આ વર્ષે ગરમી તમામ રેકોર્ડ તોડશે, ગુજરાતના આ વિસ્તારમાં આગામી બે દિવસમ હિટવેવની આગાહી

આગામી ૩ દિવસ દરમિયાન અમદાવાદમાં ૪૦થી ૪૧ ડિગ્રીની વચ્ચે ગરમી રહે તેની સંભાવના છે.

પ્રતિકાત્મક તસવીર

રાજ્યમાં આગામી દિવસોમાં ગરમીનો પારો 40 ડિગ્રીને પાર પહોંચે તેવી શકયતા. હવામાન વિભાગે આગામી બે દિવસ સૌરાષ્ટ્ર અને કચ્છમાં હીટ વેવની આગાહી કરી છે. શુક્રવારે રાજ્યના 8 શહેરમાં 39 ડિગ્રીથી વધુ મહત્તમ તાપમાન નોંધાયું હતું. જેમાં ૪૨.૪ ડિગ્રી સાથે ભૂજમાં સૌથી વધુ ગરમી નોંધાઈ છે. તો અમદાવાદમાં ૩૯.૯ ડિગ્રી સરેરાશ મહત્તમ તાપમાન નોંધાયું.

આગામી ૩ દિવસ દરમિયાન અમદાવાદમાં ૪૦થી ૪૧ ડિગ્રીની વચ્ચે ગરમી રહે તેની સંભાવના છે. તો ગઈકાલે સુરેંદ્રનગરમાં ૪૧.૫, રાજકોટ-કંડલામાં ૪૧.૨, ડીસામાં ૪૧, અમરેલીમાં ૪૦.૫, કેશોદમાં ૪૦.૧, વડોદરામાં ૩૮.૬, સુરતમાં ૩૨.૩, ભાવનગરમાં ૩૬.૧ જ્યારે ગાંધીનગરમાં ૩૮.૫ ડિગ્રી તાપમાન નોંધાયું છે અને બે દિવસ કચ્છ અને સૌરાષ્ટ્રમા વિશેષ કરીને રાજકોટમાં હીટ વેવની સ્થિતિ રહેશે.

ઈન્ડિયન મિટિરિયોલોજિકલ ડિપાર્ટમેન્ટ (આઈએમડી)ના માર્ચના છેલ્લા દિવસે રજૂ થયેલા આકલન મુજબ એપ્રિલ-મે-જૂન દરમિયાન ગરમી અનેક રેકોર્ડ બનાવશે. ગરમીના જૂના રેકોર્ડ તૂટે અને નવા નોંધાય એવી પણ શક્યતા છે. તો વળી દિલ્હીમાં ૨૦૧૦ પછીનો સૌથી ગરમ માર્ચ મહિનો નોંધાયો હતો.

આઈએમડીના કહેવા પ્રમાણે સૌરાષ્ટ્ર-કચ્છ, કર્ણાટક, કોંકણ, આખુ ઉત્તર ભારત, ઝારખંડ, છત્તીશગઢ, ઓડિશા વગેરેમાં ગરમી વધારે પડશે. સરેરાશ કરતા ઉનાળાનું તાપમાન ઊંચુ નોંધાશે. રાતે પણ વધુ ગરમી વરતાશે. દેશમાં મોટાભાગના સ્થળોએ તાપમાન ૪૦ ડીગ્રી કરતા વધારે નોંધાયુ છે.

હવામાન વિભાગની વિગતો પ્રમાણે હિટવેવની પણ શરૂઆત એપ્રિલની ૩જી તારખથી થશે. હિટવેવ ભારતમાં જીવલેણ નીવડે છે અને દર વર્ષે તેનાથી અનેક લોકો મૃત્યુ પામે છે. ખાસ કરીને પશ્ચિમ ભારતના ગુજરાતથી હરિયાણા સુધીના પટ્ટામાં હિટવેવથી ધરતી તપી ઉઠશે. એ લોકો માટે આકરી સ્થિતિ પેદા કરશે.