તમારી પાસે પણ જૂનું બારકોડવાળું રેશનકાર્ડ છે? ગુજરાત સરકારનો નવો નિયમ જાણી લો, નહીં તો નુકસાન થશે!

રાજ્યના પુરવઠા વિભાગે પરિપત્ર બહાર પાડ્યો, નવા NFSA અને સામાન્ય રેશનકાર્ડ માટે અરજી ફોર્મ જાહેર; રાજકોટ સહિત અનેક જિલ્લાઓમાં મે મહિનાનો જથ્થો ન પહોંચતા દેકારો

રેશન કાર્ડમાં થશે ફેરફાર

Gujarat smart ration card: ગુજરાતના રેશનકાર્ડ ધારકો માટે એક મહત્વપૂર્ણ સમાચાર સામે આવ્યા છે. રાજ્ય સરકારે બારકોડ રેશનકાર્ડના સ્થાને હવે ઇ સાઇન આધારિત QR કોડવાળું 'સ્માર્ટ રેશનકાર્ડ' ઇશ્યૂ કરવાનો નિર્ણય લીધો છે, જેને વહીવટી મંજૂરી પણ મળી ગઈ છે. આ નવા સ્માર્ટ રેશનકાર્ડથી અરજદારોના સમય અને નાણાની બચત થશે અને ડિજિટલ સુવિધામાં વધારો થશે.

ગુજરાતના પુરવઠા વિભાગે રેશનકાર્ડ સંબંધિત એક મોટો નિર્ણય લીધો છે. હવે રાજ્યમાં જૂના બારકોડ રેશનકાર્ડને બદલે e sign Based (ઇ સાઇન આધારિત) અને QR કોડ ધરાવતું "સ્માર્ટ રેશન કાર્ડ" ઇશ્યૂ કરવામાં આવશે. આ નવી બાબતને વહીવટી મંજૂરી મળી ગઈ છે અને તેને અમલમાં મૂકવાની પ્રક્રિયા શરૂ થઈ ગઈ છે.

પરિપત્ર અને ફોર્મ્સની જાહેરાત

રાજ્યના પુરવઠા વિભાગ દ્વારા આ અંગે એક પરિપત્ર બહાર પાડવામાં આવ્યો છે. આ પરિપત્રમાં NFSA (રાષ્ટ્રીય અન્ન સલામતિ કાયદો ૨૦૧૩) કાર્ડ ધારકો અને અન્ય રેશનકાર્ડ ધારકો બંને માટે નવા અરજી ફોર્મના નમૂના પણ જાહેર કરવામાં આવ્યા છે. આ ઉપરાંત, ઇ સાઇનવાળું અને QR કોડ ધરાવતું સ્માર્ટ રેશનકાર્ડ કેવું હશે, તેના નમૂના પણ આ પરિપત્રમાં સામેલ કરીને રાજકોટ જિલ્લા પુરવઠા અધિકારી, રાજકોટ કલેક્ટર સહિત રાજ્યભરના તમામ DSO (જિલ્લા પુરવઠા અધિકારીઓ) અને કલેક્ટરોને જાણ કરી દેવામાં આવી છે.

સ્માર્ટ રેશનકાર્ડના ફાયદા

પુરવઠા વિભાગના પરિપત્રમાં જણાવાયું છે કે, વર્ષ ૨૦૨૪ ૨૫માં અરજદારોના સમય અને નાણાની બચત થાય તેમજ ઘરે બેઠા સ્માર્ટકાર્ડ મેળવી શકે તે માટે બારકોડેડ રેશનકાર્ડના સ્થાને આ નવી સિસ્ટમ અપનાવવામાં આવી છે. આનાથી કાર્ડ ધારકોને વધુ સુવિધાજનક અને સુરક્ષિત રીતે સેવાઓ મળી રહેશે.

નવા ફોર્મ્સ અને ફોર્મેટ

સરકારની કાળજીપૂર્વકની વિચારણાના અંતે, રેશનકાર્ડ અંગેના હાલના ફોર્મ અને ફોર્મેટમાં સુધારો કરીને નવેસરથી વિગતો બહાર પાડવામાં આવી છે: ૧. "નવું રેશનકાર્ડ મેળવવા માટેનું અરજી ફોર્મ" ૨. "રાષ્ટ્રીય અન્ન સલામતિ કાયદો ૨૦૧૩માં સમાવેશ કરવા અંગે અરજી ફોર્મ" ૩. "અરજદાર અરજી કરે ત્યારે જે રેશનકાર્ડ આપવામાં આવે તેનું ટેમ્પ્લેટ" ૪. "SMART Ration Card" નું ફોર્મેટ (જોડાણ ૪ મુજબ).

હાલની પરિસ્થિતિ અને મુશ્કેલીઓ

દરમિયાન, સસ્તા અનાજના દુકાનદાર અગ્રણીઓ પાસેથી મળતી વિગતો મુજબ, આજની તારીખે પણ મે મહિનાનો ઘઉં ચોખા સહિતનો જથ્થો રાજકોટ શહેરની ૩૫ જેટલી દુકાનોએ પહોંચ્યો નથી, જેના કારણે ભારે દેકારો જોવા મળી રહ્યો છે. જૂન મહિનાનો જથ્થો પણ સાથે આપવાનો છે, પરંતુ તે અંગે કે જથ્થો આપવા અંગે હાલ કોઈ કાર્યવાહી ન થતા રેશનકાર્ડ ધારકોની હાલત હાલ ભારે કફોડી બની છે. આ નવી વ્યવસ્થા અમલમાં આવે તે પહેલાં જૂના જથ્થાની વિતરણ વ્યવસ્થા સુચારુ બને તે જરૂરી છે.