળી શકે છે. વાસ્તવમાં જ્યારે ઇંધણના ભાવ ઘટે છે ત્યારે એરલાઇન કંપનીઓ તેમના ભાડા ઘટાડી શકે છે અને જો ભાવ વધે છે તો તે વધારી પણ શકે છે.
UPI સંબંધિત ફેરફાર
આગામી ફેરફાર વીમા પ્રીમિયમ ચુકવણી પ્રણાલી સાથે સંબંધિત છે. 1 માર્ચ, 2025થી યુનિફાઇડ પેમેન્ટ ઇન્ટરફેસ (UPI) માં ફેરફાર થવા જઈ રહ્યો છે, જેનાથી વીમા પ્રીમિયમની ચુકવણી વધુ સરળ બનશે. UPI સિસ્ટમમાં ઇન્શ્યોરન્સ-ASB નામની એક નવી સુવિધા ઉમેરવામાં આવી રહી છે. આ દ્વારા જીવન અને આરોગ્ય વીમા પોલિસીધારકો તેમના પ્રીમિયમ ચુકવણી માટે અગાઉથી પૈસા બ્લોક કરી શકશે. પોલિસીધારકની મંજૂરી પછી ખાતામાંથી પૈસા આપમેળે કપાઈ જશે. આ અંગે IRDAI એ 18 ફેબ્રુઆરીના રોજ એક પરિપત્ર બહાર પાડ્યો હતો અને તેનો ઉદ્દેશ્ય વીમા ચુકવણીમાં વિલંબ ઘટાડવાનો છે.
મ્યુચ્યુઅલ ફંડ ખાતામાં 10 નોમિની
1, તારીખથી મ્યુચ્યુઅલ ફંડ અને ડીમેટ ખાતામાં નોમિની ઉમેરવા સંબંધિત નિયમોમાં ફેરફાર થઈ શકે છે. આ હેઠળ એક રોકાણકાર ડીમેટ અથવા મ્યુચ્યુઅલ ફંડ ફોલિયોમાં વધુમાં વધુ 10 નોમિની ઉમેરી શકે છે. આ સંદર્ભમાં બજાર નિયમનકાર સેબીની નવી માર્ગદર્શિકા 1 માર્ચ, 2025થી અમલમાં આવી શકે છે. આ ફેરફારનો ઉદ્દેશ્ય બિનદાવા કરાયેલી સંપત્તિ ઘટાડવાનો અને વધુ સારા રોકાણ વ્યવસ્થાપનને સુનિશ્ચિત કરવાનો છે. આ માટે નોમિનીની સંપૂર્ણ વિગતો જેમ કે ફોન નંબર, ઇમેઇલ, સરનામું, આધાર નંબર, પાન નંબર, ડ્રાઇવિંગ લાયસન્સ નંબર આપવો જરૂરી રહેશે.
બેન્કો 14 દિવસ બંધ રહેશે
જો તમારી પાસે આગામી મહિનામાં એટલે કે માર્ચમાં બેન્ક સંબંધિત કોઈ કામ હોય તો RBI બેન્કની રજાઓની યાદી તપાસ્યા પછી જ ઘરની બહાર નીકળો. હકીકતમાં RBI બેન્ક હોલિડે લિસ્ટ અનુસાર, આ મહિનામાં બેન્કો 14 દિવસ બંધ રહેશે જેમાં હોળી અને ઈદ-ઉલ-ફિત્ર સહિતના અન્ય તહેવારોનો સમાવેશ થાય છે. આમાં બીજા અને ચોથા શનિવાર સહિત રવિવારે સાપ્તાહિક રજાઓનો સમાવેશ થાય છે. જોકે, બેન્ક રજા હોવા છતાં તમે ઓનલાઈન બેન્કિંગ અને એટીએમ દ્વારા પૈસાની લેવડદેવડ કરી શકો છો અથવા અન્ય બેન્કિંગ કાર્ય પૂર્ણ કરી શકો છો. આ સેવા 24 કલાક ઉપલબ્ધ રહેશે.
ટોપ સ્ટોરી
ટ્રેન્ડિંગ સમાચાર
