Chandipura: ચાંદીપુરા વાયરસથી વધુ એક મોત, પંચમહાલની બાળકીનું સારવાર દરમિયાન મૃત્યુ, સેમ્પલ પૂણે લેબમાં મોકલાયા
Chandipura Virus: ગુજરાતમાં ચાંદીપુરા વાયરસથી મોતનો કિસ્સો સામે આવ્યો છે, ગઇકાલ સુધી ગુજરાતમાં કુલ 8 મોત હતા, જેમાં એકનો વધારો થયો છે
Chandipura Virus: ગુજરાતમાં ચાંદીપુરા વાયરસથી મોતનો કિસ્સો સામે આવ્યો છે, ગઇકાલ સુધી ગુજરાતમાં કુલ 8 મોત હતા, જેમાં એકનો વધારો થયો છે. માહિતી છે કે, પંચમહાલ જિલ્લાની બાળકીનું ચાંદીપુરા વાયરસના કારણે મોત થયુ છે, આ બાળકી વડોદરાની હૉસ્પીટલમાં સારવાર હેઠળ હતી અને મોત થયા બાદ તેના સેમ્પલ પૂણેની લેબમાં ટેસ્ટિંગ માટે મોકલાયા છે. ચાંદીપુરા વાયરસનો કહેર દિવસેને દિવસે વધી રહ્યો છે. નોંધનીય છે કે, રાજ્યમાં કુલ 12 શંકાસ્પદ ચાંદીપુરા વાયરસ કેસ નોંધાયા છે.
ચાંદીપુરા વાયરસથી આજે પંચમહાલમાં એક મોત થયુ છે, માહિતી પ્રમાણે, પંચમહાલમાં શંકાસ્પદ ચાંદીપુરા વાયરસથી એક બાળકીનું મોત થયુ છે. ખરેખરમાં, પંચમહાલના ગોધરાના કોટડા ગામમાં એક બાળકી ચાંદીપુરા વાયરસનો ભોગ બની હતી, જેને સારવાર અર્થે વડોદરામાં ખસેડવામાં આવી હતી, જ્યાં તેનુ મોત થયુ હતુ. હાલમાં બાળકીનો રિપોર્ટ પૂણે લેબમાં મોકલવામાં આવ્યો છે, રિપોર્ટ બાદ મોતનુ સાચુ કારણ સામે આવશે.
ચાંદીપુરા અંગે તજજ્ઞોના જણાવ્યા અનુસાર આ વાયરસથી સંક્રમિત બાળકોના મગજમાં સોજા સહિત અન્ય ઘણા લક્ષણો જોવા મળી રહ્યા છે. આરોગ્ય વિભાગ દ્વારા વાયરસથી સંક્રમિત બાળકોના પરિવારના સભ્યોના સેમ્પલ પણ લેવામાં આવી રહ્યા છે. હિંમતનગર સિવિલ હોસ્પિટલમાં કુલ 6 દર્દીઓ દાખલ થયા હતા. અરવલ્લી જિલ્લાના મેઘરજ અને ભિલોડા તાલુકાના અંદાજે ત્રીસથી વધારે ગ્રામ્ય વિસ્તારોમાં આરોગ્ય વિભાગ દ્વારા સર્વેલન્સ કામગીરી પુરજોશમાં ચાલુ છે.
ચાંદીપુરા વાયરસ અંગે -
ગુજરાતમાં ચાંદીપુરા વાયરસના શંકાસ્પદ 8 મૃત્યું નોંધાયા છે. આ મોતમાં સેમ્પલના પરિણામ આવ્યા બાદ જ ચાંદીપુરા રોગના આ કેસ હતા કે નહીં તેની પૃષ્ટિ થશે, ચાંદીપુરા રોગ ચેપી નથી પરંતુ અસરગ્રસ્ત વિસ્તારોમાં સઘન સર્વેલન્સની પ્રાથમિક તબક્કે જ સૂચના અપાઇ હતી. જેના પરિણામે અત્યારસુધીમાં કુલ 4487 ઘરોમાં કુલ 18646 વ્યક્તિઓનું સ્ક્રીનીંગ કરાયું છે.સેન્ડફ્લાય કંટ્રોલ માટે કુલ 2093 ઘરોમાં જંતુનાશક દવાઓનો છંટકાવ પણ કરાયો છે.
ચાંદીપુરા વાયરસના લક્ષણો
ચાંદીપુરા વાયરસના કેસોમાં દર્દીને તાવ આવે છે, ઉલટી થાય, શ્વાસમાં તકલીફ પડે, મગજનો તાવ આવે જેવા લક્ષણો જોવા મળે છે. આ રોગના મહત્તમ લક્ષણો અન્ય વાયરસ જેવા જ હોય છે. જેથી પ્રાથમિક તબક્કે રોગની ઓળખ કરવામાં મુશ્કેલી પડે એમ છે. જોકે ચાંદીપુરા વાયરસ મોટાભાગે 10 વર્ષની નીચેના બાળકોમાં જ જોવા મળે છે. આ વાયરસ ખૂબ જ જીવલેણ છે, જેથી તેનો ભોગ બનેલાને જલદીથી ટ્રીટમેન્ટ મળવી જરૂરી છે. દર્દીઓમાં એન્સેફાલીટીસના લક્ષણો પણ દેખાવા લાગે છે, જેનાથી દર્દી કોમામાં પણ જઇ શકે છે.
ચાંદીપુરા વાયરસ ચેપની સારવાર -
- ચાંદીપુરા વાયરસ માટે અત્યારે કોઈ ખાસ સારવાર નથી.
- જો કે, આ વાયરસ ખતરનાક છે અને તેના લક્ષણો એન્સેફાલીટીસ (મગજના તાવ) જેવા જ હોવાથી દર્દીએ જેટલી જલ્દી થાય તેટલી જલ્દીની ડોક્ટર સાથે મુલાકાત લેવી જોઈએ.
- ચાંદીપુરા વાયરસથી બચવા માટે મચ્છર અને માખીઓથી બચવું અને તંદુરસ્ત ખોરાક લેવો મહત્વપૂર્ણ છે.
- ચોમાસામાં ખુલ્લામાં ઉપલબ્ધ ખોરાક પર માખીઓ બેસી જાય છે, જેના કારણે આ ખાદ્ય પદાર્થો તમને આ જીવલેણ રોગનો શિકાર પણ બનાવી શકે છે.
- આ વાયરસથી પોતાને બચાવવા માટે સ્વચ્છતા અને સાવચેતી જરૂરી છે.
ટ્રેન્ડિંગ સમાચાર
ટોપ સ્ટોરી
