કેબિનેટનો મોટો નિર્ણય: અમદાવાદના વેપારીઓને મળશે સહાય, રાજ્યમાં હવે બનશે CC રોડ

મુખ્યમંત્રી ભૂપેન્દ્ર પટેલના મહત્વના નિર્ણયો: ફોટો-વીડિયોગ્રાફીથી સર્વે કરી નાના-મોટા વેપારીઓને અપાશે નુકસાનીનું વળતર; વીજકર્મીઓની સુરક્ષા પર ભાર અને રાજ્યના રસ્તાઓ હવેથી સિમેન્ટ-કોંક્રિટના બનશે.

ahmedabad rain damage traders financial aid cabinet decision road work

Source : X @CMO Gujarati

Show Quick Read

Key points generated by AI, verified by newsroom

• અમદાવાદના વેપારીઓને વરસાદી નુકસાન બદલ સુરત તર્જ પર સહાય.
• વરસાદી નુકસાન ટાળવા હવે સિમેન્ટ કોંક્રિટના રસ્તા બનશે.
• મુખ્યમંત્રીએ વીજ કર્મચારીઓની સુરક્ષા સુનિશ્ચિત કરવા આદેશ આપ્યા.
• કોમનવેલ્થ વિજેતાઓને અભિનંદન; સ્વચ્છતા અભિયાન વધુ મજબૂત કરાશે.

ahmedabad rain compensation: ગાંધીનગરમાં મળેલી કેબિનેટ બેઠક બાદ રાજ્ય સરકારના પ્રવક્તા મંત્રી જીતુભાઈ વાઘાણીએ પત્રકાર પરિષદ યોજીને કેટલાક મહત્વના નિર્ણયોની જાહેરાત કરી છે. તાજેતરમાં પડેલા ભારે વરસાદથી અમદાવાદમાં વેપારીઓને થયેલા નુકસાન અંગે સરકારે સંવેદના દાખવીને સુરતની તર્જ પર સહાય ચૂકવવાનો મોટો નિર્ણય લીધો છે. આ ઉપરાંત, વરસાદમાં વારંવાર તૂટી જતા ડામરના રસ્તાઓનો કાયમી ઉકેલ લાવવા હવે નગરપાલિકા અને મહાનગરપાલિકાઓમાં સિમેન્ટ કોંક્રિટ (CC) ના રોડ બનાવવામાં આવશે. આ બેઠકમાં વીજ કર્મચારીઓની કામગીરીની પ્રશંસા કરવા સાથે તેમની સુરક્ષા બાબતે પણ મુખ્યમંત્રીએ કડક સૂચનાઓ આપી છે. સાથે જ કોમનવેલ્થ ગેમ્સની સફળતા અને વડાપ્રધાન નરેન્દ્ર મોદીના સ્વચ્છતા અભિયાન અંગે પણ મહત્વની ચર્ચાઓ કરવામાં આવી હતી.

અમદાવાદના વેપારીઓને સુરતની તર્જ પર સહાય

રાજ્ય સરકારના પ્રવક્તા મંત્રીએ જણાવ્યું હતું કે, અગાઉ સુરતમાં ભારે વરસાદ વખતે જે રીતે સહાય જાહેર કરાઈ હતી, તે જ ઠરાવ મુજબ હવે અમદાવાદના વેપારીઓને પણ સહાય અપાશે. તાજેતરના વરસાદમાં અમદાવાદમાં પાણી ભરાવાના કારણે નાના-મોટા વેપારીઓ અને દુકાનદારોને ઘણું મોટું નુકસાન થયું છે. આ નુકસાનીનો પારદર્શી રીતે અંદાજ કાઢવા માટે ફોટોગ્રાફી અને વીડિયોગ્રાફીના આધારે ચોક્કસ સર્વે કરવામાં આવશે અને ત્યારબાદ તેમને સરકાર દ્વારા યોગ્ય વળતર ચૂકવવામાં આવશે.

રસ્તાઓ માટે મુખ્યમંત્રીનો મોટો નિર્ણય

ચોમાસામાં ડામરના રસ્તાઓ ધોવાઈ જવાની અને તૂટી જવાની સમસ્યા ખૂબ સામાન્ય છે. આ સમસ્યાને ધ્યાનમાં રાખીને મુખ્યમંત્રી ભૂપેન્દ્ર પટેલે એક મહત્વનો નિર્ણય લીધો છે. હવેથી મહાનગરપાલિકા અને નગરપાલિકાના તમામ નવા આંતરિક માર્ગો સિમેન્ટ કોંક્રિટ (CC) ના બનાવવામાં આવશે. વરસાદના કારણે હયાત રસ્તાઓને થતા નુકસાનને અટકાવવા આ નિર્ણય લેવાયો છે. એટલું જ નહીં, આગામી સમયમાં ગ્રામ્ય વિસ્તારોમાં પણ તબક્કાવાર સિમેન્ટ કોંક્રિટના રોડનું નિર્માણ કરવામાં આવશે.

આ પણ વાંચોઃ ગુજરાત કેબિનેટની મહત્વની બેઠક: ધોલેરા-મેટ્રો પ્રોજેક્ટનો રિવ્યૂ, સ્થાનિક સ્વરાજ્યની ચૂંટણીઓ અને UCC બિલ પર લેવાયા મોટા નિર્ણયો

વીજ કર્મચારીઓની સુરક્ષામાં કોઈ બાંધછોડ નહીં

વરસાદી માહોલમાં ખોરવાયેલો વીજ પુરવઠો તાત્કાલિક પુનઃ સ્થાપિત કરવા માટે વીજળી બોર્ડના કર્મચારીઓએ કરેલા સતત પ્રયાસોની કેબિનેટમાં ખાસ સરાહના કરવામાં આવી હતી. આ સાથે જ મુખ્યમંત્રીએ સ્પષ્ટ આદેશ આપ્યો છે કે જીવના જોખમે કામ કરતા આ વીજ કર્મચારીઓની સેફ્ટી અને સલામતીનું પૂરતું ધ્યાન રાખવામાં આવે અને તેમની સુરક્ષાના નિયમોમાં કોઈપણ પ્રકારની બાંધછોડ ચલાવી લેવામાં નહીં આવે.

કોમનવેલ્થમાં સફળતા બદલ અભિનંદન અને સ્વચ્છતા અભિયાન

કેબિનેટની આ બેઠકમાં તાજેતરમાં કોમનવેલ્થ ગેમ્સમાં ભારતીય ખેલાડીઓએ મેળવેલી જ્વલંત સફળતા બદલ તેમને વિશેષ અભિનંદન પાઠવવામાં આવ્યા હતા. આ ઉપરાંત, વડાપ્રધાન નરેન્દ્ર મોદીના 'સ્વચ્છતા અભિયાન' ને રાજ્યમાં વધુ વેગવંતુ અને અસરકારક બનાવવા માટે કયા પ્રયાસો કરી શકાય તે અંગે પણ બેઠકમાં વિસ્તૃત ચર્ચા કરવામાં આવી હતી.

આ પણ વાંચોઃ ખેડૂતો માટે રાહતના સમાચાર: માવાઠાથી થયેલી નુકસાની બદલ આવતીકાલે કેબિનેટ બેઠક બાદ સહાયની થશે જાહેરાત