Rain: ગુજરાતમાં બપોર સુધી 85 તાલુકામાં વરસાદ, માંગરોળ-સૂત્રાપાડામાં આભ ફાટ્યું, નીચાણવાળા વિસ્તારો પાણી-પાણી

Gujarat Rain: વરસાદના સત્તાવાર આંકડાઓ પર નજર કરીએ તો, સૌરાષ્ટ્રના ગીર સોમનાથ અને જૂનાગઢ જિલ્લામાં મેઘરાજાએ રૌદ્ર સ્વરૂપ ધારણ કર્યું છે

તસવીરઃ એબીપી અસ્મિતા

Source : તસવીરઃ એબીપી અસ્મિતા

Show Quick Read

Key points generated by AI, verified by newsroom

• ગુજરાતમાં સવારે આઠ કલાકમાં 85 તાલુકામાં સાર્વત્રિક વરસાદ.
• જૂનાગઢના માંગરોળમાં 7.28 ઇંચ વરસાદથી જળબંબાકાર બન્યું.
• સૌરાષ્ટ્ર, દક્ષિણ-મધ્ય ગુજરાતમાં ધોધમાર વરસાદથી જનજીવન પ્રભાવિત.

Gujarat Rain: ગુજરાત રાજ્યમાં આજે સાર્વત્રિક મેઘમહેર જોવા મળી રહી છે, જેમાં સવારે 6 વાગ્યાથી બપોરે 2 વાગ્યા સુધીના માત્ર 8 કલાકના ટૂંકા સમયગાળામાં જ રાજયના 85 તાલુકાઓમાં સાર્વત્રિક વરસાદ નોંધાયો છે. હવામાન વિભાગની આગાહી વચ્ચે સક્રિય થયેલી મજબૂત સિસ્ટમના કારણે સૌરાષ્ટ્ર, દક્ષિણ અને મધ્ય ગુજરાતના વિસ્તારોમાં ધોધમાર વરસાદ તૂટી પડ્યો હતો. 

આ આકાશી આફત અને મહેરની વચ્ચે સૌથી ગંભીર સ્થિતિ જૂનાગઢ જિલ્લાના માંગરોળમાં જોવા મળી છે, જ્યાં બપોરે બે વાગ્યા સુધીમાં સૌથી વધુ 7.28 ઈંચ જેટલો ભારે વરસાદ ખાબકતા સમગ્ર પંથક જળમગ્ન બન્યો છે. મુશળધાર વરસાદના કારણે માર્ગો નદીઓમાં ફેરવાઈ ગયા છે અને જનજીવન પ્રભાવિત થયું છે.

વરસાદના સત્તાવાર આંકડાઓ પર નજર કરીએ તો, સૌરાષ્ટ્રના ગીર સોમનાથ અને જૂનાગઢ જિલ્લામાં મેઘરાજાએ રૌદ્ર સ્વરૂપ ધારણ કર્યું છે. માંગરોળ બાદ સૂત્રાપાડામાં 4.84 ઈંચ, માળિયા હાટિના તેમજ કેશોદમાં 4.37 ઈંચ અને વેરાવળમાં 3.31 ઈંચ વરસાદ નોંધાયો છે. આ ઉપરાંત વંથલીમાં 3.07 ઈંચ અને માણાવદરમાં 2.36 ઈંચ વરસાદ પડતાં ખેતરો બેટમાં ફેરવાઈ ગયા છે. મધ્ય અને દક્ષિણ ગુજરાતમાં પણ મેઘરાજાની તોફાની બેટિંગ ચાલુ રહી છે, જેમાં વડોદરાના શિનોરમાં 2.87 ઈંચ, સુરતના ઓલપાડમાં 2.36 ઈંચ અને ભરૂચના હાંસોટમાં 2.20 ઈંચ તથા વાલિયામાં 1.93 ઈંચ વરસાદ વરસ્યો છે. તાલાલામાં 1.84 ઈંચ જ્યારે લોધિકા, વાગરા, જૂનાગઢ ગ્રામ્ય અને શહેરી વિસ્તારમાં પણ 1 ઈંચથી વધુ પાણી પડ્યું છે.

રાજ્યના બોટાદ, ડેડિયાપાડા, ઉમરગામ, નાંદોદ, ઉના, કુતિયાણા, અંકલેશ્વર, ગઢડા અને જોડિયા જેવા વિવિધ તાલુકાઓમાં પણ 1-1 ઈંચ જેટલો સારો વરસાદ નોંધાયો છે. ટૂંકા સમયમાં ખાબકેલા આ આક્રમક વરસાદને કારણે સ્થાનિક નદી-નાળાઓમાં નવા નીર આવ્યા છે, તો બીજી તરફ વહીવટી તંત્ર પણ પરિસ્થિતિ પર સતત નજર રાખી રહ્યું છે.

આગામી દિવસોમાં ભારે વરસાદની આગાહી 

ગુજરાતમાં આ ભૌગોલિક સાયક્લોનિક સરક્યુલેશનના લીધે ખાસ કરીને સૌરાષ્ટ્ર, દક્ષિણ ગુજરાત અને મધ્ય ગુજરાતના વિસ્તારોમાં આગામી છ દિવસ સુધી આકાશી આફત વરસી શકે છે. હવામાન વિભાગના નકશા મુજબ, આજે જ રાજ્યના ચાર સંવેદનશીલ જિલ્લાઓમાં અત્યંત ભારે વરસાદના પગલે 'રેડ એલર્ટ' અને અન્ય પાંચ જિલ્લાઓમાં ભારે વરસાદની સંભાવનાને જોતાં 'ઓરેન્જ એલર્ટ' જાહેર કરીને સ્થાનિક વહીવટી તંત્રને સજ્જ રહેવા સુચના અપાઈ છે. 

આ પણ વાંચો

Mumbai Rain: માયાનગરીમાં મેઘતાંડવ, ધોધમાર વરસાદથી મુંબઈ પાણી-પાણી, રેલવે ટ્રેક ડૂબતાં લૉકલ ટ્રેન સેવા ખોરવાઈ

Sabarkantha Rain: અસહ્ય ઉકળાટ વચ્ચે હિંમતનગરમાં ભારે પવન સાથે વરસાદી ઝાપટા, ખેડૂતોમાં આનંદ