બિસ્માર રસ્તાઓ અને રોંગ સાઈડ ડ્રાઇવિંગને લઈ હાઈકોર્ટે તંત્રનો લીધો ઉધડો: "વચનો નહીં, પરિણામ જોઈએ!"

અમદાવાદમાં કાયદાના અમલીકરણનો અભાવ, પોલીસ અને અધિકારીઓ પર HCના આકરા પ્રહારો, હવે દર બુધવારે સમીક્ષા.

હાઈકોર્ટે તંત્રને બિસ્માર રસ્તાઓ અને રોંગ સાઈડ ડ્રાઇવિંગ પર લીધો ઉધડો

Road Safety: ગુજરાત હાઈકોર્ટે (Gujarat High Court) અમદાવાદ (Ahmedabad) શહેરના બિસ્માર રસ્તાઓ અને રોંગ સાઈડ ડ્રાઇવિંગ (Wrong Side Driving) જેવા ટ્રાફિક ભંગના ગંભીર મુદ્દાઓને લઈને તંત્ર અને પોલીસનો આકરો ઉધડો લીધો છે. કોર્ટના અગાઉના હુકમના તિરસ્કાર અંગે ચાલી રહેલી સુનાવણી દરમિયાન, હાઈકોર્ટે સ્પષ્ટપણે જણાવ્યું કે, "કાયદાનું અમલીકરણ નથી થતું એ વાસ્તવિકતા છે." કોર્ટે ભારપૂર્વક કહ્યું કે, "રસ્તાઓ પર મીડિયા (Media) જે હાલત જુએ છે તે બતાવી રહ્યું છે" અને "લોકો નિઃસહાય થઈ ગયા હોય તેમ લાગી રહ્યું છે."

પોલીસ અને અધિકારીઓ પર HCના પ્રહારો: "માત્ર SG હાઈવે અને CG રોડ જ દેખાય છે?"

સુનાવણી દરમિયાન, સરકારી વકીલ જી.એચ. વીર્કે (G.H. Virk) રજૂઆત કરી હતી કે અમદાવાદ પોલીસ (Ahmedabad Police) સતત ખડેપગે રહીને કાર્યવાહી કરી રહી છે. તેમણે પ્લેન ક્રેશ (Plane Crash) અને રથયાત્રા (Rath Yatra) જેવી મોટી ઘટનાઓ દરમિયાન પોલીસની 24 કલાકની કામગીરીનો ઉલ્લેખ કર્યો. જોકે, હાઈકોર્ટે આ દલીલનો સ્વીકાર ન કરતા સ્પષ્ટ કર્યું કે, "અમને પોલીસની કામગીરી પર શંકા નથી, પરંતુ કાયદાનું અમલીકરણ નથી થઈ રહ્યું એ વાસ્તવિકતા છે." કોર્ટે અધિકારીઓ અને પોલીસની કામગીરી પર સવાલ ઉઠાવતા કહ્યું કે, "અધિકારીઓ અને પોલીસને માત્ર એસ.જી. હાઈવે (SG Highway) અને સી.જી. રોડ (CG Road) જ દેખાય છે." કોર્ટે ભારપૂર્વક જણાવ્યું કે, "અમદાવાદમાં બીજા પણ વિસ્તાર છે, ત્યાં કામગીરીની જરૂરિયાત છે."

હાઈકોર્ટે સરકાર પાસેથી માત્ર વચનો નહીં, પરંતુ પરિણામની અપેક્ષા રાખી હતી. કોર્ટે પૂછ્યું કે, "શું માત્ર ફરિયાદ કરીને સંતોષ માનવો એ ઘણું છે?" સરકારી વકીલે "કામ કરવાની ખાતરી" આપી, ત્યારે કોર્ટે સ્પષ્ટ શબ્દોમાં કહ્યું, "અમને માત્ર વાયદા નહીં, પરિણામ જોઈએ છે."

રોંગ સાઈડ ડ્રાઇવિંગ પર વિચિત્ર બચાવ અને ભવિષ્યની કાર્યવાહી

સુનાવણી દરમિયાન, રોંગ સાઈડ ડ્રાઇવ કરનારા લોકો માટે સરકારી વકીલે એક વિચિત્ર બચાવ રજૂ કરતા કહ્યું કે, "વરસાદના કારણે શોર્ટકટ લેવા માટે લોકો રોંગ સાઈડમાં વાહન ચલાવે છે." આ દલીલથી હાઈકોર્ટ સંતુષ્ટ ન થઈ. કોર્ટે ભારે વાહનોના શહેરમાં પ્રવેશ અંગે પણ સવાલો ઉઠાવ્યા હતા, જેના જવાબમાં સરકારી વકીલે દાવો કર્યો કે "અમે માત્ર નાના વાહનોને જ શહેરમાં ફરવાની મંજૂરી આપી હતી" અને બાંધકામ સંબંધિત વાહનોને વિશેષ કિસ્સાઓમાં જ મંજૂરી આપવામાં આવે છે.

ટાયર કિલર (Tyre Killer) લગાવવાના પ્રયાસોમાં તંત્ર નિષ્ફળ નીવડ્યું હોય તેવો પણ હાઈકોર્ટનો મત હતો. કોર્ટે કડક શબ્દોમાં જણાવ્યું કે, "જો કાયદાનું અમલીકરણ કડક નહીં હોય, તો તમને કોઈ ગાંઠશે નહીં."

આ મામલે હાઈકોર્ટે એક મોટો નિર્ણય લીધો છે કે હવેથી દર બુધવારે (Wednesday) આ મેટર પર કોર્ટ સુનાવણી કરશે અને પોલીસ દ્વારા થતી કામગીરીના અહેવાલની સમીક્ષા કરવામાં આવશે. અમદાવાદના વાહનચાલકો માટે આ મોટા સમાચાર છે, કારણ કે આગામી 1 સપ્તાહ દરમિયાન પોલીસ કડક કામગીરી કરશે તેવી સરકારી વકીલે કોર્ટમાં ખાતરી આપી છે. રોંગ સાઈડમાં વાહન ચલાવનારાઓનું વાહન જપ્ત થશે અને FIR નોંધાશે. આ ઉપરાંત, ગેરકાયદેસર પાર્કિંગ કરનારાઓ સામે પણ કડક કાર્યવાહી કરવામાં આવશે. હાઈકોર્ટે સરકારને પેનલ્ટી (Penalty) અને લાયસન્સ સસ્પેન્ડ (License Suspend) કરવા સિવાય અન્ય શું પગલાં લઈ શકાય તે અંગે પણ વિચાર કરવા સૂચન કર્યું છે. ટ્રાફિક DCP સફિન હસન (Traffic DCP Safin Hasan) સહિતના અધિકારીઓ કોર્ટ કાર્યવાહીમાં હાજર રહ્યા હતા.