Gujarat Budget: 'જવાબ ટૂંકો રાખો નહીં તો...' વિધાનસભા અધ્યક્ષે મંત્રી ઋષિકેશ પટેલને પ્રશ્નોત્તરી કાળમાં લાંબો જવાબ આપતી વખતે ટકોર્યા

Gujarat Budget 2025: ગુજરાત વિધાનસભામાં બજેટ સત્રનો પ્રારંભ થઇ ચૂક્યો છે. આજે નાણામંત્રી કનુભાઈ દેસાઈ વિધાનસભામાં ગુજરાત સરકારનું સામાન્ય બજેટ રજૂ કરશે

(તસવીર- એબીપી લાઇવ)

Gujarat Budget 2025: આજે નાણામંત્રી કનુભાઈ દેસાઈ વિધાનસભામાં ગુજરાત સરકારનું સામાન્ય બજેટ રજૂ કરશે. નાણામંત્રી ચોથું બજેટ રજૂ કરશે. બજેટમાં કૃષિ, શિક્ષણ, આરોગ્ય અને સિંચાઇની બાબતો પર ભાર મુકવામાં આવશે. વિધાનસભા ગૃહમાં અત્યારે બજેટ પહેલા પ્રશ્નોત્તરી કાળ ચાલી રહ્યો છે, આ દરમિયાન એક ખાસ ઘટના ઘટી છે, અધ્યક્ષે સરકારના મંત્રીને જવાબો આપવાને લઇને ટકોર કરી છે. લાંબા લાંબ જવાબો આપવાને લઇને ઋષિકેશ પટેલને ગૃહના અધ્યક્ષે ટકોર કરતાં કહ્યું કે, જવાબ ટૂંકો રાખવો જરૂરી છે. 

આજે બજેટ સેશન શરૂ થઇ ચૂક્યુ છે. બજેટ રજૂ થયા તે પહેલાના પ્રશ્નોત્તરી કાળમાં એક મોટી ઘટનાએ તમામનું ધ્યાન ખેંચ્યુ છે. ખરેખરમાં, વિધાનસભા અધ્યક્ષની મંત્રી ઋષિકેશ પટેલને ટકોરની ઘટના ઘટી છે. વિધાનસભા ગૃહમાં જ્યારે પ્રશ્નોત્તરી કાળ ચાલી રહ્યો તો, આ દરમિયાન મંત્રી ઋષિકેશ પટેલે લાંબો જવાબ આપ્યો તેનાથી અધ્યક્ષે તેમને ટકોર્યા હતા. મંત્રી સેવાસેતુ અંતર્ગત યોજનાને લઇને જવાબો આપી રહ્યાં હતા, જે સમયમર્યાદા કરતાં લાંબા હતા. આના પર અધ્યક્ષે ટકોર કરતાં કહ્યું કે, જવાબ ટૂંકો રાખો નહીં તો રામસેતુ કરતા સેવાસેતું લાંબો થશે. 

રજૂ થઇ રહ્યું છે ગુજરાત બજેટ
ગુજરાત વિધાનસભામાં બજેટ સત્રનો પ્રારંભ થઇ ચૂક્યો છે. આજે નાણામંત્રી કનુભાઈ દેસાઈ વિધાનસભામાં ગુજરાત સરકારનું સામાન્ય બજેટ રજૂ કરશે. નાણામંત્રી ચોથું બજેટ રજૂ કરશે. બજેટમાં કૃષિ, શિક્ષણ, આરોગ્ય અને સિંચાઇની બાબતો પર ભાર મુકવામાં આવશે. ગુજરાત વિધાનસભામાં બજેટ સત્રનો આરંભ ગઇકાલે રાજ્યપાલ આચાર્ય દેવવ્રતના સંબોધનથી થયો હતો. તેમણે 37 મિનિટના ભાષણ દરમિયાન રાજ્યના વિકાસના અનેક પાસા રજૂ કર્યા હતાં.

દોઢ મહિનો ચાલનારા વિધાનસભાના આ બજેટ સત્ર દરમિયાન કોંગ્રેસ જમીનના કૌભાંડો, આરોગ્ય સેવાનો ખ્યાતિકાંડનો મામલો, ભરતીમાં અનિયમિતતા-ગેરરીતિ સહિતના પ્રશ્નોને લઇને રાજ્ય સરકારને ઘેરવાનો પ્રયાસ કરી શકે છે. સામાન્ય બજેટ પર ગૃહમાં 4 દિવસ ચર્ચા થશે. નોંધનીય છે કે ગુજરાત સરકારનું આ વર્ષનું બજેટ 3.72 લાખ કરોડ રૂપિયા હોવાનો અંદાજ છે. સત્રના પહેલા દિવસે બે મહત્વપૂર્ણ બિલ રજૂ કરવામાં આવશે. પહેલું બિલ ગુજરાત ક્લિનિકલ એસ્ટાબ્લિશમેન્ટ (નોંધણી અને નિયમન) (સુધારા) બિલ 2025 છે. બીજું બિલ ગુજરાત સ્ટેટ ફિઝીયોથેરાપી કાઉન્સિલ (રદ) બિલ 2025 છે.

બજેટ સત્રના પ્રથમ દિવસે ગુજરાત વિધાનસભા બહાર કૉંગ્રેસના ધારાસભ્યોએ વિરોધ પ્રદર્શન કર્યું હતું. ભારતીયોના ડિપોર્ટેશન મુદ્દે કૉંગ્રેસના ધારાસભ્યોએ ગળામાં પોસ્ટર અને હાથમાં હાથકડી પહેરી દેખાવો કર્યા હતા. કૉંગ્રેસે મોદી અને ટ્રમ્પની દોસ્તી પર પણ સવાલો ઉઠાવ્યા અને આરોપ લગાવ્યો કે,  હાથકડી અને જંજીર પહેરાવી અમેરિકાએ ભારતીયોનું અપમાન કર્યું હતું.

તે સિવાય વિરમગામમાં ડાંગર ખરીદી કૌભાંડ મુદ્દે ખેડૂતોએ કર્યું ઉગ્ર વિરોધ પ્રદર્શન કર્યું હતું. ડાંગર ખરીદી બાદ ચૂકવણીથી વંચિત રહેલા ખેડૂતો વિધાનસભા ખાતે પહોંચ્યા હતા. જ્યાં વિધાનસભાના ગેટ બહાર ઉગ્ર વિરોધ પ્રદર્શન કર્યું હતું. ખેડૂતોએ ભાજપના જ ધારાસભ્ય પર ગંભીર આરોપ લગાવ્યા હતા. ખેડૂતોએ આરોપ લગાવ્યો કે કૌભાંડી સૂફિયાનના ધારાસભ્ય સાથે સારા સંબંધો છે. વિરમગામમાં ડાંગર ખરીદીમાં 3 કરોડ 76 લાખ રૂપિયાનું કૌભાંડ આચરાયું છે. 1221 ખેડૂતો પાસેથી ટેકાના ભાવે ડાંગરની ખરીદી કરવામાં આવી. જોકે 294 ખેડૂતોને હજુ સુધી નાણાં ચૂકવાયા નથી. પોર્ટલના આઈડીના માધ્યમથી આખુય ડાંગર કૌભાંડ આચરવામાં આવ્યું હતું.  

આ પણ વાંચો