ગુજરાતમાં લોકડાઉન હટાવવા અંગે વિજય રૂપાણી આજે કોની સાથે કરશે ચર્ચા? જાણો મહત્વની વિગત

ગુજરાતમાં 3 મે પછી લોકડાઉન ક્યાં-ક્યાં હટાવવું તે અંગે મુખ્યમંત્રી વિજય રૂપાણી આજે બુધવારે પોતાના પ્રધાનમંડળના સભ્યો સાથે ચર્ચા કરશે.

ગાંધીનગરઃ ગુજરાતમાં 3 મે પછી લોકડાઉન ક્યાં-ક્યાં હટાવવું તે અંગે મુખ્યમંત્રી વિજય રૂપાણી આજે બુધવારે પોતાના પ્રધાનમંડળના સભ્યો સાથે ચર્ચા કરશે. રૂપાણીના અધ્યક્ષ સ્થાને આજે સવારે 11 વાગ્યે વીડિયો કોંફરન્સથી કેબિનેટની બેઠક યોજાશે. આ બેઠકમાં 3 મે બાદ લોક ડાઉન ખોલવા સંબંધે અને લોક ડાઉનમાં રાહત આપવા સંદર્ભે ચર્ચા થશે. ગુજરાતમાં 3 મેથી લોકડાઉન હટશે કે નહીં તેની અટકળો વચ્ચે મુખ્યમંત્રી વિજય રૂપાણીએ પહેલા જ લોકડાઉન સંપૂર્ણપણે નહીં હટે તેવી જાહેરાત કરી છે. રૂપાણીએ રવિવારે વડાપ્રધાન નરેન્દ્ર મોદી સાથેની બેઠકમાં સ્પષ્ટ કર્યું હતું કે, આગામી 3 મેથી ગુજરાતમાંથી એક ઝાટકે લોકડાઉન ઊઠાવી લેવાની કોઈ જ શક્યતા નથી. આ સંજોગોમાં કેબિનેટની બેઠકમાં ક્યાં ક્યાંથી લોકડાઉન હટાવવું તેની ચર્ચા થશે. રૂપાણી મંત્રીમંડળના સભ્યો પોતાના વિસ્તારમાંથી વિડિઓ કોંફરન્સ મારફતે કેબિનેટ બેઠકમાં જોડાશે. આ બેઠકમાં કોરોના વાયરસની મહામારીમાં ચાલી રહેલી દરેક વિસ્તારની કામગીરી અંગે અધિકારીઓને સોંપાયેલી જવાબદારી અંગે ચર્ચા કરાશે. આ ઉપરાંત પ્રભારી મંત્રીઓના જિલ્લાઓના પ્રભાવિત વિસ્તારમાં ચાલી રહેલી કામગીરી બાબતે પણ સમીક્ષા કરવામાં આવશે. રાજ્યમાં ઔદ્યોગિક એકમો શરૂ થયા બાદ રાજ્યની હાલની સ્થિતિ બાબતે પણ સમીક્ષા કરાશે.