Valsad Rain: વલસાડના કપરાડામાં 7 ઈંચ વરસાદથી અનેક વિસ્તારો થયા જળમગ્ન
વલસાડ જિલ્લામાં ભારે વરસાદ વરસ્યો છે. કપરાડામાં સાડા સાત ઈંચ વરસાદ ખાબક્યો છે. જ્યારે ઉમરગામમાં છ ઈંચ અને વલસાડ શહેર અને વાપીમાં ચાર-ચાર ઈંચ વરસાદ વરસ્યો છે.
વલસાડ: વલસાડ જિલ્લામાં ભારે વરસાદ વરસ્યો છે. કપરાડામાં સાડા સાત ઈંચ વરસાદ ખાબક્યો છે. જ્યારે ઉમરગામમાં છ ઈંચ અને વલસાડ શહેર અને વાપીમાં ચાર-ચાર ઈંચ વરસાદ વરસ્યો છે. હવામાન વિભાગની આગાહી વચ્ચે વલસાડ જિલ્લામાં સતત વરસાદ વરસી રહ્યો છે. અવિરત વરસાદના કારણે વલસાડની મોટા ભાગની નદીમાં પૂર આવ્યું છે. ઔરંગા નદીના પાણી કાશ્મીરા નગર, બંદર રોડ..હનુમાન ભાગડા સહિતના વિસ્તારમાં પ્રવેશતા વહેલી સવારે પ્રશાસનની ટીમે તમામ લોકોને સલામત સ્થળે ખસેડ્યા હતા.
કપરાડામાં નદીના પાણીએ તારાજી સર્જી છે. પાણીના પ્રવાહમાં કોઝવે તૂટી ગયો હતો. અનેક સ્થળોએ રસ્તાનું ધોવાણ થયું છે જેના કારણે વાહનચાલકો પરેશાન થયા હતા. કપરાડાના વરવટ ગામને જોડતા કોઝવે પર પાણી ફરી વળતા રસ્તો બંધ કરવો પડ્યો હતો.
કાચા મકાનો અને વૃક્ષોને નુકસાન
સેલવાસનો ખાનવેલ વિસ્તાર જળમગ્ન થઈ ગયો હતો. ગઈકાલે મોડી રાત્રે અનેક ઘરો પાણીમાં ગરકાવ થઈ ગયા હતા. કાચા મકાનો અને વૃક્ષોને પણ નુકસાન થયું હતું. સંઘ પ્રદેશ દાદરા નગર હવેલીમાંથી પસાર થતી દમણ ગંગા નદી બે કાંઠે વહી રહી છે. મધુબન ડેમમાંથી પાણી છોડાતા દમણ ગંગા નદીમાં ઘોડાપૂર આવ્યું છે. મધુબન ડેમના 10 દરવાજા ખોલવામાં આવ્યા છે. ઉપરવાસમાં વરસાદના કારણે વલસાડ જિલ્લામાં પસાર થતી દમણ ગંગા નદીમાં પાણીનો ધસમસતો પ્રવાહ વહેતો થયો છે.
સેલવાસનો રિવરફ્રન્ટ લોકો માટે બંધ કરવામાં આવ્યો
ગઈકાલે રાત્રે મધુબન ડેમમાંથી એક લાખ 90 હજાર ક્યૂસેક પાણી છોડવામાં આવ્યું છે. જેના કારણે દમણ ગંગા નદી કિનારાના વિસ્તારોમાં પાણી ભરાવવાની શરૂઆત થઈ હતી. સેલવાસનો રિવરફ્રન્ટ લોકો માટે બંધ કરવામાં આવ્યો હતો. રિવરફ્રન્ટના માર્ગો પર નદીના પાણી ફરી વળ્યા હતા. પોલીસ બંદોબસ્ત ગોઠવી દેવાયો છે.
વરસાદને લઈ હવામાન વિભાગની આગાહી
સૌરાષ્ટ્ર, મધ્ય અને દક્ષિણ ગુજરાતમાં ભારે વરસાદની આગાહી હવામાન વિભાગ દ્વારા કરવામાં આવી છે. આજે રાજ્યના મોટાભાગના વિસ્તારમાં વરસાદ વરસશે. જો કે, આવતીકાલથી વરસાદનું જોર ઘટશે. આજે છોટાઉદેપુર, પંચમહાલ, દાહોદ, વડોદરા, અમદાવાદ, ખેડા, આણંદ, સુરત, નવસારી, વલસાડ, તાપી, ડાંગ, ભરૂચ, અમરેલી, ભાવનગર અને ગીર સોમનાથ જિલ્લામાં ભારે વરસાદ વરસશે. રાજ્યમાં અત્યાર સુધી સીઝનનો 76 ટકા વરસાદ વરસી ચૂક્યો છે.
હવામાન વિભાગની આગાહી પ્રમાણે 24 કલાકમાં મોટાભાગના વિસ્તારમાં વરસાદ વરસશે. 24 કલાક બાદ વરસાદનું જોર ઘટશે. સૌરાષ્ટ્રમાં 24 કલાકમાં મોટાભાગના વિસ્તારમાં વરસાદ પડશે. ઉત્તર ગુજરાત, દક્ષિણ ગુજરાતમાં ભારે વરસાદ પડવાની શક્યતા છે. આજે છોટા ઉદેપુરમાં ભારે વરસાદની આગાહી કરાઈ છે.
Join Our Official Telegram Channel:
https://t.me/abpasmitaofficial
Before You Go
Narmada Tribal Protest : સાગબારા જંગલની જમીન ખેડાણ મુદ્દે સતત 22મા દિવસે ધરણા યથાવત
ટોપ સ્ટોરી
ટ્રેન્ડિંગ સમાચાર
