Gujarat Rain: બંગાળની ખાડીમાં બે વરસાદી સિસ્ટમ સક્રિય, ગુજરાતના આ જિલ્લાઓમાં તૂટી પડશે વરસાદ

ગુજરાતમાં ભારેથી અતિભારે વરસાદ વરસશે. આ આગાહી હવામાન વિભાગે કરી છે.  હવામાન વિભાગના જણાવ્યા અનુસાર, બંગાળની ખાડીમાં બે વરસાદી સિસ્ટમ સક્રિય થતાં ગુજરાતમાં મૂશળધાર વરસાદ  વરસશે.

પ્રતિકાત્મક તસવીર

ગાંધીનગર: ગુજરાતમાં ભારેથી અતિભારે વરસાદ વરસશે. આ આગાહી હવામાન વિભાગે કરી છે.  હવામાન વિભાગના જણાવ્યા અનુસાર, બંગાળની ખાડીમાં બે વરસાદી સિસ્ટમ સક્રિય થતાં ગુજરાતમાં મૂશળધાર વરસાદ  વરસશે. 18 જુલાઈથી સૌરાષ્ટ્ર-કચ્છ , ઉત્તર અને દક્ષિણ ગુજરાત પાણી-પાણી થશે.  18 તારીખે સુરત, નવસારી અને વલસાડ જિલ્લામાં ધોધમાર વરસાદ વરસશે .

19 જુલાઈના રોજ જૂનાગઢ, ગીર સોમનાથ, પોરબંદર, અમરેલી, કચ્છ, બનાસકાંઠા, પાટણ, મહેસાણા, સાબરકાંઠા, નવસારી અને વલસાડ જિલ્લામાં ભારેથી અતિભારે વરસાદની શક્યતા છે.  રાજ્યમાં અત્યાર સુધી સીઝનનો 50 ટકા વરસાદ વરસી ચૂક્યો છે. 

મહુવા પંથકમાં 2 કલાકમાં 2 ઈંચ વરસાદ

મહુવાનાં તાલુકા પથકમાં ધોધમાર વરસાદ પડી રહ્યો છે. 2 કલાકમાં 2 ઈંચ વરસાદ ખાબકતા નીચાણવાળા વિસ્તારોમાં પાણી ભરાયા છે. બપોર બાદ અચાનક વાતાવરણમાં પલટો આવતા વરસાદી માહોલ જામ્યો છે.મહુવાનાખડસલીય,કુંભણ,કોજળી,કોટિયા, ખરેડ સહિતના ગામડાઓમાં વરસાદ નોંધાયો  છે. 

અમદાવાદ ગ્રામ્ય વિસ્તારમાં વરસાદ 

ધોલેરા પંથકમાં વરસાદી માહોલ જોવા મળી રહ્યો છે. હવામાન વિભાગે કરેલી આગાહી મુજબ વરસાદી માહોલ છવાયો છે. ઓલપાડ બાદ માંડવી તાલુકામાં વરસાદ શરૂ થયો છે. માંડવી નગર અને તાલુકામા ધોધમાર વરસાદ પડી રહ્યો છે. માંડવીના મુખ્ય બજાર ,ધોબણી નાકા સહિતના વિસ્તારોમાં વરસાદ પડ્યો છે. ભારે પવન સાથે વરસાદ પડી રહ્યો છે.

સરદાર સરોવર નર્મદા ડેમની સપાટી વધી

સાંજે 5 કલાકે સરદાર સરોવર નર્મદા ડેમની સપાટી 125.57 મીટર નોંધાઈ છે. મહત્તમ સપાટી 138.68 મીટર  છે. હાલ પાણીની આવક 68,923 ક્યુસેક છે. છેલ્લા ત્રણ કલાકમાં પાણીની સરેરાશ આવક  64,945 ક્યુસેક થઈ છે. રિવરબેડ પાવરહાઉસમાંથી નદીમાં જાવક 10,171 ક્યૂસેકની છે. કેનાલ હેડ પાવર હાઉસમાંથી કેનાલમાં જાવક  5,155 ક્યુસેકની છે. કુલ જાવક 15,326 ક્યૂસેકની છે. 24 કલાકમાં ડેમમાં પાણીની સપાટીમાં 43 સે.મી.નો વધારો થયો છે.

અમદાવાદ શહેરમાં વરસાદની આગાહી

હવામાન વિભાગ દ્વારા આજે અમદાવાદમાં ગાજવીજ સાથે ભારે વરસાદની આગાહી કરવામાં આવી છે, ઉપરાંત આગામી 7 દિવસ રાજ્યમાં વરસાદની આગાહી કરવામાં આવી છે. જે મુજબ 15, 16 અને 17 તારીખે ભારે વરસાદ અને 18, 19 અને 20 જુલાઈએ અતિભારે વરસાદની આગાહી છે. દક્ષિણ ગુજરાતમાં ભારે વરસાદની આગાહી કરવામાં આવી છે. 

મેઘરાજાનો ત્રીજો રાઉન્ડ શરૂ થશે

18 જુલાઈથી મેઘરાજાનો ત્રીજો રાઉન્ડ શરૂ થશે. ઉત્તર, મધ્ય ગુજરાત અને સૌરાષ્ટ્રમાં ભારે વરસાદની આગાહી કરવામાં આવી છે. વલસાડ, નવસારી, દમણ, બનાસકાંઠા, સાબરકાંઠા, મેહસાણા અને પાટણમાં અતિભારે વરસાદની આગાહી છે. 

Join Our Official Telegram Channel: https://t.me/abpasmitaofficial