Surendranagar: પોષ ડોડાની હેરાફેરી કરતાં બે શખ્સોને SOGએ લિંબડીથી ઝડપ્યા, કુલ 12 લાખથી વધુનો મુદ્દામાલ કર્યો જપ્ત

એસઓજીની ટીમે સુરેન્દ્રનગરમાં ગેરકાયદેસર વેપાર પર દરોડાની કાર્યવાહી શરૂ કરી છે. ગઇકાલે સુરેન્દ્રનગર SOG પોલીસે મોટી કાર્યવાહી કરી છે

(તસવીર- એબીપી અસ્મિતા ન્યૂઝ)

Surendranagar Crime News: રાજ્યમાં ઠેર ઠેર એસઓજી પોલીસે એક્શન લેવાનું શરૂ કર્યુ છે, આ અંતર્ગત ગઇકાલે અચાનક એસઓજી પોલીસે સુરેન્દ્રનગર જિલ્લાના બોરણા ગામે દરોડા પાડ્યા હતા, જેમાં પોષ ડોડાના જથ્થા સાથે બે શખ્સોને ઝડપી પાડ્યા હતા, આ બન્ને પાસેથી કુલ 12 લાખથી વધુનો મુદ્દામાલ જપ્ત કરવામા આવ્યો હતો. એસઓજીની આ કાર્યવાહીથી સ્થાનિક પોલીસ પર અનેક સવાલો ઉઠ્યા છે.

એસઓજીની ટીમે સુરેન્દ્રનગરમાં ગેરકાયદેસર વેપાર પર દરોડાની કાર્યવાહી શરૂ કરી છે. ગઇકાલે સુરેન્દ્રનગર SOG પોલીસે મોટી કાર્યવાહી કરી છે. જિલ્લાના લિંબડી તાલુકાના બોરણા ગામ નજીકથી ગેરકાયદેસર પોષ ડોડાના જથ્થા સાથે બે શખ્સોને ઝડપી લીધા હતા. એસઓસજીએ આ દરોડામાં ૨૦૬ કિલો પોષ ડોડાનો જેની કિંમત ૬.૧૭ લાખ રૂપિયા છે, આની સાથે સાથે 11 હજારના 04 મોબાઈલ, 5 લાખની એક કાર, ૭૫૦૦૦ની કિંમતના 3 બાઇક, આમ રોકડ મળીને કુલ ૧૨.૧૬ લાખ રૂપિયાથી વધુનો મુદ્દામાલ જપ્ત કર્યો હતો. ઝડપાયેલા બન્ને શખ્શો વિરૂદ્ધ આ કિસ્સામાં નાર્કોટિક્સ એક્ટ હેઠળ ગુનો નોંધી કાયદેસરની કાર્યવાહી હાથ ધરાઇ છે. સ્થાનિક પોલીસને અંધારામાં રાખી SOG ટીમે દરોડા પાડતા પોલીસની કામગીરી સામે સવાલ ઉઠ્યા છે.

ભાવનગર SOG એ બાતમીના આધારે નશાકારક કફ સિરપનો જથ્થો ઝડપી પાડ્યો

ભાવનગરમાંથી યુવાધનને બરબાદ કરતા કોડેઈન કફ સિરપનો જથ્થો સ્પેશિયલ ઓપરેશન ગ્રુપ દ્વારા ઝડપી પાડવામાં આવ્યો છે. ભાવનગર શહેરના માલધારી સોસાયટીમાં આઈ મેડિકલ એજન્સી હોલસેલ ડીલરને ત્યાં ડોક્ટરની મંજૂરી વગર કફ સિરપની બોટલો વેચીને ગોરખધંધો ચલાવવામાં આવી રહ્યો હતો.  જોકે આ મેડિકલ એજન્સીથી માત્ર એક કિલોમીટરના અંતરે ભરતનગર પોલીસ સ્ટેશન આવેલું છે.  જે હવે શંકાના દાયરામાં ઘેરાયું છે.  કારણ કે શહેરમાં બેફામ કફ સિરપની બોટલોનું વેચાણ પોલીસના નાક નીચે વધી રહ્યું છે. 

ભાવનગર એસઓજી પોલીસને બાતમી મળી હતી કે શહેરના માલધારી સોસાયટીમાં આઈ મેડિકલ એજન્સીમાં મોટાપાયે કોડેઈન નામની કફ સિરપનો ગેરકાયદેસર રીતે વેચાણ થઈ રહ્યું છે.  જોકે આ કફ સિરપની બોટલથી ભાવનગરના યુવાઓ નશાના રવાડે ચડ્યા છે તે પણ સત્ય છે. પરંતુ આ કફ સિરપની બોટલ યુવાનો માટે ઘાતક સાબિત થઈ રહી છે તે નકારી શકાય નહીં.  તાજેતરમાં ભાવનગર શહેરના વિવિધ વિસ્તારોમાં જેમકે આણંદ નગર વિસ્તાર, કુંભારવાડા વિસ્તાર, કરચલીયા પરા, આડોડિયા વાસ, ચિત્રા સહિતના પાન મસાલાની દુકાનો પર પણ આસાનીથી ઉપલબ્ધ થાય તેવી કોડેઈન કફ સિરપની બોટલનું મોટાપાયે વેચાણ થઈ રહ્યું છે.  મેડિકલ શોપ અને દુકાનદારો માત્ર 150 રૂપિયાનું કમિશન મેળવવા માટે આ પ્રકારના નશાકારક કફ સિરપની બોટલ વેચીને યુવાધનને નશાના રવાડે ચડાવી રહ્યા છે. 

ભાવનગરના મેડિકલ એજન્સી સ્ટોર પરથી જે જથ્થો મળ્યો છે તેમાં ભાવનગર એસઓજી પોલીસ અને અમદાવાદ ફૂડ એન્ડ ડ્રગ્સ વિભાગના ઇન્સ્પેક્ટર દ્વારા કાર્યવાહી કરવામાં આવી છે.  એજન્સી શોપમાંથી કુલ 579 100 mlની કફ સિરપની બોટલો મળી આવી છે, જેમની કુલ કિંમત 86,850 થાય છે.  આ એજન્સી સ્ટોર પરથી દિલીપ ધોલેતર નામનો વ્યક્તિ છૂટકમાં કફ સીરપની બોટલો વેચીને ગોરખ ધંધો ચલાવતો હતો. હાલ પોલીસ દ્વારા કાર્યવાહી કરી આ મેડિકલ એજન્સી સ્ટોરને સીલ મારવામાં આવ્યો છે તેમજ આ વ્યક્તિની પણ ધરપકડ કરીને વધુ તપાસ હાથ ધરવામાં આવી છે.  

હાલ તો ભાવનગર પોલીસ દ્વારા આ મેડિકલ સ્ટોરને સીલ મારી દેવામાં આવ્યું છે. આ નશાકારક સિરપ કેસમાં એક વ્યક્તિની ધરપકડ કરવામાં આવી છે. હાલ આ સમગ્ર કેસને લઈ ભાવનગર પોલીસ દ્વારા વધુ તપાસ હાથ ધરવામાં આવી છે.