SBI ક્રેડિટ કાર્ડ ધારકો માટે ખરાબ સમાચાર! ૧ એપ્રિલથી બદલાશે નિયમો, જાણો શું થશે નુકસાન
સ્વિગી પર ઓછા રિવોર્ડ પોઈન્ટ, એર ઈન્ડિયા ટિકિટ પર પણ કાપ, મફત વીમા કવચ પણ બંધ થશે.
SBI credit card rule changes: જો તમારી પાસે SBIનું ક્રેડિટ કાર્ડ છે તો આ સમાચાર તમારા માટે ખૂબ જ મહત્વના છે. સ્ટેટ બેંક ઓફ ઈન્ડિયા (SBI) પોતાના ક્રેડિટ કાર્ડના નિયમોમાં ૧ એપ્રિલ, ૨૦૨૫થી કેટલાક મોટા ફેરફાર કરવા જઈ રહી છે. આ ફેરફારોની અસરથી કાર્ડ ધારકોને મળતા ઘણા મોટા ફાયદાઓ હવે નહીં મળે. આ ફેરફારો ખાસ કરીને સિમ્પલી ક્લિક એસબીઆઈ કાર્ડ, એર ઈન્ડિયા એસબીઆઈ પ્લેટિનમ ક્રેડિટ કાર્ડ અને એર ઈન્ડિયા એસબીઆઈ સિગ્નેચર ક્રેડિટ કાર્ડના વપરાશકર્તાઓને અસર કરશે.
SBI કાર્ડે પોતાના રિવોર્ડ પોઈન્ટ પ્રોગ્રામમાં કેટલાક ફેરફારો કર્યા છે, જે આગામી ૧ એપ્રિલ, ૨૦૨૫થી લાગુ થશે. આ ફેરફારોને કારણે કેટલાક ઓનલાઈન વ્યવહારો અને મુસાફરી સંબંધિત ખરીદીઓ પર મળતા રિવોર્ડ પોઈન્ટ્સમાં ઘટાડો કરવામાં આવ્યો છે. આ ફેરફાર સિમ્પલી ક્લિક એસબીઆઈ કાર્ડ, એર ઈન્ડિયા એસબીઆઈ પ્લેટિનમ ક્રેડિટ કાર્ડ અને એર ઈન્ડિયા એસબીઆઈ સિગ્નેચર ક્રેડિટ કાર્ડના ગ્રાહકો માટે લાગુ થશે.
૧ એપ્રિલ, ૨૦૨૫થી સિમ્પલી ક્લિક SBI કાર્ડ પર સ્વિગી (Swiggy) પર કરવામાં આવેલા વ્યવહારો પર મળતા રિવોર્ડ પોઈન્ટ્સમાં મોટો ઘટાડો થશે. અગાઉ આ કાર્ડ ધારકોને સ્વિગી પર ખર્ચ કરવા પર ૧૦ ગણા રિવોર્ડ પોઈન્ટ મળતા હતા, પરંતુ હવે તેને ઘટાડીને માત્ર ૫ ગણા કરી દેવામાં આવ્યા છે. જો કે, આ કાર્ડ એપોલો ૨૪x૭, બુકમાયશો, ક્લિયરટ્રીપ, ડોમિનોઝ, આઈજીપી, મિંત્રા, નેટમેડ્સ અને યાત્રા જેવી કેટલીક અન્ય ઓનલાઈન શોપિંગ વેબસાઈટ પર ૧૦ ગણા રિવોર્ડ પોઈન્ટ્સ ઓફર કરવાનું ચાલુ રાખશે.
આ ઉપરાંત SBI કાર્ડે એર ઈન્ડિયાની ટિકિટ ખરીદી પર મળતા રિવોર્ડ પોઈન્ટ્સમાં પણ ઘણા મોટા ફેરફારો કર્યા છે. ૩૧ માર્ચ, ૨૦૨૫થી એર ઈન્ડિયાની વેબસાઈટ અથવા મોબાઈલ એપ દ્વારા ટિકિટ ખરીદવા પર એર ઈન્ડિયા SBI પ્લેટિનમ ક્રેડિટ અને એર ઈન્ડિયા SBI સિગ્નેચર ક્રેડિટ કાર્ડ પર ઉપલબ્ધ રિવોર્ડ પોઈન્ટ્સમાં ભારે ઘટાડો થશે.
હવે એર ઈન્ડિયા એસબીઆઈ પ્લેટિનમ ક્રેડિટ કાર્ડના પ્રાથમિક કાર્ડ ધારકને દરેક રૂ. ૧૦૦ના ખર્ચ પર માત્ર ૫ રિવોર્ડ પોઈન્ટ મળશે, જે પહેલાં ૧૫ હતા. તે જ સમયે, એર ઈન્ડિયાના એસબીઆઈ સિગ્નેચર ક્રેડિટ કાર્ડના પ્રાથમિક કાર્ડ ધારકોને હવે રૂ. ૧૦૦ પર માત્ર ૧૦ રિવોર્ડ પોઈન્ટ્સ મળશે, જ્યારે પહેલાં તેઓને ૩૦ પોઈન્ટ મળતા હતા. આ ફેરફારથી એર ઈન્ડિયાની ટિકિટો ખરીદનારા કાર્ડ ધારકોને મોટો ફટકો પડશે.
આટલું જ નહીં, SBI કાર્ડે તેના કોમ્પ્લિમેન્ટરી એટલે કે મફત વીમા કવરેજને પણ સમાપ્ત કરવાનો નિર્ણય લીધો છે. ૨૬ જુલાઈ, ૨૦૨૫થી કાર્ડ ધારકોને ૫૦ લાખ રૂપિયાનું હવાઈ અકસ્માત વીમા કવચ અને ૧૦ લાખ રૂપિયાનું રેલ અકસ્માત વીમા કવચ આપવાનું બંધ કરવામાં આવશે. આ સુવિધા બંધ થવાથી કાર્ડ ધારકોને મોટું નુકસાન થશે.
SBIના આ ફેરફારોથી કાર્ડ ધારકોને મળતા ઘણા ફાયદાઓ ઘટશે, ખાસ કરીને જે લોકો ઓનલાઈન ફૂડ ઓર્ડરિંગ અને એર ટ્રાવેલ માટે આ કાર્ડનો વધુ ઉપયોગ કરે છે. કાર્ડ ધારકોને સલાહ આપવામાં આવે છે કે તેઓ આ ફેરફારોને ધ્યાનમાં રાખીને પોતાના રિવોર્ડ પોઈન્ટ્સનો મહત્તમ લાભ લેવાનો પ્રયાસ કરે.
Before You Go
Harsh Sanghavi: નવસારીમાં હર્ષ સંઘવીએ વાંસદા કોંગ્રેસના MLA અનંત પટેલ પર કર્યા પ્રહાર
ટોપ સ્ટોરી
ટ્રેન્ડિંગ સમાચાર
