ગુજરાતમાં ઉદ્યોગોને બૂસ્ટર ડોઝ! ₹2,999 કરોડના પ્રોજેક્ટ્સ મંજૂર, હજારોને મળશે રોજગારી

નાયબ મુખ્યમંત્રી હર્ષ સંઘવીની અધ્યક્ષતામાં મળેલી બેઠકમાં લેવાયો મોટો નિર્ણય; નવી ઔદ્યોગિક નીતિ થકી અત્યાર સુધીમાં 1.65 લાખ લોકોને રોજગારી અને રૂ. 1,48,336 કરોડનું રોકાણ મળ્યું.

gujarat industrial projects harsh sanghavi 2999 crore investment

Source : ai

Show Quick Read

Key points generated by AI, verified by newsroom

• નાયબ મુખ્યમંત્રી હર્ષ સંઘવીએ ₹2,999 કરોડના ઔદ્યોગિક પ્રોજેક્ટ્સ મંજૂર કર્યા.
• આમાં 32 મોટા પ્રોજેક્ટ્સ, 4 પાર્ક અને 3 ટેક્સટાઈલ યુનિટ સામેલ છે.
• આ નિર્ણય મેન્યુફેક્ચરિંગ, ઇન્ફ્રાસ્ટ્રક્ચર અને રોજગારી નિર્માણને વેગ આપશે.
• સરકારની ઉદ્યોગલક્ષી નીતિઓથી 1.65 લાખથી વધુ રોજગારી ઊભી થઈ.

Gujarat Industrial Development: ગુજરાતના યુવાનો અને ઉદ્યોગકારો માટે મોટા સમાચાર સામે આવ્યા છે. રાજ્યમાં મેન્યુફેક્ચરિંગ, ઇન્ફ્રાસ્ટ્રક્ચર વિકાસ અને રોજગારી નિર્માણને વધુ મજબૂત બનાવવા માટે સરકારે આજે સોમવારે એક મોટો નિર્ણય લીધો છે. નાયબ મુખ્યમંત્રી અને ઉદ્યોગ મંત્રી શ્રી હર્ષ સંઘવીની અધ્યક્ષતામાં યોજાયેલી ઉચ્ચસ્તરીય બેઠકોની શૃંખલામાં, વિવિધ પ્રોત્સાહક યોજનાઓ હેઠળ રાજ્યમાં રૂ. 2,999 કરોડથી વધુના ઔદ્યોગિક પ્રોજેક્ટ્સને મંજૂરીની મહોર મારવામાં આવી છે. આ નિર્ણયથી માત્ર નવા ઉદ્યોગો જ નહીં સ્થપાય, પરંતુ હજારો યુવાનો માટે રોજગારીની નવી તકો પણ ઊભી થશે. અત્યાર સુધીમાં ગુજરાત સરકારે પોતાની ઉદ્યોગલક્ષી નીતિઓથી 1.65 લાખથી વધુ લોકોને સીધી રોજગારી આપીને એક મોટો રેકોર્ડ બનાવ્યો છે.

ઔદ્યોગિક નીતિ-2015 દ્વારા રોકાણ અને રોજગારીને વેગ

ગુજરાતને દુનિયાનું સૌથી બેસ્ટ રોકાણ કેન્દ્ર અને સામાજિક-આર્થિક વિકાસનું રોલ મોડલ બનાવવાના હેતુથી સરકારે 2015માં ઔદ્યોગિક નીતિ અંતર્ગત 'ઇન્સેન્ટીવ ટુ ઇન્ડસ્ટ્રિઝ' યોજના શરૂ કરી હતી. આ યોજનાનો સીધો ફાયદો રાજ્યમાં સ્થપાતા નવા ઉદ્યોગોને થાય છે, જેમાં તેમને નેટ એસ.જી.એસ.ટી. (Net SGST) રિફંડ અથવા આર્થિક સહાય આપવામાં આવે છે.

આ નીતિએ અત્યાર સુધીમાં ગુજરાતભરમાં રૂ. 1,48,336.35 કરોડના જંગી રોકાણને આકર્ષ્યું છે અને 1,65,053 જેટલી સીધી રોજગારીનું સર્જન કર્યું છે. આ રોકાણોને કારણે સૂક્ષ્મ, લઘુ અને મધ્યમ ઉદ્યોગો (MSMEs) ને પણ ખૂબ મોટો ટેકો મળ્યો છે, જેનાથી રાજ્યમાં ઉદ્યોગોને અનુકૂળ એક શાનદાર ઇકોસિસ્ટમ તૈયાર થઈ છે. આ યોજનાનો મુખ્ય ઉદ્દેશ્ય મોટા પાયે રોકાણ લાવીને ગુજરાતને એડવાન્સ્ડ મેન્યુફેક્ચરિંગ, ટેક્નોલોજી અને ઇનોવેશનમાં નંબર વન બનાવવાનો છે.

32 મોટા ઔદ્યોગિક પ્રોજેક્ટ્સને સીધી મંજૂરી

આજે 27 જુલાઈ 2026ના રોજ નાયબ મુખ્યમંત્રી શ્રી હર્ષ સંઘવીના અધ્યક્ષસ્થાને મોટા ઉદ્યોગોને 'ફાઇનલ એલિજિબિલિટી સર્ટિફિકેટ' આપવા માટે એક કમિટીની બેઠક મળી હતી. આ કમિટીએ રૂ. 1,977.04 કરોડનું કુલ મૂડીરોકાણ ધરાવતી 32 અરજીઓને મંજૂરી આપી દીધી છે, જેનાથી રાજ્યમાં અંદાજે 4,739 જેટલી સીધી રોજગારી ઊભી થવાની ધારણા છે.

જિલ્લાવાર ક્યાં અને કેટલું રોકાણ મંજૂર થયું?

અમદાવાદ: ઓટોમોબાઈલ, મેટલ, સિમેન્ટ અને કોંક્રીટ ક્ષેત્રે રૂ. 528.49 કરોડ

કચ્છ: મેટલ સેક્ટરમાં રૂ. 332.71 કરોડ

ગાંધીનગર: મેટલ સેક્ટરમાં રૂ. 35.41 કરોડ

ભરૂચ: મેટલ સેક્ટરમાં રૂ. 12.26 કરોડ

મહેસાણા: પ્લાસ્ટિક અને મેટલ સેક્ટરમાં રૂ. 301.16 કરોડ

મોરબી: સિરામિક, કેમિકલ, પેપર અને પ્લાસ્ટિક સેક્ટરમાં રૂ. 480.16 કરોડ

વડોદરા: કેમિકલ સેક્ટરમાં રૂ. 102.94 કરોડ

સાબરકાંઠા: સિરામિક સેક્ટરમાં રૂ. 110.42 કરોડ

સુરત: ટેક્સટાઈલ, ફાર્માસ્યુટિકલ અને મેટલ સેક્ટરમાં રૂ. 74.49 કરોડ

કેપિટલ સબસિડી યોજના હેઠળ એક મોટો પ્રોજેક્ટ મંજૂર

આ ઉપરાંત, મોટા ઉદ્યોગો અને થ્રસ્ટ સેક્ટર યોજના માટેની કેપિટલ સબસિડીની અરજીઓ પર વિચારણા કરવા માટે પણ કમિટીની બેઠક યોજાઈ હતી. સમિતિએ રૂ. 649.23 કરોડના રોકાણ ધરાવતા 1 મોટા પ્રોજેક્ટને મંજૂરી આપી છે. આ પ્રોજેક્ટથી અંદાજે 871 લોકોને સીધી રોજગારી મળશે. આનાથી ગુજરાતની ઔદ્યોગિક ઇકોસિસ્ટમ વધુ પાવરફુલ બનશે અને પ્રત્યક્ષ તેમજ પરોક્ષ રોજગારીમાં વધારો થશે.

ટેક્સટાઈલ ક્ષેત્રે 3 એકમોને મળી સહાય

કાપડ ઉદ્યોગને વધુ મજબૂત કરવા માટે 'ટેક્ષટાઈલ વેલ્યુ ચેઈનમાં ચોક્કસ ક્ષેત્રોને મજબૂત કરવા માટેની સહાય યોજના-2019' હેઠળ નાયબ મુખ્યમંત્રીની અધ્યક્ષતામાં રાજ્ય કક્ષાની એમ્પાવર્ડ કમિટીની 7મી બેઠક યોજાઈ હતી. જેમાં 3 ટેક્સટાઈલ એકમો માટે સહાય મંજૂર કરવામાં આવી છે. આ યુનિટ્સ કુલ મળીને રૂ. 165 કરોડનું રોકાણ લાવશે અને અંદાજે 500 સીધી રોજગારીનું સર્જન કરશે. આ યોજનામાં સરકાર દ્વારા યુનિટ્સને વ્યાજ સહાય અને પાવર ટેરિફ સહાય આપવામાં આવે છે. સરકારે જણાવ્યું છે કે આ ત્રણેય એકમોને આગામી 5 વર્ષમાં રૂ. 50 કરોડથી વધુની આર્થિક સહાય મળશે.

4 ઇન્ડસ્ટ્રિયલ પાર્ક પ્રોજેક્ટ્સને પણ લીલી ઝંડી

આ સાથે જ, 'ગુજરાત ઔદ્યોગિક નીતિ-2020' હેઠળ રાજ્ય સરકારે 'ઔદ્યોગિક પાર્ક સહાય યોજના' અંતર્ગત 4 નવા પ્રોજેક્ટ્સને મંજૂરી આપી છે. આ ઇન્ડસ્ટ્રિયલ પાર્કના ડેવલપમેન્ટ માટે કુલ રૂ. 371.70 કરોડથી વધુનું રોકાણ થશે, જે ગુજરાતના ઔદ્યોગિક ઇન્ફ્રાસ્ટ્રક્ચરને એક નવો જ ઓપ આપશે.

બેઠકમાં કોણ-કોણ ઉપસ્થિત રહ્યું?

રાજ્યના ઉદ્યોગ જગતને વેગ આપનારી આ મહત્વપૂર્ણ બેઠકમાં ઉદ્યોગ રાજ્યમંત્રી ડૉ. જયરામભાઇ ગામીત, અધિક મુખ્ય સચિવો જયંતી રવી, ટી. નટરાજન અને શ્રીમતી મમતા વર્મા સહિતના રાજ્યના ઉચ્ચ આઇ.એ.એસ. (IAS) અધિકારીઓ હાજર રહ્યા હતા. આ ઉપરાંત, ગુજરાત ચેમ્બર ઓફ કોમર્સના પ્રમુખ સંદિપ એન્જિનીયરે પણ આ બેઠકમાં ખાસ હાજરી આપી હતી.